Փաստացի, մենք կարող ենք ասել, որ Էրդողանն իր քայլերով Թուրքիայի գոյությունը հարցականի տակ է դնում․ Կ․ Սիվկով

SHANTNEWS-ի մոսկովյան թղթակից Վահե Ավանեսյանը զրուցել է Ռուսաստանի հրթիռային և հրետանային գիտությունների ակադեմիայի փոխնախագահ, ռազմական գիտությունների դոկտոր Կոնստանտին Սիվկովի հետ:

-Ռուսաստանը հենց այդ ահաբեկիչներին իր սահմաններին մոտ չթողնելու նպատակով տարիներ առաջ ռազմական գործողություններ սկսեց Սիրիայում։ Հիմա նրանք հատուկ չվերթներով բերվում են Ռուսաստանի սահմանների տակ։ Սա չի՞ անհանգստացնում երկրի ռազմական ղեկավարությանը։

-Իհարկե, երկրի ռազմական ղեկավարությանը դա շատ է անհանգստացնում։ Բանն այն է, ոռ գրոհայինները Ադրբեջանի տարածքում ոչ միայն ուղղակի զինվորներ են, որ գնում են պատերազմելու, նրանք գաղափարական մարտիկներ են։ Իսկ գաղափարական մարիկները կարող են շատ վնասկար գործողություններ ձեռնարկել։ Նրանք կարող են իրենց ազդեցության տակ գցել ադրբեջանցի երիտասարդներին, հատկապես աղքատ շրջանակներից։ Իսկ ադրբեջանում հասարակության սոցիալական դասակարգումը խիստ ծանր է, ու վատ կացության մեջ գտնվող մարդիկ հեշտությամբ կարող են հավաքագրվել այդ գրոհայինների շարքերը։ Հետո Թուրքիայի կողմից այդ գրոհայինները կարող են ուղղվել դեպի հյուսիս՝ ընդդեմ Ռուսաստանի։ Դա մեր ռազմական ղեկավարությանը շատ է անհանգստացնում։ Միևնույն ժամանակ, սա մեր ռազմական ղեկավարությանը ստիպում է մտածել, և ոչ միայն մեր ռազմական ղեկավարությանը, այլև Ռուսաստանի ռազմաքաղաքական ղեկավարությանը մտածելու տեղիք է տալիս, թե արդյոք հնարավոր է շարունակել բարեկամական հարաբերություններ պահել Ադրբեջանի հետ։ Իմ կարծիքով, սա իմ անձնական կարծիքն է, սա ես շեշտում եմ․ Ադրբեջանի գործողությունները Ռուսաստանի հանդեպ խորը թշնամական բնույթ են կրում։ Եվ հենց այն փաստը, որ Ադրբեջանի տարածքում Թուրքիայի հետ համատեղ պարբերաբար զինվորական վարժանքներ են իրականացվում, հաստատում են իմ այդ մտավախությունները։ Թուրքիան, հակառակ այն բանի, որ Ռուսաստանի կողմից դեպի իրեն ուղղված բազմաթիվ բարեկամական քայլեր են արվում, միևնույն է, Թուրքիան մեր երկրի հանդեպ ցուցադրում է թշնամական վերաբերմունք։ Դա դրսևորվում է այն բանում, որ Թուրքիան, փաստացի, այսօր պատերազմում է ընդդեմ Ռուսաստանի ու Ռուսաստանի դաշնակիցների Լիբիայում, Սիրիայում և հիմա էլ Ադրբեջանում։ Փաստացի, դա նշանակում է, որ Թուրքիան ներխուժել է հետխորհրդային տարածք, իսկ այստեղ Թուրքիան գործ չունի։ Եվ այս պայմաններում պետք է վերագնահատել Թուրքիայի հետ համագործակցության հեռանկարները։

Ես ուզում եմ մի պարզ բան ասել։ Էրդողանը շատ կարճատես քաղաքականություն է վարում։ Թուրքիան շատ վտանգավոր երկիր է դարձել։ Նա նստած է վառոդի տակառի վրա, որ կոչվում է Քրդական աշխատավորական կուսակցություն և քրդերի խնդիր։ Ու այդ պայմաններում Էրդողանին հաջողվել է փչացնել հարաբերութունները բոլոր ռազմաքաղաքական ուժային կենտրոնների հետ։ Ամերիկայի Միացյալ Նահանգների հետ, Իսրայելի հետ, որ թեև փոքր երկիր է, բայց վերազգային էլիտաների միջոցով ունի հսկայական ազդեցություն ու գլոբալ միավոր է հանդիսանում, Եվրամիության հետ։ Իսկ հիմա էլ Ռուսաստանի հետ, որ տրամադրված է Թուրքիայի հետ բարեկամական հարաբերություններ ունենալուն։ Այս պայմաններում Էրդողանի իշխանության գոյության հարցը և ընդհանրապես Թուրքիայի՝ որպես պետության գոյության հարցը խիստ լուրջ և ակտուալ է դառնում։ Փաստացի, մենք կարող ենք ասել, որ Էրդողանն իր քայլերով Թուրքիայի գոյությունը հարցականի տակ է դնում։