Գիշերօթիկ հաստատությունների լուծարումից մեկուկես տարի անց դեռ ճգնաժամային կենտրոններ չեն ձևավորվել

Գիշերօթիկ խնամքի հաստատությունների փոխարեն ճգնաժամային սպասարկման կենտրոնների վերակազմակերպումը մինչև տարեվերջ չի ավարտվի։ Տարբեր պատճառներով այն արդեն մեկուկես տարի է ուշանում է։ Ըստ ծրագրի՝ Հայաստանում ձևավորվելու են երեք ճգնաժամային աջակցության կենտրոններ՝ Շիրակի, Սյունիքի մարզերում և մայրաքաղաքում, որոնց կառուցվածքային ձևաչափը դեռ հստակեցված չէ։

Նախատեսված է՝ Գյումրիի երկու գիշերօթիկ խնամքի հաստատությունների լուծարման հիմքի վրա  ճգնաժամային աջակցության կենտրոնը կգործի Նանսենի անվան հաստատությունում, որտեղ այս պահին խնամվում են ռիսկային խմբում գտնվող երեխաները։

Հանրապետությունում գործող գիշերօթիկ խնամքի հաստատություններից վերջինները փակվել են մեկ տարի առաջ, դրանցից երկուսը՝ Գյումրիում։ Թիվ մեկ գիշերօթիկը լուծարված է, իսկ Նանսենի անվան թիվ երկու հաստատությունում դեռ 24 երեխա է ապրում, նրանց ընտանիք վերադարձը համարվում է ռիսկային:

«Այս 24 երեխաների ընտանիքները  բարձր ռիսկայնություն պարունակող ընտանիքներ են, նրանց խնամքը շարունակվում է այնպես, ինչպես եղել է՝ որպես Նանսենի անվան գիշերօթիկ»,- նշում է Շիրակի մարզպետարանի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը։

Նոր կառուցվածքով ճգնաժամային կենտրոնը գործառույթի նոր բաղադրիչ էլ կունենա, այն է՝ անհրաժեշտության դեպքում կենտրոնում ժամանակավորապես ապրելու հնարավորություն կտրվի նաև երեխայի ծնողին կամ հարազատին։ Նոր նախագծով ճգնաժամային կենտրոնը կլինի ինչպես ցերեկային, այնպես էլ շուրջօրյա գործող։«Եթե երեխան, օրինակ, հարևան մարզում էլի աջակցության կարիք ունի, այս դեպքում ևս Շիրակի մարզի Երեխայի և ընտանիքի աջակցության կենտրոնը ծառայելու է նաև շրջակա տարածքների համար։ Մինչ օրս որպես պետական հաստատություն գործել է միայն «Զատիկ» կենտրոնը՝ ճգնաժամային բաղադրիչով, սպասարկելով ամբողջ Հանրապետության տարածքը»,- հարցի շուրջ պարզաբանումներ է տվել աշխատանքի և սոցիալական հարցերի նախարարության երեխաների հիմնահարցերի բաժնի պետ Անահիտ Քալանթարյանը։

Ճգնաժամային աջակցության  կենտրոնի կազմակերպումն ուշանում է, որից թեև կախված չէ մասնագիտական խմբի աշխատանքը։ Մասնագետներն այս պահին շարունակում են ընտանիք վերադարձող երեխաների կարիքների գնահատումը։

Երեխայի ընտանիք վերադարձի այլընտրանքային տարբերակ շարունակում է մնալ խնամատարությունը։ Մեկուկես տարվա ընթացքում Շիրակի մարզում եղել են խնամատար ընտանիք դառնալու ցանկություն հայտնողներ, բայց օրենքում եղած դրույթների անհամապատասխանությունը պատճառ է դարձել նրանց մերժելու կամ չհաստատելու։

Գյումրիում ճգնաժամային կենտրոնի գործունեության մեկնարկը տեղափոխվում է հաջորդ տարվա փետրվար-մարտ ամիսներ: Իսկ այս ընթացքում դեռ անորոշ կմնա գիշերօթիկ հաստատությունում  խնամվող 24 երեխաների կարգավիճակը, թե նրանցից քանիսին և ինչ ժամկետում հնարավոր է վերադարձնել ընտանիքներ։