Անվտանգության աշխատակիցը մանրամասներ է պատմել նախագահի թեկնածու Արմեն Սարգսյանի կյանքից

Amga հեռուստակայանին տված  հարցազրույցի  ժամանակ Հայաստանի նախագահի անվտանգության վարչության նախկին աշխատակից Արշակ Ղազարյանը, որը եղել է նախկին վարչապետ Արմեն Սարգսյանի թիկնապահը, մանրամասներ է պատմել  Արմեն Սարգսյանի  հետ իր աշխատանքային տարիների մասին։ Ղազարյանն իր հարցազրույցի ժամանակ անրադարձել է նաև այն լուրերին, որոնց համաձայն՝  նախագահի թեկնածու Արմեն Սարգսյանը ՀՀ-ից գնացել է, քանի որ խնդիրներ է ունեցել Վազգեն Սարգսյանի հետ: Ղազարյանը պատմել է, թե ինչպես ու ինչու  Սարգսյանը Հայաստանից Մեծ Բրիտանիա գնաց:

«Արմեն Սարգսյանն այդ ժամանակ, իրոք, առողջական խնդիր ուներ: Կոկորդի հետ կապված խնդիրներ կար, խնդրել էր ասել էր՝ Արշակ գիշերային հերթափոխին ովքեր որ մնում են, ասա թող կաբինետի լուսամուտները բաց թողեն, որ խոնավություն լինի, որովհետև կոկորդը չորանում էր»:

Ըստ Ղազարյանի՝ դեղերը միշտ իրենց հետ են եղել: Անգամ եթե մոռացել են վերցնել, ինքը տուն է գնացել, բերել դրանք ու տվել վարչապետին: 

«Մինչև գիշերվա 3, 4 աշխատում էինք, ծանր աշխատանքի պատճառով երևի հիվանդությունն ավելի գլուխ բարձրացրեց», – ասում է Ղազարյանն ու հավելում, որ հետո՝ 1999 թվականին, երբ հանդիպել է Արմեն Սարգսյանի հետ ու նա առողջացած է եղել, այդ ժամանակ է միայն պարզել, որ Սարգսյանը չարորակ ուռուցք է ունեցել:

Ինչ վերաբերում է Վազգեն Սարգսյանի կողմից  ծեծվելու մասին լուրերին: Ղազարյանի հիշեցմամբ՝ այդ օրերին խոսակցություններ են եղել, որ Արմեն Սարգսյանը Մեծ Բրիտանիա է փախել  իր անվտանգության աշխատակիցների հետ։

«Ասում էին, փառք Աստծո, նայեք, մենք կանք, հետո սկսեցին ասել, որ իրենց տարել են ԿԳԲ, վախեցրել են, ասել են, որ չխոսան: Այսինքն՝ ով ոնց ուզում է, մեկնաբանում է, իրեն պետքա, որ էդ բանը լինի, կամ էդ բանը խոսացվի: Արմեն Սարգսյանին ճանաչողները գիտեն, որ նա էդ մարդը չի, որ նրա հետ հնարավոր չի, որ ինչ-որ մեկն ուրիշ ձև խոսա: Ավելին ասեմ՝ Արմեն Սարգսյանի գնալուց երկու օր առաջ մենք Արմեն Սարգսյանին բերել ենք նախագահական առանձնատներ, որտեղ իրեն Վազգեն Սարգսյանն էր սպասում, երկուսով մտան առաջին նախագահի մոտ, դուրս են եկել՝ շատ ջերմ: Գնացին Վազգեն Սարգսյանի առանձնատուն, թեյ են խմել, հաջորդ օրը գնացել ենք աշխատանքի՝ նույն գրաֆիկով, իրեն էլի լավ չէր զգում,  էն մյուս օրը ինքը գնաց»:

Արամ Սարգսյան ու Վազգեն Սարգսյանը հանդիպե՞լ են Վազգեն Սարգսյանի տանը կամ առանձին՝ հարցին Ղազարյանը պատասխանել է.

«Եղել է, վերջին անգամ դա եղել է Պաշտպանության նախարարության հյուրերի ընդունելության տանը, հրավերքը եղել էր Վազգեն Սարգսյանի կողմից, ուրիշ ընտանիքներ չկային, մենք պարոն Սարգսյանի ընտանիքին բերեցինք այնտեղ, Վազգեն Սարգսյանը դիմավորեց երգով, շատ ջերմ  ընդունեց: Մեր առանձին խոսակցություններից մեկի ժամանակ էլ ես հասակացա, որ պարոն վարչապետը Հայաստանում էր Վազգեն Սարգսյանի խնդրանքով», –պատմել է Արմեն Սարգսյանի թիկնապահը:

Այն պնդմանը, որ դուք, ի վերջո, անձնական խոսակցություններին ականատես չեք եղել, Ղազարյանը պատասխանել է։

«Ականատես չենք եղել, բայց դա էն բուռն թեման էր, որ եթե եղած լիներ, մենք կզգային: Եթե դու պաշտպանում ես մարդու անվտնագությունը, նրա դեմքի միմիկաներից կզգաս, թե ինչ է եղել: Կարամ Աստվածաշնչի վրա ձեռքս դնեմ և երդվեմ», – հավելել է Ղազարյանը:

Հարցազրույցում Արշակ Ղազարյանն մի քանի անգամ ընդգծում է, որ որոշեց հարցազրույց տալ հենց պարզաբանումներ կատարելու նպատակով: Արմեն Սարգսյանի թիկնապահը հիմա թոշակի է անցել և ապրում է Լոս Անջելեսում: