Ալկոհոլը բացասաբար է ազդում օրգանիզմի բնական պաշտպանության վրա. գիտնականներ

Դեկտեմբերի սկզբին «Ռոսպոտրեբնադզորի» ղեկավար Աննա Պոպովան ասել էր, որ կորոնավիրուսի դեմ պատվաստումից առաջ առնվազն երկու շաբաթ ալկոհոլ չպետք է օգտագործել: Ավելի ուշ, Գամալեայի կենտրոնի տնօրեն Ալեքսանդր Գինցբուրգը պարզաբանել է՝ երեք օրը բավական է:

Բազմաթիվ ուսումնասիրություններն ու ակնարկները վկայում են՝ ալկոհոլը բացասաբար է ազդում օրգանիզմի բնական պաշտպանության վրա:

Մերիլենդի համալսարանի (ԱՄՆ) գիտնականները փորձ են անցկացրել. առողջ երիտասարդ կամավորները (միջին տարիքը՝ 27) առանց ընդմիջման խմել են հինգ ՝50 գրամանոց բաժակով օղի, այնուհետև երեք անգամ արյուն են հանձնել 20 րոպե, երկու և հինգ ժամ անց:

Ինչպես պարզվում է, ալկոհոլը անմիջապես առաջացնում է ընդհանուր իմունային պատասխան: Այնուամենայնիվ, մի քանի ժամ անց լեյկոցիտների մակարդակը (դրանք հիմնական դեր են խաղում ներքին և արտաքին պաթոգեններից բնական պաշտպանության համար) զգալիորեն նվազում է: Հինգ ժամ անց բնական պաշտպանիչ բջիջների քանակը (իմունային բջիջներ, որոնք ոչնչացնում են վարակված բջիջներին) արյան մեջ ընկնում է, և մեծանում է ցիտոկինային սպիտակուցների կոնցենտրացիան: Սա, ամենայն հավանականությամբ, իմունային համակարգի թուլացման վկայությունն է:

Այնուամենայնիվ, մի քանի ավելի վաղ արված հրապարակումներ ցույց են տալիս, որ ալկոհոլը փոքր չափաբաժիններով կամ ընդհանրապես չի ազդում իմունիտետի վրա, կամ հակառակը, բարձրացնում է զգոնությունը՝ նվազեցնելով վարակի վտանգը: Այս արդյունքները ստացվել են առնետների վրա կատարված փորձերի արդյունքում:

Ըստ Ալեքսանդր Գինցբուրգի՝ պատվաստումից առաջ և անմիջապես հետո խմելը, նույնիսկ չափավոր, կարող է խանգարել նոր կորոնավիրուսի դեմ հակամարմինների ձևավորմանը:

COVID-19- ի նկատմամբ հետպատվաստումային իմունիտետի ձևավորման վրա ալկոհոլի ազդեցության վերաբերյալ հրապարակված  աշխատանքներ չկան, բայց կան էթանոլի և այլ պատվաստանյութերի փոխազդեցության ուսումնասիրություններ: Մասնավորապես, 2012-ին շվեդ գիտնականներն ապացուցել են, որ նույնիսկ չափավոր քանակությունը նվազեցնում է պնևմոկոկային պատվաստանյութի տված արդյունքը: Մասնագետները եկել են հետևյալ եզրակացության. ալկոհոլ օգտագործող մարդկանց համար պատվաստումը միշտ չէ, որ տալիս է սպասելի արդյունքը:

Առողջապահության համաշխարհային կազմակերպությունը նշում է, որ ալկոհոլի անվտանգ քանակություն չկա: Եվ համավարակի պայմաններում ավելի լավ է մի կողմ թողնել ալկոհոլը: Անգամ եթե անտեսենք իմունիտետի վրա ազդեցությունները, միևնույն է, էթանոլը կապված է քաղցկեղի մի քանի տեսակների առաջացման բարձր ռիսկի հետ, օրինակ՝ կրծքի, գլխի և պարանոցի:

Բացի դրանից, ալկոհոլը խտացնում է արյունը, և COVID-19- ի հաճախակի բարդությունների շարքում է թրոմբոէմբոլիան (արյան կարևոր անոթների խցանում): Սա խորացնում է հիվանդության ընթացքը և, ընդհանուր առմամբ, կյանքի համար վտանգավոր է: