Շիրակի մարզում կորոնավիրուսի հաստատված դեպքերը նվազել են

Շիրակի մարզում կորոնավիրուսի հաստատված դեպքերի թվի նվազում է նկատվում: Իսկ նվազումը փաստող թվերը համեմատության մեջ են հոկտեմբեր, նոյեմբեր ամիսների հետ: Հիվանդությունների վերահսկման և կանխարգելման կենտրոնի  մարզային մասնաճյուղում նվազել է օրական կատարվող նմուշառումների, դրանց մեջ հաստատվող դեպքերի և հոսպիտալացվողների թիվը: Գյումրիի ինֆեկցիոն հիվանդանոցում 100 մահճակալից 70-ն է այժմ զբաղված: Անփոփոխ է միայն  ծանր դեպքերի պատկերը: Կորոնավիրուսը առավել ծանր են տանում 60-ից բարձր տարիք և քրոնիկական հիվանդություններ ունեցողները։

Կորոնավիրուսի երկրորդ ալիքն , ըստ բժիշկների, ավելի ուժեղ է ու վտանգավոր ռիսկի խմբում գտնվողների համար:

«Վիրուսը դարձել է ավելի ագրեսիվ, ավելի դժվար կառավարելի: Հիմա հոսպիտալացված են հիմնականում 60-ից բարձր տարիքի անձինք, որոնք ունեն ուղեկցող հիվանդություններ և բնականաբար ավելի ծանր են տանում: Հիվանդներն էլ նպաստում են իրենց սխալ վարքագծով։Սկսում են ինքնաբուժությամբ զբաղվել: Գալիս են ամենաքիչը 2-3 հակաբիոտիկ օգտագործած, որը վիրուսային վարակի դեպքում բացարձակ չի օգնում: Դրա համար ավելի դժվար է ենթարկվում մեր մոտ բուժման»,- shantnews-ին ասել է Գյումրիի ինֆեկցիոն հիվանդանոցի վարակաբան Հեղինե Հունանյանը:

Կորոնավիրուսի թվերը Շիրակի մարզում սկսեցին աճել հոկտեմբերին, ինչով էլ պայմանավորված էր վերապրոֆիլավորման որոշումը: Իսկ հաստատված դեպքերի աճի հանգեցրեց նաև պատերազմական իրավիճակը , որը թուլացրել էր ուշադրությունը հակահամաճարակային սահմանափակումների և կանոններրի նկատմամբ:

Վերջին 10 օրերին նվազել է և՛ օրական նմուշառումների, և՛ դրանց մեջ հաստատված դեպքերի թիվը: Ընդհանուր առմամբ թվերը փոքր չեն, բայց մասնագետները իրավիճակը նվազման միտումով են գնահատում՝համեմատ հոկտեմբեր-նոյեմբեր ամիսների։ Շիրակի մարզում կատարված նմուշառումների, դրական դեպքերի մեջ տոկոսային հարաբերությամբ մասնագետները մեծ չեն համարում նաև մահացության ցուցանիշը:

«Մահացության ցուցանիշը 200-ը չի գերազանցում: Սա շատ փոքր թիվ է, եթե հաշվի առնենք, մահերի տարեկան վիճակագրությունը: Մեր ուսումնասիրություններով մահացածների մեջ հիմնական տոկոսը կազմում են  65-ից բարձր տարիք ունեցողները, քրոնիկական հիվանդները և նրանք, որոնք ուշ են դիմում բուժօգնության:Հիմա օրական կատարում ենք 120-150 թեստավորում, հաստատված դեպքերը կազմում են 17-22%»,- նշում է ՀՎԿԱԿ «Շիրակ» մասնաճյուղի տնօրեն Վարդան Ուռուտյանը:

Մարտի 1-ից մինչ օրս հիվանդությունների վերահսկման և կանխարգելման ազգային կենտրոնի «Շիրակ» մասնաճյուղում 26 հազար նմուշառում է կատարվել: Դրանցից հաստատված դեպքերի թիվը 6000-ն է: Նմուշառումները ամռան ու աշնան ամիսներին են շատ եղել, պայմանավորված դպրոցներում մանկավարժների պարտադիր թեստավորմամբ: Շիրակի մարզում 5200 ուսուցիչ է թեստավորվել, բայց ուսումնական պրոցեսի ընթացքում կորոնավիրուսի հաստատված բազմաթիվ դեպքեր հայտնաբերվել են:

Ըստ մասնագետի, Շիրակի մարզի ոչ մի դպրոցում համաճարակային վիճակն այնպիսին չի եղել, որը կարող էր դասապրոցեսը դադարեցնելու պատճառ դառնալ:

Այժմ պոլիկլինիկաներում գրիպի դեմ են պատվաստում: Սա,ըստ բժիշկների, չի օգնում կորոնավիրուսին, բայց բարձրացնում է օրգանիզմի դիմադրողականությունը: Ամանորը նշելու հայկական սովորույթը հաշվի առնելով, բժիշկները խորհուրդ են տալիս՝ խիստ սահմանափակել շփումները: Սա կօգնի COVID-19-ի հաստատված դեպքերի նվազման միտումը պահպանել: