Ոռոգման ջրի սակավությունից և երաշտից տուժած Շիրակի մարզի գյուղացիական տնտեսությունները սպասում են վնասների գնահատման ամփոփմանը

Ախուրյանի տարածաշրջանի գյուղացիական հարյուրավոր տնտեսություններ սպասում են համայնքային ու միջգերատեսչական հանձնաժողովների վնասի գնահատման արդյունքների վերջնական  ամփոփմանը, որից հետո պարզ կդառնա՝  արդյո՞ք տուժած տնտեսությունների համար  փոխհատուցման կամ աջակցության ծրագրեր կմշակվեն։ Հազարավոր հեկտար ցանքատարածքները վնասվել են ոռոգման ջրի սակավության և դրան  հաջորդած  երաշտային պայմանների պատճառով։

3-4 անգամի  փոխարեն մինչև հիմա դաշտերը մեկ անգամ են ոռոգել, վեգետացիային բնորոշ աճը  դադարել է: Այգաբացում և հարակից գյուղերում  ևս 7 հեկտար կարտոֆիլի ցանքեր ունեցող գյուղատնտեսը  չորացած  բույսը ջրելու անհրաժեշտությունն այլևս չի տեսնում, միևնույն է՝ բույսը փրկել հնարավոր չէ:

«Կարտոֆիլն արդեն թոռոմած վիճակում է, էստեղից եկամուտ ակնկալել  հնարավոր չէ․․․ Իմաստ չեմ տեսնի քանդելու, նորից ծախս անելու, աշխատողներին փող տալու, ավելի լավ է տուժել ենք, էլի չտուժենք»,- դժգոհում է գյուղատնտես Արթուր Սանոսյանը։

Միայն Այգաբացում կարտոֆիլի 60 հեկտար ցանքերից 30 հեկտարի բերքը վնասվել է ոռոգման ջրի բացակայության պատճառով, իսկ աշնանացան ցորենն ու գարնանացան գարին չորացել են երաշտի ու ուժեղ քամիների պատճառով: Չորային եղանակների պատճառով  որոշ դաշտերում հիմնականում գարու և  վարսակի հասկերը կարճ են մնացել, կոմբայնը քաղել չի կարող։ Գյուղացիները եղած բերքը ստիպված թողել են դաշտերում:

«Այս տարվա ահավոր երաշտի պատճառով գարնանացան գարին ընդհանրապես քաղելու ենթակա չէ՝ 250 հեկտարը, իսկ 400 հեկտար էլ աշնանացան ցորեն ունենք, միջինը՝ լավագույն  դեպքում, 5-10 ցենտներ բերք է ստացվում, իսկ վարսակը 50 հեկտար ունենք, ընդհանրապես չի քաղվել»,- նշում է Այգաբաց գյուղի վարչական ղեկավար Սասուն Վանեցյանը։

Դաշտերի բերքին հասցված վնասների մոտավոր գույքագրում կատարել են համայնքի գյուղբաժնի մասնագետները։ Նրանցից էլ պահանջել են վնասների հաշվարկները ներկայացնել մարզպետարան, այստեղից էլ թվերն ու տվյալները հասցնելու են միջգերատեսչական հանձնաժողովին։ Իսկ թե միջգերատեսչականից մասնագետներ երբ կամ արդյոք գալու են գյուղ, համայնքի բնակիչներին բան չեն ասել։

«Մեր՝ Ախուրյան խոշորացված համայնքի տեղի հանձնաժողովը եկել է, ուսումնասիրել, հիմա էդ փուլում է, ճշգրտում ենք անվանական մարդկանց տվյալները՝ ով ինչ վնաս է կրել, որպեսզի արձանագրությունները ներկայացնենք մարզպետարան, իսկ իրենք էլ ներկայացնեն  միջգերատեսչական հանձնաժողովին»,- նշում է վարչական ղեկավարը։

Այգաբացում այս տարի գյուղացիական տնտեսություններից շատերն են իրենց ցանքատարածքները ապահովագրել, բայց ապահովագրական ընկերությունների պայմանագրերով երաշտի դեպքում փոխհատուցում նախատեսված չէ: Վնասներ կրած համայնքները դեռ սպասելու են, թե հանձնաժողովներում ինչ եզրակացություն կարվի և դեռ սպասելու են աշնան բերքահավաքին ու խոտհունձին։ Երաշտի պատճառով այս տարի մարզում նաև անասնակերի դեֆիցիտ է։ Տասնյակ համայնքների խոտհարքներում և անգամ ցանովի բազմամյա ցանքերում անասնակեր չկա, 3 հեկտար խոտհարքից հողատերը ստացել է 11 հակ խոտ։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։