Գործ ունենք ոչ թե անհրաժեշտության, այլ կամակորության հետ. փաստաբանները սանկցիայի դեմ թվերով են խոսել

Ինչպես արդեն հաղորդել էինք, ՀՀ Փաստաբանների պալատն այսօր նիստ էր հրավիրել՝ նպատակ ունենալով քննարկել այն քայլերը, որոնք պետք է ձեռնարկեն փաստաբանի նկատմամբ տուգանքի կիրառում նախատեսող իրավակարգավորման դեմ:

Հիշեցնենք, որ գործող օրենքով դատավորը փաստաբանի նկատմամբ սանկցիա կիրառելու համար դիմում է Փաստաբանների պալատի խորհրդին, և խորհուրդն է որոշում պատժել կամ չպատժել փաստաբանին: Խորհրդարան ներկայացված առաջարկ-փոփոխությամբ դատավորն անմիջապես կարող է պատժել փաստաբանին՝ նրան տուգանելով 100 հազար դրամով: 

«2016 թվականին քաղաքացիական գործերով առաջին ատյանի դատարանում քննվել է 132 հազար 581 գործ: Տեսեք, թե ինչ մեծ թվի մասին ենք խոսում, և 2016 թվականին միայն 4 դատական սանկցիա է կիրառվել փաստաբանների նկատմամբ քաղաքացիական գործերով: Այսինքն՝ ակնհայտ է, որ քաղաքացիական գործերով տուգանքը որպես սանկցիա կիրառելու անհրաժեշտություն չկա, որովհետև այս 4-ը մեծ քանակի գործերի մեջ ուղղակի ոչինչ չի ասում»,- իր ելույթում նշել է ՀՀ Փաստաբանների պալատի նախագահ Արա Զոհրաբյանը:

Ըստ Զոհրաբյանի՝  2017 թվականի դատական գործերի տվյալները դեռ չկան, բայց 2017 թվականին միայն 2 սանկցիա է կիրառվել քաղաքացիական գործերով փաստաբանի նկատմամբ: ՀՀ ՓՊ նախագահն ընդգծել է, որ այս փոփոխության պարագայում գործ ունենք ոչ թե անհրաժեշտության, այլ կամակորության հետ:

Հավելենք, որ այսօր խորհրդարանում կայացած քննարկման ժամանակ ՀՀ արդարադատության նախարար Դավիթ Հարությունյանն ասել է, որ դատական տուգանքները հանվել են Դատական օրենսգրքի նախագծից ու տեղափոխվել Դատավարական օրենսգրքի նախագիծ, այսինքն՝ առաջարկությունը մնում է ուժի մեջ, պարզապես առաջարկվում է Դատական օրենսգրքի փոխարեն այն կիրառել Դատավարական օրենսգրքով:

Փաստաբանները կարծում են, որ դատարաններն անմիջական ներգործություն չպետք է ունենան փաստաբանների նկատմամբ: Դատավորը կարող է կողմնակալություն դրսևորել, բացի այդ, փաստաբանը կարող է կաշկանդվել իր վստահորդի շահերը դատարանում պաշտպանելիս: 

Հարցին, թե ինչով էր պայմանավորված հանգամանքը, որ դատավորի կողմից փաստաբանին տուգանելու սանկցիան հանվեց Դատական օրենսգրքի օրինագծից և նույնությամբ տեղափոխվեց Դատավարական օրենսգիրք, Զոհրաբյանը պատասխանեց.

«Հանվելը հանվել է, բայց դեռ որևէ տեղ չի տարվել: Հիմա մենք ունենք երեք դատավարական օրենսգիրք՝ Վարչական դատավարության, Քաղաքացիական և Քրեական դատավարության օրենսգրքեր: Քաղաքացիական դատավարության նոր օրենքի նախագիծն առաջին ընթերցմամբ անցել է և գտնվում է ԱԺ-ում: Եթե նման միտում ունեն, որ պետք է տեղափոխեն այդ օրենսգրքերի մեջ, բնականաբար, ամենամոտ օրենսգիրքը Քաղաքացիական դատավարության օրենսգիրքն է, որը երկրորդ ընթերցման է սպասում: Մյուսները դեռ նոր պետք է գնան կառավարություն, հետո գան ԱԺ: Ամբողջ հարցն այն է, որ Դատական օրենսգրքի նախագիծը հասել է ԱԺ-ում իր ֆինիշին, բայց փաստաբանների հարցը փաստորեն հետ գնաց»:

Պալատում հիշեցրել են, որ խնդրել էին ՀՀ կառավարությանն ու ԱԺ-ին իրենց ժամանակ տալ՝ ավելի հիմնավոր փաստարկներով ներկայացնելու, որ այդ փոփոխության անհրաժեշտությունը չկա: 

«Էստեղ մեր խնդրանքի հիմքն է կորում: Մեզ ժամանակ տվեք, մեզ հետ նստեք քննարկման: Մենք ուզում ենք քննարկել և մեկս մյուսին համոզել»,- հավելել է ՓՊ նախագահը:

Հարցին՝ կառավարության հետ հանդիպում ունենալո՞ւ են, թե՞ ոչ, փաստաբանները դժվարացան պատասխանել, իսկ խորհրդարանում քննարկումն արդեն կայացել է: