Սպիտակ կտավի և սև թելերի համադրությամբ ասեղնանկարներ․գյումրեցի Մարի Մկրտչյանի  նորաոճ արվեստի մասին

Սպիտակ կտավն ու միայն սև թելերի ասեղնակարը հմուտ վարպետի ձեռքում կարող են վերածվել դիմանկարների և հայտնի դեմքերին նկարագրել ավելի քան բնական։ Գյումրեցի Մարի Մկրտչյանի ասեղնանկարներն այնքան բնական են, որ  չեն տարբերվում իրական լուսանկարներից: Նկարչական կրթություն չունենալով՝ իր նոր և ուրույն արվեստն է ստեղծել։ Ասեղնանկարի  բարդ  տեխնոլոգիայի միջոցով Մարին  մարդկանց է  փոխանցում կերպարների բնականությունն ու  դիմախաղը։

Հայ մեծերի ու հայտնի մարդկանց  դիմանկարների շարքը  կտավի և հասարակ սև թելի համադրությամբ է: Սա Մարի Մկրտչյանի ստեղծած ինքնատիպ արվեստն է: Այս ոճում ամենակարևորը ստվերային  թելագծերի միջոցով ճիշտ դիմագծերի ստացումն է:

«Այստեղ շատ կարևոր է  հայացք ստանալը և ստվերացումը, որը ես ստանում եմ բարակ և հաստ թելերի համադրությամբ։ Հարթ տարածության վրա քիթ, բերան, հայացք ստանալը վրձինով ու մատիտով հեշտ է, բայց թելերով ահավոր բարդ է»,- իր աշխատանքների ստեղծման բարդություններն է ներկայացրել Մարի Մկրտչյանը։

Ասեղի ու թելի միջոցով Մարին հմտորեն արտացոլում  է դեմքի ու աչքերի արտահայտությունները։ Ձեռքերի հմուտ շարժումների շնորհիվ  Մարիի ստեղծած ասեղնանկարները չեն տարբերվում մատիտով գծանկարներից: Ինքնատիպ այս ոճը միայն նրա ստեղծագործ մտքին են պատկանում, գծապատկերներով, հազարավոր  սև թելերով  խոսուն կերպարներ ստանալու տեխնիկան մտածել է ինքնուրույն:

Միայն սև ու սպիտակի համադրությամբ չէ, որ ասեղնանկարներով պատկերներ է ստանում։ Գույնն ու թելը  կտավին հանձնելով ստանում է բնության տեսարաններ: Ձեռքի հպումով միայն կարելի է հասկանալ , որ  շրջանակի մեջ դրված բնության պատկերները  յուղաներկով կամ ջրաներկով չեն արված, այլ սովորական գույնզգույն թելերով։ Կտորների և գույնզգույն թելերի աշխարհում մեծացած աղջիկն արդեն հասուն տարիքում գտել է  կտավներ ստեղծելու  իր ձեռագիրը:

«Ես ստեղծագործում եմ ինքնուրույն, գույներ եմ ստանում տարբեր  թելերից, ոնց որ նկարիչը նկարում է վրձինով իրա ներկերի օգնությամբ, ես դա անում եմ ասեղի ու թելի միջոցով։ Սա իմ ոճն է՝ սպիտակ կտավի վրա սև թելերով նկարելը։ Որ մարդիկ գալիս և նայում են, հետո են հասկանում, որ  թելերից են աշխատանքները, մտածում են, որ ուղղակի սև մատիտ է ու սպիտակ կտավ»,- նշում է գյումրեցի ստեղծագործողը։

Ասեղի նուրբ ու դժվար աշխատանքի միջոցով Մարին  կտավի վրա վերարտադրում է Հայաստանի  քաղաքների ճարտարապետությունը։ Բծախնդիր բնավորությունն օգնել է այս արվեստում հաջողությունների հասնել։ Իսկ թերություններն ու առավելությունները բացահայտելու գործում իր խորհրդականը  հայելին է դառնում ։

«Ես, երբ որ աշխատում եմ, իմ կողքը հայելի եմ դնում, մեծ հայելի։ Եթե ինչ որ մի բան էն չեմ անում, մի փոքր աշխատանքս ինձ դուր չի գալիս, հայելու միջոցով նայում եմ, ոնց որ կողքի մարդը կնայի, այդպես եմ իմ աշխատանքներն անում, սա էլ մի փոքր գաղտնիք»,- ասում է Մարի Մկրտչյանը։

Մարիի աշխատանքները երբեք չեն կրկնվում, դրանք յուրօրինակ են ու բնօրինակ, ստեղծվում են միայն մեկ անգամ: Թելն ու ասեղը շատ փոքր տարիքից են նրան գրավել, ստեղծագործ մտքերը կտավին հանձնել է նկարչական շնորհ չունենալով, բայց կարևորը  մարդկանց  բնութագրել կարողանում է սև ու սպիտակի համադրությամբ։ Մարին  ստեղծել է իր ապրանքանիշն ու ներկայացնում է քաղաքի հյուրերին: Տարբեր երկներում նաև բազմաթիվ մրցույթների է մասնակցել, իր ստեղծած կտավները արժանացել են մրցանակների։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։