Առանց լիցենզավորված կազմակերպության վկայագրի գազաբալոնով աշխատող ավտոմեքենաների շահագործումը կդադարեցվի

Օգոստոսի 16-ից գազաբալոնով շահագործվող մեքենաների վարորդները պետք է 6 ամսվա ընթացքում դիմեն լիցենզավորված կազմակերպություններին իրենց տվյալներն էլեկտրոնային շտեմարան մուտքագրելու և գազաբալոնների վկայագրում իրականացնելու համար: Ներդրված նոր կարգը կգործի համաձայն «Ավտոմոբիլային  տրանսպորտի մասին օրենքում» կատարված լրացումների, ըստ որի՝ սեղմված բնական կամ հեղուկացված նավթային գազով աշխատելու համար ավտոտրանսպորտային միջոցներում տեղադրվող գազաբալոնային սարքավորումները պետք է պարբերաբար ենթարկվեն փորձաքննության, որից հետո միայն կթույլատրվի մարդատար, բեռնատար և ուղևորատար փոխադրամիջոցների շահագործումը:

Այսօր շահագործվող տրանսպորտային միջոցների 85 տոկոսն աշխատում է գազով: Մետաղե կամ մետաղապլաստե գազաբալոնների պիտանելիության ժամկետը 15 տարի է, բայց, ըստ մասնագետների, պարբերաբար լիցքավորման ընթացքում բալոնի  մետաղե շերտերը ենթարկվում  են լայնացման:

Բարձր ճնշման  դեպքում՝ քայքայված պատերով գազաբալոններում պայթյունի վտանգը մեծ է, 2-3 տարի պարբերականությամբ գազաբալոնները պետք է ենթարկվեն փորձաքննության: Փորձաքննությունը գազաբալոնների անվտանգ շահագործման երաշխիք է, բայց պարտադրանք չկա, դրա համար էլ  վարորդների  մեծ մասը  շահագործվող  գազաբալոնները  ճնշափորձարկման  չեն ենթարկում կամ ինքնուրույն են տեղադրում:

«Ավտոմոբիլային տրանսպորտի մասին օրենքում» կատարված  փոփոխությամբ, այսուհետ գազաբալոնային համակարգերով աշխատող բոլոր տրանսպորտային միջոցները պարտադիր պետք է պարբերաբար ենթարկեն  փորձաքննության, իսկ դրանց շահագործման ու տեղադրման  համար ունենան լիցենզավորված ընկերությունների կողմից տրամադրած վկայագիր: Փոփոխվել են նաև ավտոբուսների գազաբալոնային համակարգով շահագործման կանոնները: Մեքենայի սրահում բալոնների տեղադրումն արգելվում է:

«Գազաբալոնային համակարգերը տեղադրելու են ավտոբուսների տանիքին և պետք է լինի արևի ճառագայթներից, ձյան և անձրևի տեղումներից պաշտպանված, պետք է համապատասխան պատյան ունենա, միևնույն ժամանակ՝ գազաբալոնային փականները պետք է ունենան հասանելիություն։ Այս կարգը խախտելու դեպքում 2022 թվականի փետրվարի 16 -ից սկսած  կիրառվելու են նաև պատասխանատվության միջոցներ»,- Shantnews.am-ին պարզաբանումներ է տվել ՀՀ տեխնիկական և հրդեհային անվտանգության տեսչական մարմնի  ղեկավարի տեղակալ Արտուշ Գրիգորյանը։

Վարորդներին վկայագրերի տրամադրման գործընթացը սկսվում է այսօրվանից: Նախ՝  լիցենզավորված կազմակերպությունները մեքենաները և գազաբալոնները փորձաքննության են ենթարկելու: Բոլոր պահանջներին համապատասխանելուց հետո միայն վարորդները կստանան վկայագիր, որը իրավունք կտա մեքենան շահագործել գազաբալոնով:

«Գազաբալոնային համակարգեր  տեղադրող կազմակերպություն այցելելուց հետո, եթե պարզվեց, որ իրենց գործող համակարգը չի համապատասխանում սահմանված կարգին, արտադրման տարեթիվը  ընթեռնելի չէ կամ բալոնի շահագործման ժամկետն ավարտվել է, ճնշափորձարկումներ և այլ փորձարկումներ իրականացնելուց հետո պարզվում է, որ  տվյալ ավտոմեքենան ենթակա չէ վկայագրման, ապա տվյալ կազմակերպությունը չպետք է վկայագիր տրամադրի, այլ  տվյալ դեպքում  գազաբալոնը պետք է համարվի խոտանված»,- նշել է Արտուշ Գրիգորյանը։

Վկայագիր չունեցող կամ չփորձաքննված գազաբալոնով  ավտոմեքենաները կզրկվեն նաև լցակայաններում սպասարկվելու իրավունքից: Պարզ ասած՝ լցակայանները չպետք է սպասարկեն այդ մեքենաները: Նոր կարգը պատասխանատվություն և տուգանքի չափ է սահմանել նաև լցակայանների համար:

«Գազալցակայաններում տրանսպորտային միջոցը լցավորելուց առաջ աշխատակիցը պարտադիր պետք է ստուգի տվյալ ավտոմեքենայի տվյալները  էլեկտրոնային շտեմարանում։ Եթե բացակայում է տվյալ տրանսպորտային միջոցի  մասին տեղեկատվությունը, ապա աշխատակիցը չպետք է լցավորի ավտոմեքենան։ Դա նշանակում է, որ ավտոմեքենան համապատասխան վկայագիր չի ստացել լիցենզավորված կազմակերպությունից, իսկ տեսչական մարմինը իրականացնելու է վերահսկողական գործընթացները»,- նշել է տեսչական մարմնի ղեկավարի տեղակալը։

Վարորդներն այսօրվանից սկսած 6 ամիս ժամանակ ունեն իրենց գազաբալոնները ստուգելու և համապատասխան փաստաթուղթը ստանալու համար: 2022-ի փետրվարից արդեն առանց վկայագրերի գազով աշխատող տրանսպորտային միջոցների շահագործումը չի թույլատրվի: Ըստ տեխնիկական և հրդեհային  անվտանգության տեսչական մարմնի ղեկավարի տեղակալի, Հանրապետությունում գազաբալոնային համակարգեր տեղադրող և փորձաքննող լիցենզավորված կազմակերպությունների քանակը բավարար է: Այս ընթացքում նոր կազմակերպություններ, անհատներ  ևս դիմել են հավաստագիր ստանալու և այս գործընթացն իրականացնելու համար: