«Անկախ դիտորդ»-ն ամփոփել է Գյումրիի, Սյունիքի և Տավուշի մարզերի ՏԻՄ ընտրություններին 118 տեղամասերում դիտարկման արդյունքները

ՏԻՄ ընտրություններին Գյումրի քաղաքում, Սյունիքի և Տավուշի մարզերում դիտորդական առաքելություն իրականացրած «Անկախ դիտորդ» հասարակական դաշինքի համակարգողներն այսօր Գյումրիում հրավիրած ասուլիսին ներկայացրել են  ընտրության գործընթացում դիտորդական  խմբերի արձանագրած ընտրախախտումների ամփոփ տվյալները։

Ըստ համակարգողների՝ Գորիս, Տեղ և Դիլիջան համայնքների համեմատ՝ Գյումրիում ընտրական գործընթացն ավելի հանգիստ ընթացք է ունեցել, ընտրության արդյունքների վրա էական ազդեցություն ունեցող զանգվածային խախտումներ չեն արձանագրվել։

«Անկախ դիտորդ» դաշինքը ՏԻՄ ընտրություններում դիտորդական առաքելություն է իրականացրել Գյումրիի, Սյունիքի և Տավուշի մարզերի 150 ընտրատեղամասերից 118-ում։ 16 շրջիկ խմբերը և կարճաժամկետ դիտորդներն ընտրատեղամասերում ու տեղամասերից դուրս հետևել են ընտրական գործընթացին և արձանագրել են խախտումներ։ Ըստ դիտորդական խմբերի՝ բոլոր  համայնքներում  ընտրապայքարում եղած քաղաքական ուժերն օգտվել են վարչական ռեսուրսի հնարավորություններից։

«Ոչ միայն իշխանությունն է տիրապետում վարչական ռեսուրսին, այլ նաև ընդդիմությունն է տիրապետում, հատկապես, հաշվի առնելով բիզնես հետաքրքրությունները և բիզնես ոլորտները։ Գորիս և Գյումրի  քաղաքների դեպքում ևս կոնկրետ մարդկանց խումբ տիրապետում է այդ ռեսուրսին, և ովքեր որ տիրապետում են, կարողանում են այդ ռեսուրսները նույն աշխատանքային իրավահարաբերություններում օգտագործել, որպեսզի ստանան բավարար չափով քվեներ»,- նշել է «Անկախ դիտորդ» դաշինքի երկարաժամկետ  և շրջիկ դիտորդական խմբերի համակարգող Վահրամ Թոքմաջյանը։

Ըստ դիտորդների, կուսակցություններն ու դաշինքներն այս անգամ ևս դիմել են քվեներ ստանալու համար ամենատարբեր միջոցների։ Ինչպես նախկինում, այս անգամ ևս էական նշանակություն են ունեցել  թաղային հեղինակությունները։

«Սա շատ լավ ինդիկատոր է  իշխանության համար, որ իրականում չկա ամբողջ համակարգը գրավելու բոլոր ՏԻՄ-երում, որովհետև ես չեմ կարծում, որ եթե լիներ այդ քաղաքական կամքը, ապա իշխանությունը ռեսուրս չունենար։ Ամեն դեպքում, մենք չունենք դեռ սերնդափոխություն, որ «տասովչիկները» չլինեն, որ չկան մարդիկ, որոնք պատրաստ են ծառայություններ մատուցել»,- նշել է «Անկախ դիտորդ» դաշինքի դիտորդական առաքելության համակարգող Վարդինե Գրիգորյանը։

Որոշ ընտրատեղամասերում դիտորդներն արձանագրել են կուտակումներ ու մարդկանց  մեքենաներով տեղափոխելու դեպքեր։ Իսկ ՏԻՄ ընտրություններում տեղափոխությունը կատարվել է ոչ թե նախկինում ընդունված երթուղայիններով ու ավտոբուսներով, այլ մարդատար մեքենաներով, որոնք կրել են քաղաքական ուժերի տարբերանշանները։

Մյուս խախտումներն էլ վերաբերել են ընտրատեղամասերի տեղակայմանը, որոշ տեղամասեր եղել են ընտրողներին անհարմար վայրերում, կահավորանքը չի համապատասխանել պահանջվող չափորոշիչներին, անգամ նեղվածք լինելու պատճառով  տեղամասերից մեկում վստահված անձինք ստիպված են եղել գործընթացին հետևել բակում։

«Տեղամասեր կան, որ անգամ նկուղում էին տեղակայված, դա, իրոք, պրոբլեմ էր, 2-3  տեղամասերում վտանգ կար ընտրողների գաղտնիության իրավունքի իրացման հետ կապված, որովհետև քվեախցիկի հետևում դուռ կար, որը կնքված չէր, ու տեղամասերից մեկում այդ հատվածից ազատ ելումուտ կար»,- պարզաբանել է Վահրամ Թոքմաջյանը։

Գյումրիում ու Հանրապետության ևս 8 համայնքներում կայացած ՏԻՄ ընտրությունների ընթացքում դիտորդական խմբերի արձանագրած խախտումների վերջնական տվյալները կհրապարակվեն մեկ շաբաթից։ Բայց, ըստ դիտորդների, դրանք էական ազդեցություն չեն ունենա արդյունքների վրա։ Այս ընթացքում  երկարաժամկետ դիտորդները կշարունակեն իրենց աշխատանքը, նրանք հիմնականում կհետևեն տարածքային  ընտրական հանձնաժողովների աշխատանքներին, բողոքարկումների ընթացքին ու հնարավոր ձայների վերահաշվարկի գործընթացին։