Գյումրիի արվեստի բուհերում դիմորդներն այսօր հանձնել են վերջին ներբուհական քննությունները

Գյումրիի արվեստի բուհերում այսօր ավարտվել են  ներբուհական քննությունները։ Վերջին օրը Գեղարվեստի պետական ակադեմիայի Գյումրիի մասնաճյուղում դիմորդները քննություն են հանձնել  «Կոմպոզիցիա» առարկայից, իսկ Կոմիտասի անվան կոնսերվատորիայի Գյումրիի մասնաճյուղում մասնագիտական առարկաներից հետո գրավոր քննություն են հանձնել «Հարմոնիա» և «Երաժշտական տեսություն» առարկաներից։

Գեղանկարչական բաժնի դիմորդներին ներբուհական մասնագիտական քննությանը հանձնարարվել է կտավի վրա յուղաներկով նկարել  քաղաքային կամ սպորտային թեմայով  ստեղծագործական  պատկերներ։ Այստեղ գնահատվում է դիմորդների երևակայական մոտեցումն ու գույների ճիշտ ընտրությունը։ Իսկ գրաֆիկա բաժնի դիմորդները ջրաներկով աշխատանքներն էին թղթին հանձնում, թեման Հովհաննես Թումանյանի հեքիաթներն են։

Գեղանկարներն ու գծանկարներն ամբողջացնելու համար դիմորդներին հատկացվում է 6-8 ժամ։  Գեղարվեստի պետական ակադեմիայի Գյումրիի մասնաճյուղի այս տարվա դիմորդները 35-ն են, 7 մասնագիտական բաժիններից, ինչպես և նախորդ տարիներին,  ամենաշատ դիմորդ ունեցել է հագուստի մոդելավորումը։

«Մշտապես շատ թվաքանակը պահվում է հագուստի մոդելավորում  բաժնում, այստեղ  ամենաշատ դիմորդներն ենք ունենում, ցավոք, նաև ունենք  այնպիսի բաժին, որ մինչև այս պահը չունեցանք դիմորդ՝ արվեստաբանություն և արվեստի տեսություն բաժինն է»,- նշում է Գեղարվեստի ակադեմիայի Գյումրիի մասնաճյուղի տնօրեն Վահագն Ղուկասյանը։

Թեև  թափուր բաժնում սովորելն  անվճար է, բայց դիմորդներ չեն ունեցել։ Նախորդ տարվա համեմատ, այս տարի վճարովի և անվճար տեղերի բաշխվածությունը չի փոխվել, յուրաքանչյուր մասնագիտությամբ հատկացվել է մեկ կամ երկու պետպատվերով տեղ։ Հաջորդ տարի նախատեսում են ակադեմիայում բացել նոր բաժին՝ համակարգչային գրաֆիկա, որի լիցենզավորման գործընթացն արդեն սկսված է։

Իսկ Կոնսերվատորիայի Գյումրիի մասնաճյուղում, 12 պետպատվերից բացի, ևս 10 դիմորդ դիմել է  վճարովի հիմունքներով սովորելու համար։ Այսօր ներբուհական քննությամբ դիմորդները գրավոր ու թեստային քննություն էին հանձնում «Հարմոնիա» և «Արվեստի տեսություն» առարկաներից։

«Այս տարի մեզ պետության կողմից անվճար  հատկացված տեղերը 12-ն են։ Ընդհանրապես 10-ն էին, այս տարի մենք դիմեցինք նախարարություն, որովհետև ունեինք երկու կարևոր նոր գործիքներ, դա ալտ նվագարանն է և տավիղը։ Նախարարությունը ընդառաջեց, և մենք 10-ի փոխարեն ունեցանք 12 անվճար տեղ»,- նշել է Կոնսերվատորիայի Գյումրիի մասնաճյուղի տնօրեն Հասմիկ Հարությունյանը։

Դիմորդներն այս տարի  նախընտրել են գործիքային կատարողականություն, երաժշտագիտություն, երաժշտական կատարողականություն  բաժինները, իսկ  կոմպոզիցիա բաժնում  դիմորդ չի եղել։ Ըստ մասնագետների՝ կան  պահանջված  բաժիններ, որոնցում  դիմելիությունն  ամեն  տարի ակտիվ է։

«Միշտ մեծ հետաքրքրվածություն թե՛ Երևանում, թե՛ Գյումրիում  եղել են ժողգործիքների, ժողերգեցողության, ջազ-երգի բաժիններում, ցավոք, պիտի արձանագրեմ, որ ակադեմիական մասնագիտությունները, այսինքն՝ դաշնամուր, ջութակ, թավջութակ և կոնտրաբաս, դիմելիությունը գնալով քչանում է»,- նշում է Երևանի  պետական կոնսերվատորիայի  պրոռեկտոր Ծովինար Մովսիսյանը։

Կոնսերվատորիայի Գյումրիի մասնաճյուղը, Հանրապետության տարբեր մարզերից ու մայրաքաղաքից բացի, հայտեր է ստացել  արտերկրում ապրող սփյուռքահայերից։ Այդ դիմորդների քննությունները կանցկացվեն աշնանը՝ հատուկ ընթացակարգով։ Հեռակա բաժնի ընդունելությունը արվեստի բուհերում կմեկնարկի սեպտեմբերին, այդ ընթացքում  հայտեր կներկայացնեն նաև մագիստրատուրայի առկա և հեռակա բաժինների դիմորդները։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։