ԱՀԿ-ն կոչ է անում կորոնավիրուսային սահմանափակումները արագ չվերացնել

Համավարակը դեռ չի ավարտվել. անցյալ ամառվա սխալները՝ կորոնավիրուսի սահմանափակումների արագ վերացման հետ կապված, չեն կարող կրկնվել: Այս մասին ասվում է Առողջապահության համաշխարհային կազմակերպության (ԱՀԿ) Եվրոպայի տարածաշրջանային գրասենյակի տնօրեն Հանս Կլյուգեի մեկնաբանություններում, որոնք տրամադրել է ТАСС-ը:

«Թեպետ ամառը եկել է, համավարակն ավարտված չէ: Համավարակային իրավիճակից հոգնածությունը վնաս է հասցրել մեր հավաքական հոգեկան առողջությանը, և բնական է, որ մարդիկ ցանկանում են հանգստանալ բոլորի համար այդքան ծանր ժամանակաշրջանից հետո: Անցյալ ամառ արդեն մենք այդ վիճակում հայտնվել ենք: Երբ սահմանափակումները շատ արագ վերացվեցին, մենք տարածաշրջանում բախվեցինք նոր դեպքերի և մահերի աղետալի աճի, ինչը մեզ ստիպեց վերադառնալ լոքդաուններին»,- ասել է նա:

«Անցել է մեկ տարի, որի ընթացքում մեր առողջապահական համակարգերը, կրթությունը, տնային տնտեսությունները, տնտեսությունը, ֆիզիկական և հոգեկան առողջությունը դիմագրավել են հսկայական բեռի, և այսօր մենք չենք կարող թույլ տալ նույն սխալը»,- ընդգծել է Կլյուգեն:

Եվրոպայում պատվաստումները բուռն ընթացքի մեջ են, հասարակության նախազգուշական միջոցները թուլացել են, բայց տարածաշրջանի բնակչության մեծ մասը մնում է չպատվաստված, ինչը հանգեցնում է վիրուսի ավելի հեշտությամբ փոխանցվող տարբերակների տարածմանը: «Այնտեղ, որտեղ պատվաստումների մակարդակը ցածր է, հատկապես ամենախոցելի բնակչության շրջանում, արդյունքը հոսպիտալացումների ավելացումն է, առողջապահական համակարգի գերբեռնվածությունը և կորցրած կյանքերը»,- ասել է ԱՀԿ ներկայացուցիչը:

Անդրադառնալով պատվաստումների տեմպերին՝ նա նշել է, որ եվրոպական տարածաշրջանի բնակչության մեկ երրորդից պակասն է, որտեղ ԱՀԿ-ն ընդգրկում է Ռուսաստանը, ամբողջովին պատվաստված կորոնավիրուսի դեմ:

«Ներկայումս Եվրոպական տարածաշրջանում բնակչության 41%-ը ստացել է պատվաստանյութի մեկ դեղաչափ և 29%-ն ամբողջությամբ պատվաստված է: Տվյալները հստակ ցույց են տալիս, որ համավարակն ավարտված չէ: Դա վերաբերում է նույնիսկ այն երկրներին, որոնք պատվաստումների բարձր մակարդակ են ունեցել: Մեր ամենամեծ խնդիրները շարունակում են մնալ տարածաշրջանում պատվաստումներին հասնելու անհավասարությունը»,- ասել է նա:

Ինչ վերաբերում է սպորտային և մշակութային միջոցառումներին, ապա, Կլյուգեի խոսքերով, կարևոր է թույլ չտալ, որ խոշոր սպորտային և մշակութային իրադարձությունները դառնան կորոնավիրուսային վարակի «գերտարածողներ»:

«Անհրաժեշտ է կանխել իրավիճակները, երբ սպորտային մեծ իրադարձությունները և փառատոները դառնում են վարակի «գերտարածող», այսինքն՝ անհրաժեշտ է սանիտարական և սոցիալական միջոցներն ուժեղացնել նման միջոցառումների ժամանակ»,- ասել է նա:

ԱՀԿ խոսնակը հիշեցրել է, որ «պատվաստանյութերն արդեն ազդում են և խոստումնալից հեռանկարներ ունեն հոսպիտալացման, մահվան դեպքերի և առողջապահական համակարգերի բեռի կրճատման համար»: «Այնուամենայնիվ, վարակման առավելագույն ռիսկի ենթակա մարդկանց համար, որոնցից շատերը դեռ սպասում են պատվաստանյութի առաջին չափաբաժնին, պատվաստանյութերի միլիոնավոր չափաբաժիններ են պահանջվում»,- շեշտել է Կլյուգեն: