Կապսի ջրամբարի և Ջրաձոր գյուղի տների կառուցման շինընկերությունների մրցույթները կավարտվեն սեպտեմբերին

Կապսի ջրամբարի կառուցումը ստրատեգիական կարևոր նշանակություն ունի մեր երկրի համար, այս տարի աշնանը նախատեսվում է սկսել ջրամբարի կառուցման աշխատանքները։ Այս մասին  SHANTNEWS.am-ի հետ զրույցում նշել է  ՀՀ Տարածքային կառավարման և ենթակառուցվածքների նախարարի տեղակալի պաշտոնակատար Վաչե Տերտերյանի հետ։

«Կապսի ջրամբարի կառուցումը  10 -ից ավելի տարի է, որ  չի մեկնարկում։ Դեռ Խորհրդային Միության տարիներին ամբարտակի  մի մասը սարքվել է, դրանք մեծ պրոյեկտներ են, հազար ու մի դժվարություններ ունեն, հիմա հարց եք տալիս՝ իրատեսական է կառուցումը, թե իրատեսական չէ։ Հիմա մրցութային փուլում ենք և հույս ունենք, որ սեպտեմբերին երկրորդ փուլը կբացենք էդ մրցույթի, եթե հաջող գնաց մրցութային գործընթացը, մենք սեպտեմբերին կունենանք արդեն ընկերություն, որը շահել է մրցույթը։ Կարծում ենք, որ իրատեսական է, ընկերությունը որ եղավ, ուրեմն շինարարությունը կսկսենք»,-ասել  է Վաչե Տերտերյանը։

Ըստ փոխնախարարի տեղակալի պաշտոնակատարի, ջրային ռեսուրսները խնայելու և ռազմավարական նշանակությունից բացի,Կապսի ջրամբարը  կառուցումից հետո կարող է դառնալ  Շիրակի մարզի հյուսիսային տարածաշրջանի համար տուրիստական մեծ հոսք ապահովող գլխավոր գործոններից մեկը։

«Երեկ Ամասիայում էի, մի նոր հայացքով նայում էի Կապսի ջրամբարի տեղը, ֆանտաստիկ էֆեկտ է ունենալու մարզի համար։ Պատկերացնում եք, բացի այն, որ ինքը իռիգացիոն ոռոգման ջրի կառավարման  ու ստրատեգիական ջրի կառավարման խորքային խնդիր ունի, ջրամբարը էս մարզի համար ֆանտաստիկ ռեկրեացիոն գոտի է լինելու։ Գյումրիից ներքևի ճանապարհով  կգնաք Կապս  ու կհայտնվեք լճի մի մեծ հայելու կողքին, որտեղ կան լավ գյուղեր, շեն գյուղեր, դա տեսնելու և վայելելու համար շատերը կգան Շիրակի մարզ»,- հավելել է Վաչե Տերետերյանը։

Ըստ նրա, այս ընթացքում իրականացվում են նաև Ջրաձոր գյուղի նոր տարածքի նախագծման աշխատանքները, որտեղ կկառուցվեն  ներկայիս գյուղից  տեղափոխված ընտանիքների համար բնակարաններ ու անհրաժեշտ ենթակառուցվածքներ։

«Ջրաձորի տեղահանման  նախագիծ կազմելու մրցույթն էլ է հիմա իրականացվում։ Գյուղի մոտակայքում,ճանապարհի աջ կողմը, լանջի մի տարածք կա, նախատեսել ենք  նոր գյուղը այդտեղ կառուցենք՝ բնակիչների ցանկությամբ։ Լրիվ նոր գյուղ է  հիմնվելու, բնակիչները տեղափոխվելու են այնտեղ, բոլորի պատշգամբները կամ բակերը նայելու են դեպի ջրամբար ։Բնակիչները մանրամասն տեղեկացված են գործընթացից, բարեխիղճ աշխատանք է կատարվել։ Ծառ, թուփ, դեկորատիվ ծառ․․․Ինչ որ հնարավոր է հաշվարկվել է, փոխհատուցվելու է և փոխհատուցումների մասով խնդիրներ չեն լինելու»,- նշել է նախարարի տեղակալի պաշտոնակատարը։