Շիրակ գյուղում հիմնանորոգվում է 1,5 կմ կենսական նշանակության ճանապարհ

Համաշխարհային բանկի «Կենսական նշանակության ճանապարհներ» ծրագրի  առաջնահերթություններից  է համայնքային ու միջհամայնքային ճանապարհների նորոգումը, որով ապահովվում է տրանսպորտային կապը ոչ միայն հարևան համայնքների, նաև քաղաքի միջև։ Այս տարվա ծրագրում է Շիրակ գյուղի ճանապարհը։ Հիմնանորոգվող հատվածը մոտ 1,5 կիլոմետր է, որը նաև գյուղի դպրոց տանող ճանապարհն է։

Մոտ 300 տնտեսություն ունեցող Շիրակ գյուղում մեքենաների անցուդարձը հողային հիմքով գրունտային ճանապարհներով է: Գյուղում երբեմն փոսալցման ու հարթեցման աշխատանքներ կատարվել են, բայց ուժեղ անձրևներից հետո սելավաջրերի հոսքը  քշել-տարել է ավազակոպչային հիմքը։

Իջվածքներով, թեքություններով ու խորդուբորդ ճանապարհի  հիմքերը շինարարներն արդեն ամրացրել են, ծանր տեխնիկայի օգնությամբ կկատարվեն  հիմնային շերտի խտացման, հետո ասֆալտապատման  աշխատանքներ: 6-10 մետր լայնության  ճանապարհի աջակողմյան  հատվածում առաջին անգամ գյուղի համար կառուցվում է բետոնե  սալերով  բաց  ջրատար  համակարգ, որը  ցածրադիր հատվածի տները  կպաշտպանի հեղեղումներից:

Նոր կառուցվող ճանապարհը կունենա նաև  գյուղտեխնիկայի համար նախատեսված հատուկ անցատեղեր: Կոմբայնները, թրթուրավոր ու ծանր տեխնիկան դաշտ հասցնելու համար  կկառուցվի նաև այլընտրանքային  ճանապարհ:

«Գյուղտեխնիկայի  համար նախատեսվում է  կառուցել բետոնից հատվածներ, որոնք կունենան ամրաններով ու երկաթե ցանցերով  պատված ներքին շերտ։ Մենք Շիրակ գյուղում նախատեսել ենք տեխնիկայի համար կառուցել այդպիսի մեկ անցուղի, իսկ  Կամո գյուղում կառուցվում է վեցը»,- նշում է  «Մերձմոսկովյան» ԲԲԸ աշխղեկ Արթուր Մարդոյանը։

Գյուղի սկզբնամասում գտնվող բետոնե սալերից կառուցված կամրջի հիմնանորոգում նախատեսված չի եղել: Ուսումնասիրությունից հետո նախագծային փոփոխությունների անհրաժեշտություն է առաջ եկել։ Նախագծողներն այժմ փոփոխությունների են գնում ։

«Կամուրջի պատճառով կարող են ձգձգումներ լինեն, որովհետև էս պահին «Սալվինազ» ջրանցքն է այդ հատվածով անցնում, որը հասցնում է ոռոգման ջուրը մինչև Ազատան։ Էս պահին խնդիր կա, մինչև ջուրը չփակվի, չեն կարող շինաշխատանքներ իրականացնել։ Դիմել ենք, ասել են, որ էս պահին ոռոգման սեզոն է և ամենաքիչը 10 օր հնարավոր չէ ջուրը դադարեցնել։ Մինչև ջրանցքի ջուրը չդատարկվի, հիմնանորոգման աշխատանքներ կատարել հնարավոր չէ»,- նշել է Շիրակ գյուղի վարչական ղեկավար Համլետ Ասատրյանը։

Կամրջի հիմնանորոգումը նախագծում հայտնվելու դեպքում շինարարության ժամկետների փոփոխություն կկատարվի: Այս պահին կամուրջը քանդել չի թույլատրվում, շինարարները ստիպված են մոտ երկու շաբաթ սպասել: Աշխատանքներում արդեն  հավելյալ  աշխատուժ է ներգրավել։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։