400 հազար գազաբալոնների 2 տոկոսն է միայն փորձարկվում

Ինչպես արդեն հաղորդել ենք, 2017 թվականին ընդամենը 3400 գազաբալոն է փորձարկվել, որից 337-ը խոտանվել է: Հիշեցնենք, որ ավտոմեքենաների վրա տեղադրված գազաբալոնների թիվը գերազանցում է 400 հազարը, այսինքն՝ ընդհանուրի անգամ 2 տոկոսը փորձարկում չի անցնում: Բայց այստեղ նաև այլ խնդիր կա՝ ինչպե՞ս են կատարվում այդ փորձարկումները, արդյո՞ք կարելի է  վստահել դրանց պատասխաններին կամ որքանո՞վ համոզված լինել, որ փորձարկված բալոնը չի պայթի:

«Առաջ մեզ հրավիրում էին տեսնելու, թե ինչպես է դա արվում, բայց 3-4 տարի է՝ չեն հրավիրում»,  այսօր կայացած ասուլիսի ժամանակ ասել է «Սպառողների խորհրդատվական կենտրոն» ՀԿ-ի նախագահ Կարեն Չիլինգարյանը՝ հավելելով, որ փորձարկումներից մեկից հետո իր մոտ կասկած է առաջացել.

«Մի 4- 5 տարի առաջ էր գնացել էինք մի էդպիսի կառույց, ես հարց տվեցի տնօրենին, հարցրի, թե ինչքան է տևում գազաբալոնի փորձարկումը: Գիտեք, որ գազաբալոնը պետք է ապամոնտաժվի մեքենայի մեջից, գազը դատարկվի, դրվի ստենդի վրա, էնտեղ ջուր են լցնում, ճնշում են տալիս, խցիկ են մեջը մտցնում, վիզուալ ստուգում են՝ ներսում խախտումներ կա՞ն, թե՞ չկան: Ասացի՝ ինչքա՞ն է դա տևում, դե, ասում է՝ 1.5-2 ժամ կտևի: Արդեն զգացվեց, որ դա ձևական բնույթ է կրում»:

Ըստ «Սպառողների խորհրդատվական կենտրոն» ՀԿ-ի նախագահի՝ ինքը շատ է լսել այնպիսի դեպքերի մասին, երբ վարորդները գնում են, գումարը տալիս ու առանց փորձաքննություն անցնելու գազաբալոնի համար վկայագիր ստանում: Հենց դրա համար էլ պայթյունների թիվը տարեցտարի ավելանում է:

«Էքսպերտ թեչ» գազաբալոնային սարքավորման փորձարկման, տեղակայման և սերտիֆիկացման ընկերության տնօրեն Մկրտիչ Տիգրանյանն էլ իր հերթին նշել է, թե իր լաբորատորիայում 1 գազաբալոնի փորձարկումը տևում է միջինը 1 ժամ կամ 1 ժամ 10 րոպե.

«Որ ասել են՝ 2 ժամում են փորձարկում, պարոն Չիլինգարյան, կարող է ստենդների հարց է: Իմը գործարանային ստենդ է և նորմալ է»,- հավելել է նա:

 Ի դեպ, մեկ գազաբալոնի փորձարկման արժեքը կազմում է 10-15.000 դրամ: Ըստ N 2388 որոշման՝ գազաբալոնները պետք է փորձաքննություն անցնեն 2 տարին մեկ անգամ: 

«Եթե ՃՈ-ի վրա կոնկրետ հանձնարարական չլինի, որ ստուգեն, այս պատկերը շարունակվելու է»,- ասել է Մկրտիչ Տիգրանյանը՝ հավելելով, որ անհրաժեշտ է համարում, որ ՃՈ-ն տեխանձնագրերի նման ստուգի նաև գազաբալոնի վկայագրի առկայությունը և չունենալու պարագայում վարորդին տուգանի:

«Որովհետև լծակ սրա համար չկա: Պետք է վարչական իրավախախտումների մասին օրենքում ավելացվի նման տույժ: Ամբողջ աշխարհում դա ընդունված է: Սա անվտանգության խնդիր է, ավելի շատ հասարակական բնույթ է կրում: Աստված չանի, երբ դեպքը պատահում է, 25-30 մետր շառավղով ավերածություն է լինում»,- ասել է Տիգրանյանը: