Պատերազմում վիրավորում ստացած զինծառայողները վերականգնողական բուժում են ստանում Գյումրիի վերականգնողական կենտրոնում

Արցախյան պատերազմում վիրավորում ստացած զինծառայողները մի քանի  բարդ  վիրահատություններից հետո բուժումը շարունակում են Գյումրիի վերականգնողական կենտրոնում:Այս պահին վերականգնողական  բուժում են ստանում  50-ից ավելի  զինվորականներ:

Կենտրոնում մասնագիտական  խմբերը  մերսումների, թերապևտիկ վարժությունների ու մարզասարքերի միջոցով  հիմնականում վերականգնում  են  վերջույթների ֆունկցիոնալ խանգարումները, նյարդային համակարգի բնականոն գործունեությունն ու ողնաշարային  հատվածների ոսկրային խախտումները:

26 ամյա Տիգրանի  ձախ ոտքից  բեկորները դեռ  ամբողջությամբ հեռացված չեն: Քայլում է հենակներով :Առաջնագիծ  մեկնած  կամավորականներից է, Ջեբրայիլում ընթացող թեժ մարտերի ժամանակ   զինակից 30 ընկերների հետ վիրավորվել  է։Մի քանի կիլոմետր սողալով դուրս են եկել  կրակահերթի տակից , որից հետո նրանց օգնության են հասել զորամասի տղաները ։

«Այդ պահին մենակ ոտքիս  վերևի մասում եմ զգացել, որ մի բան մտավ,մեջքիս հատվածում չէի էլ զգացել,որ վիրավորում ունեմ։ Երբ փորձեցինք  սողալով դուրս գալ դեպի մեզ օգնության եկած տղաների կողմը, այդ պահին եմ նկատել,որ ոտքս արյունահոսում է»,-պատմում է կամավորական Տիգրան Գևորգյանը։

Վիրավոր զինվորին  բուժական  մերսումներով  առողջացնող  Ռուզվելտը  տարիներ առաջ ծանր վիրավորում է ստացել նույն Ջեբրայիլի դիրքերում: Ռուսաստանից ծառայության համար հայրենիք վերադարձած տղան  թշնամու դիվերսիոն հարձակման ժամանակ գլխի շրջանում  ստացած բեկորային վնասվածքներից  աչքի տեսողությունն է կորցրել, ծառայությունից վերադառնալուց հետո շարունակել է ուսումն ու զուգահեռ մասնագիտացել նաև վերականգնողական մերսման գործում:

«Երջանկություն եմ զգում,որ օգնում եմ տղաներին,որովհետև ես էլ եմ էդ  փուլերով անցել,ես զգում եմ իրենք ինչ հոգեկան ապրումներ ունեն։Անում եմ առավելագույնը, նույնիսկ ավելին ՝ մեր հերոս տղաներին օգնելու համար»,-ասում է Գյումրիի վերականգնողական կենտրոնի մերսող Ռուզվելտ Թորոսյանը։

Արմանը 18 տարեկան է ընդամենը 40 օրվա ծառայող է եղել ,երբ պատերազմը սկսվել է:Մարտակերտի դիրքերում  տղաների թիկունքն են պահել ,խրամատներ փորել։ Արկի պայթյունից բեկորային վնասվածքներ է ստացել :Մի քանի բարդ վիրահատություններից հետո հիմա վերականգնողական  բուժում է ստանում , վերջույթներն են թուլացած։

Լեյտենանտ Մուշեղ Մարտիրոսյանի մոտ ևս ոտքերի ֆունկցիայի ու մարմնի հավասարակշռության պահպանման խնդիրներ կան: 22 ամյա սպան  ծառայում է  հակաօդային պաշտպանությունում,անօդաչու թռչող սարքի հարվածներից  ու մեքենայի պայթյունից իր զինվորներից երկուսը զոհվել են, ինքը ծանր  վիրավորվել  է գլխի շրջանում ու 15 օր գտնվել է կոմայի մեջ:

Վերականգնողական կենտրոնում  բոլոր  զինվորների համար անցկացվում  է անհատական բուժման  կուրս: Ֆիզիկական վնասվածքներից բացի մասնագետներն աշխատում են զինվորների մոտ հաղթահարել հոգեբանական  ու խոսակցական ապարատի խնդիրները:

Իսկ անդամահատված զինվորների հետվիրահատական  բուժումներն ու   մերսումները մասնագետներն անցկացնում են տնային պայմաններում,որից հետո կատարվելու է  պրոթեզավորում։