«Անուշ» օպերայից 100 տարի անց Գյումրիում նոր մասշտաբային օպերա է բեմադրվում

1912 թվականին Արմեն Տիգրանյանի «Անուշ» օպերայի բեմադրությունից 100 տարի անց Գյումրիում բեմադրվում է նոր օպերային ներկայացում: Նախաձեռնությունը Ֆրանսաբնակ գյումրեցի, հայտնի երգեհոնահարուհի Նարինե Սիմոնյանինն է, բեմադրող ռեժիսորն է պարուսույց, բալետմայստեր, ՀՀ ժողովրդական արտիստ Ռուդոլֆ Խառատյանը:

Գյումրեցի հանդիսատեսին կներկայացվի անգլիացի կոմպոզիտոր Հենրի Պյորսելի 1692 թվականին գրված «Դիդոնե և Էնեաս» օպերան, որի նախապատրաստական և բեմադրման աշխատանքներն ամբողջությամբ  կատարվում  են Գյումրիում:

Երիտասարդ մոդելավորողները  ստեղծել են 1600-ականներին բնորոշ դիցական, երևակայական կերպարների զգեստները, դրանք ամբողջանում ու վերջնական տեսքի են բերվում  Գեղարվեստի պետական ակադեմիայի Գյումրիի մասնաճյուղի կարի արտադրամասերում:

Այստեղ ամեն ինչ ձեռքի աշխատանք է: Բծախնդրությամբ են մոտենում յուրաքանչյուր դետալ ստեղծելիս, նույնիսկ կիրառում են  հայկական մանրանկարչության և կտորի վրա պատկերների արտատպման հին ու նոր տեխնոլոգիաները:

Զգեստների  հիմնական մասն արդեն պատրաստ է: Մոդելավորողների խմբին են միացել նաև դերակատարներն ու մեներգիչները, որոնք փորձում են իրենց համար կարված հագուստներն ու վերջին շտկումներն են կատարում:

«Մենք պրոֆեսիոնալներ ենք պատրաստում, ու սա էն պրոցեսն է, որի միջով բոլորն անցնելու են և հատկապես գյումրեցիները, որովհետև գյումրեցիները ունեն էդ տաղանդը, բայց թաքնված է, էդ տաղանդը  աշխատելով մենք բացելու ենք, էս երեխաները վաղը դառնալու են  պրոֆեսիոնալներ»,- SHANTNEWS.am-ի հետ զրույցում նշել է բալետմայստեր Ռուդոլֆ Խառատյանը։

Բարոկո երաժշտության ոճին առանձնահատուկ հնչողությունը վերարտադրելու համար նվագախմբի հետ բեմից կհնչեն կլավիսին ու ֆլեյտայի հնաոճ տեսակները: Հնագույն գործիքները Գյումրի են բերվել  տարբեր երկրներից:

«Փորձում ենք ինչքան հնարավոր է աուտենտիկ երաժշտություն ստեղծել, այսինքն ոչ թե հարմարեցնենք մեր ունեցածին, այլ ինչքան հնարավոր է դրսից բերենք որոշ էլեմենտներ, քան ներսից եղածը տրանսֆորմացնենք, որպեսզի կարողանանք մեր ունկնդրին ներկայացնել մի բան, որ իրենք այստեղ չեն լսել, այսինքն՝ սա իսկապես առաջին անգամն է Հայաստանում, որը լինելու է հնագույն գործիքների վրա»,-SHANTNEWS.am-ի հետ զրույցում նշել է  գյումրեցի հայտնի  երգեհոնահարուհի  Նարինե Սիմոնյանը։

Աշխարհի հեղինակավոր օպերային  երգչախմբերի հետ աշխատած կլավիսինահար, վոկալի մասնագետ Ստեֆանոն այժմ գյումրեցի երգիչներին, երաժիշտներին է փոխանցում  հնագույն երաժշտության կատարողական տեխնիկան։ Երգչախմբային կատարումներից  ու արիաներից բացի օպերայում կլինեն բալետային բեմադրություններ: Նոր օպերայի առաջնախաղը լինելու է նոյեմբերի 13-ին։