Հայաստանը կմնա ՌԴ-ի մոտ դաշնակիցը, սակայն կզարգացնի հարաբերությունները ՆԱՏՕ-ի հետ․ Փաշինյանի հարցազրույցը Euronews-ին

Հայաստանը կմնա Ռուսաստանի մոտ դաշնակիցը, ՀԱՊԿ անդամը, սակայն կզարգացնի հարաբերությունները ՆԱՏՕ-ի հետ։ Իր արտաքին և ներքին քաղաքական նպատակների մասին Euronews-ի թղթակից Անդրեյ Բեկետովի հետ հարցազրույցում հայտնել է ՀՀ վարչապետ Նիկոլ Փաշինյանը։

«Ինչպես գիտեք՝ Հայաստանը ՆԱՏՕ-ի գործընկեր երկիրն է։ Մենք մասնակցում ենք ՆԱՏՕ-ի երկու առաքելությունների՝ Կոսովոյում և Աֆղանստանում։ Դա մեզ տալիս է միջազգային անվտանգության ապահովմանը մասնակցելու հնարավորություն։ Սակայն մենք Հավաքական անվտանգության պայմանագրի կազմակերպության անդամ ենք, և մենք ընդհանուր առմամբ տեսնում ենք Հայաստանն այդ կազմակերպությունում և անվտանգության այդ համակարգում»,- ասել է Փաշինյանը։

«Մենք կմնանք Ռուսաստանի մոտ դաշնակիցը։ Մենք հույս ունենք զարգացնել մեր հարաբերությունները Ռուսաստանի հետ, ինչպես նաև ՆԱՏՕ-ի և արևմտյան երկրների, ԵՄ-ի ու ԱՄՆ-ի հետ։ Մենք չենք պատրաստվում շրջադարձ կատարել մեր արտաքին քաղաքականությունում»,- ասել է Փաշինյանը՝ պատասխանելով հարցին, թե Հայաստանը պատրաստվո՞ւմ է արդյոք մնալ Ռուսաստանի հավատարիմ դաշնակիցը, թե՞ կմերձենա ՆԱՏՕ-ի հետ։

Հարցին, թե Փաշինյանը համարո՞ւմ է, որ ՆԱՏՕ-ն կարող է օգնել Հայասանին ԼՂ հակամարտության կարգավորման գործում, վարչապետը պատասխանել է․

«Այդ հակամատությունը պետք է լուծվի բացառապես խաղաղ ճանապարհով։ Ցավոք, վարչապետի պաշտոնում ընտրվելու առաջին օրերից ես տեսնում եմ, որ Ադրբեջանը մեծացնում է իր ագրեսիվությունը Հայաստանի նկատմամբ։ Ըստ իս՝ այժմ մենք տեսնում ենք, որ իրավիճակը փոխվում է, քանի որ այդ ագրեսիվ քաղաքականությունն ուղղված է ոչ միայն Հայաստանի, այլև ժողովրդավարության դեմ, չէ՞ որ այժմ Հայաստանն իսկապես ժողովրդավարական երկիր է։ Եվ ես կարծում եմ, որ Ադրբեջանի ղեկավարությունը մտավախություն ունի, որ իր սեփական ժողովուրդը, ոգևորվելով հայկական գոծընթացներից, Ադրբեջանում ժողովրդավարական փոփոխություններ կսկսի։ Շատ օգտակար կլինի, եթե ՆԱՏՕ-ն Ադրբեջանին ուժեղ ազդանշան ուղարկի, որ ԼՂ հակամարտությունն ուժի կիրառմամբ լուծելու ցանկացած փորձ միջազգային հանրության կողմից խիստ արձագանքի կհանդիպի»։

Թղթակցի հարցին, թե ի՞նչ տեղի կունենա, եթե բոլոր կոռուպցիոներները հայտնվեն բանտում, Փաշինյանը պատասխանել է․ «Մեզ համար շատ կարևոր է կոռուպցիայի դեմ պայքարելը, սակայն շատ կարևոր է դա օրենքի շրջանակում և մարդու իրավունքների պահպանմամբ անելը։ Ես Հայաստանում եղել եմ քաղբանտարկյալ, և ինձ համար մեծ նվաստացում կլինի, եթե Հայաստանում մեզ մոտ հայտնվեն նոր քաղբանտարկյալներ»։

Անդրադառնալով բարեփոխումներին՝ Փաշինյանը նշել է, որ մեզ հաջողվել է հասնել տնտեսական մեծ փոփոխությունների։ «Մենք հավասար պայմաններ ենք ստեղծել բոլոր տնտեսվարողների համար։ Մենք հույս ունենք հայկական տնտեսությունը դարձնել առավել գրավիչ օտարերկրյա ներդրումների համար։ Մենք կամրապնդենք հայկական ժողովրդավարությունը մեր միջազգային գործընկերների օգնությամբ կամ առանց դրա»։