Գյումրիում սոցիալական բնակարաններ կկառուցվեն շահառուների 50% համավճարով

Անի թաղամասում սոցիալական բնակարանների կառուցման աշխատանքները կսկսվեն գարնանը։ Այսօր Գյումրիի քաղաքապետարանում «ԱՌՔ» բարեգործական հիմնադրամի պատասխանատուների հետ քննարկվել են սոցիալական բնակարանների հատկացման չափորոշիչները, ներկայացվել է բազմաբնակարան շենքի նախագիծը:

Անի  թաղամասում սոցիալական բնակարանների կառուցման համար նախատեսված  տարածքը, ավագանու որոշմամբ, «ԱՌՔ» բարեգործական հիմնադրամին հատկացվեց հոկտեմբերին։ Այն կկառուցվի արդեն բնակեցված սոցիալական  բնակարանների հարևանությամբ՝ 90- ականներից գոյություն ունեցող  բետոնային հիմքերի վրա։ Նախատեսվում է կառուցել չորս հարկանի շենք՝ 13-15 բնակարանով։ Շենքի նախագիծը պատրաստ է, որը դեռ ենթակա է փոփոխության։

«Հանդիպել ենք ճարտարապետի հետ, ներկայացվել է էսքիզային տարբերակը, մենակ հիմա մտածում ենք, որ պետք է նայենք, տեսնենք՝ քանի հոգի հետաքրքրված կլինի, ինչպես են ուզում՝ անենք բնակարանները, որովհետև ներսի մասում գուցե դեռ կարողանանք որոշ փոփոխություններ անենք»,- նշել է «ԱՌՔ» բարեգործական հիմնադրամի հիմնադիր նախագահ Հրաչ Հակոբյանը։

Թե շենքում քանի մեկ, երկու կամ երեք սենյականոց բնակարաններ կկառուցվեն, առայժմ  հստակեցումների փուլում է, վերջնական որոշումը կախված է նախագծային հնարավոր  փոփոխություններից։

Սոցիալական բնակարանների հավանական շահառուների պահանջներն ու առաջարկությունները կուսումնասիրի մասնագիտական հանձնաժողովը, որը հետագայում կունենա նաև շահառուներին ընտրելու լիազորություն։ Առաջնային  չափորոշիչը, որով կառաջնորդվեն, դա տնակում բնակվելու փաստն է, երկրորդը՝ ընտանիքի վճարունակ լինելը, քանի որ սոցիալական բնակարանների կառուցման այս փուլը տարբերվում է նախորդից։ Այս անգամ այդ բնակարանները ընտանիքներին կտրամադրվեն 50 տոկոս համավճարով։

«Ծրագիրն էն տեսակ է, որ միայն չենք ուզում նվիրենք, այլ ուզում ենք  էնպես լինի, որ էն ընտանիքները, որոնք կարող են մի մասը իրենք վճարեն, որ հպարտություն ունենան՝ իրենց տունը իրենք են գնում։ 50 տոկոսը պիտի նվիրաբերություն լինի, իսկ մյուս 50 տոկոսը շահառուն պետք է վերադարձնի»,- ասել է հիմնադրամի նախագահը։

Լոսանջելեսահայերի հավաքագրած գումարներով կառուցվող բնակարանների ընդհանուր արժեքը կկազմի մոտ 280 հազար դոլար։ Ընտանիքներն իրենց մասնաբաժինը կվճարեն 10 տարվա ընթացքում և անտոկոս, որից հետո միայն կդառնան բնակարանի լիիրավ սեփականատերերը։

«ԱՌՔ» հիմնադրամն ունի ուսումնասիրությունների նախնական պատկեր, ըստ որի, նման պայմաններով բնակարան ձեռք բերել ցանկացողներ կան։ Եթե պարտադիր բաղադրիչով՝ 50 տոկոս համավճարի պայմանով, բնակարան ձեռք բերելու համար չլինեն դիմող ընտանիքներ, «ԱՌՔ» բարեգործական  հիմնադրամը նախատեսում է դարձյալ դիմել բարերարների աջակցությանը։

Ընտանիքների 50 տոկոսի վճարումով հիմնադրամը նախատեսում է, այն որպես ներդրում, ապահովել Գյումրիում  սոցիալական բնակարանաշինության ծրագրի շարունակությունը։