Երևանի քաղաքապետարանում չեն բացառում, որ նոր տրանսպորտային ծրագիրը կարող է իրականություն չդառնալ

Ինչպես հայտնի է, Երևանի քաղաքապետարանում կայացած ասուլիսի ընթացքում քաղաքապետի տեղակալ, Երևան քաղաքի հասարակական տրանսպորտի բարեփոխումների աշխատանքային խմբի ղեկավար Վահե Նիկոյանը ներկայացրել է հասարակական տրանսպորտի նոր ցանցի նախագծի հիմնական հատկանիշները և այն սկզբունքները, որոնք դրված են աշխատանքների հիմքում։

Երևանի փոխքաղաքապետը հայտարարել է, որ վարորդների թվի կրճատում չի լինելու, քանի որ աշխատելու են հերթափոխով, ավելին, հնարավոր է նույնիսկ, որ լրացուցիչ վարորդների անհրաժեշտություն առաջանա: Կրճատում լինելու է շարժակազմի հարցում:

Երևանի քաղաքապետի տեղակալն ընդգծել է, որ դա օպտիմալ լուծումների և խելացի նախագծման արդյունք է։ Հաշվարկված 939 ավտոբուսը և 111 տրոլեյբուսը բավարար են մայրաքաղաքի ուղևորների լիարժեք սպասարկումն ապահովելու համար։ Միաժամանակ, նոր ցանցով նախատեսված 42 երթուղիներն ընդգրկելու են Երևանի ողջ տարածքը։ Նոր ցանցի կարևորագույն սկզբունքներից մեկն էլ այն է, որ ուղևորները Ա կետից Բ կետ կարող են հասնել ավելի արագ, քանի որ գործելու է տրանսպորտային միջոցի ժամանման հստակ չվացուցակ և մարդիկ կարողանալու են պլանավորել իրենց երթևեկությունը։ Մեկ ուղևորության համար մարդիկ վճարելու են ընդամենը մեկ անգամ, ինչը նշանակում է, որ երկու և ավելի տրանսպորտային միջոց փոխելու հանգամանքը որևէ ազդեցություն չի ունենա տոմսի արժեքի վրա։

«Ասեմ, որ ցանցն ամենակարևոր բաղադրիչն է: Եթե մենք ցանցը վերջնականացնենք, մնացած փուլերը շատ սպասել չեն տա, այո՛, հնչեցրել ենք, որ մինչև 2018-ի տարեվերջ կունենանք առարկայական վիճակ, այսինքն՝ նույնիսկ, եթե կարողանանք ունենալ պայմանագիր, պայմանագրից մոբիլիզացիա, կարծում եմ, զուտ արտադրողի, ներկրողի գործընթացն է, և այլևս հստակեցնելու խնդիր չենք ունենա:

Ցանկալի է, իհարկե, որ մինչև տարեվերջ ունենանք ներդրված ավտոբուսները, բայց ես վստահ եմ, որ եթե մինչև տարեվերջ ունենանք ամեն ինչ հստակ՝ և՛ պայմանագրերը կնքված, և՛ ավտոբուսները ներկրված, կհամարենք, որ հաջողությամբ հասել ենք վերջնակետին»,- ասել է Երևանի փոխքաղաքապետը:

Հիշեցնենք, որ այս պահին վերջնականացման փուլում է հասարակական տրանսպորտի նոր ցանցի նախագիծը։ Դեռևս շարունակվելու են աշխատանքները բարեփոխման գործընթացի մյուս փուլերի շուրջ, որոնք վերաբերում են տոմսային համակարգին, կառավարման մոդելներին և այլ բաղադրիչներին։ Հանրությանը հուզող սակագնի հաշվարկներն էլ կատարվելու են բոլոր փուլերի ամփոփումից հետո` որպես առաջնահերթություն ունենալով սակագնի մատչելիությունը։

SHANTNEWS-ը հետաքրքրվել է Երևանի փոխքաղաքապետից, թե ինչքանով է հավանական սցենարը, ըստ որի՝ տարեվերջին կարող է հայտարարվել, որ միջոցները հայթայթված չեն, ուստի կա՛մ հետաձգվում է Երևանի նոր տրանսպորտային ցանցի իրագործումը, կա՛մ ընդհանրապես մոռանում ենք դրա մասին

«Մենք հավատում ենք այն գործին, որն իրականացնում ենք: Ես վստահեցնում եմ, և այսօրվա բոլոր նախադրյալները ցույց են տալիս, որ նմանատիպ դեպք չպետք է լինի: Բայց բացառել ոչինչ կյանքում հնարավոր չէ»,- ասել է Նիկոյանը: