Գյումրիի նախկին տուն-ինտերնատի առաջին մասնաշենքի հիմնանորոգումը կավարտվի մինչև տարեվերջ

Գյումրիի տարեցների տուն-ինտերնատի շենքը 1972 թվականի կառույց է։ 50 տարում հիմնային նորոգում շենքում չի կատարվել, եղել են միայն կոսմետիկ հարդարումներ։ Երկհարկանի շենքն ամուր է, բայց 70-ականների կառույցը տարեցների ու հաշմանդամների խնամքը կազմակերպելու համար այլևս հարմար չէ:

2020 թվականից տարեցների տուն-ինտերնատը վերակազմավորվեց խնամքի շուրջօրյա կենտրոնի, որի կառավարման պատասխանատվությունը ստանձնեց Հայկական Կարմիր խաչի ընկերությունը։ Փոփոխությունները նախ սկսեցին շենքային հնարավորություններն այլ չափորոշիչներով գնահատել։ Մասնաշենքը վերանորոգում են՝ հարմարեցնելով  կենտրոնի բնակիչներին։

«Ներկայումս երկու բաժանմունք է հիմնանորոգվում, ամեն մի բաժանմունքը նախատեսված է 24 շահառուների համար։ Նախ՝ ամբողջությամբ հիմնանորոգվել են սենյակները, միջանցքը  ընդարձակվել է, լայնացվել են մուտքի ու սենյակների դռները՝ հարմարեցվելով սայլակավոր հաշմանդամների  ազատ մուտք ու ելքի համար, ամբողջությամբ վերանորոգվել ու կահավորվել են սանհանգույցները»,- SHANTNEWS.am-ի հետ զրույցում նշել է Հայկական Կարմիր խաչի ընկերության Գյումրիի շուրջօրյա խնամքի կենտրոնի համակարգող Արտյոմ Պետրոսյանը։

Անկողնային և ինքնուրույն տեղաշարժման խնդիրներ ունեցող շահառուների համար  առաջին հարկում կառուցվում է առանձին բաժանմունք, որտեղ սենյակները հարմարեցվում են խնամվողների բուժսպասարկումը տեղում կազմակերպելու համար:

Տարեցներին ու հաշմանդամներին մատուցվող ծառայությունները որակապես փոխելը ընկերության հիմնական պարտավորությունն է, որը պատվիրակել է աշխատանքի և սոցիալական հարցերի նախարարությունը: Բավարար ծառայությունների մատուցումն առանց շենքային պայմանները բարելավելու ընկերությունը լիարժեք չի կարողանա իրականացնել։ Դա վերաբերում է խոհանոցին  և շահառուների բոլոր սենյակները տաք ջրով ապահովելուն նաև։

«Ջրի խնդիր կար էնտեղ՝ տաք ջրի խնդիր։ Մենք կես-կես ժամ էինք  շաբաթվա մեջ տաք ջուր ունենում, երբ մենք ստանձնեցինք  կառավարումը։ Այս պահին մենք արդեն  կաթսայատան խնդիրն ենք փորձել լուծել մասնագետների հետ և կունենանք արդեն օրական վեց ժամ տաք ջուր։ Էս պարագայում նոր մենք խնամքի մասին կարող ենք խոսել, այսինքն՝ ամբողջը կախված է նաև պայմաններից, միայն գիտելիքները բավարար չեն»,- SHANTNEWS.am-ի հետ զրույցում  նշել է Հայկական Կարմիր խաչի ընկերության  գործադիր տնօրեն Աննա Եղիազարյանը։

Մասնաշենքերի  հիմնանորոգումից հետո կենտրոնի բնակիչները կխմբավորվեն՝ ըստ կարիքի ու ֆունկցիոնալության աստիճանի: Այժմ նրանք ժամանակավոր տեղափոխվել են շենքի տարբեր հարկաբաժիններ: Խնամվողների թիվն այստեղ հասնում է 136-ի։

«Վերանորոգման աշխատանքների մեկնարկից մոտ 2-3 ամիս առաջ մենք դադարեցրել էինք նոր շահառուների ընդունելությունը՝ բացառությամբ խիստ խնամքի կարիք ունեցող շահառուների։ Այդ իսկ պատճառով, շենքը, որը նախատեսված է 160 շահառուի համար, ներկայումս  խնամվում են  136-ը։ Վերանորոգման հետ կապված՝ բնակիչներին  տեղափոխել ենք ազատ մահճակալներ ունեցող բաժանմունքներ, 17 շահառուի էլ  ժամանակավորապես տեղավորել ենք մեր միջոցառումների դահլիճում»,- ասել է շուրջօրյա խնամքի կենտրոնի համակարգողը։

2022-ին շահագործման կհանձնվի երկրորդ մասնաշենքը, իսկ մյուս երկու մասնաշենքերի  հիմնանորոգման համար Հայկական Կարմիր խաչի ընկերությունը  միջոցներ է փնտրում, դոնոր ընկերությունների հետ համագործակցությամբ հնարավոր են համարում ֆինանսական միջոցների ներգրավումը։

Երկու մասնաշենքերի շինարարությունը հաջորդ տարվա գարնանն են նախատեսում սկսել։ Այս ընթացքում ընկերությունը, նախարարության հետ համատեղ, նոր  փոփոխություններ կկատարի  քաղաքացիների ուղեգրման պահանջներում։