Բանավեճ պատգամավորների՝ «լուռ» լինելու հանգամանքի շուրջ

SHANTNEWS-ն արդեն տեղեկացրել է, որ այսօր ներկայացվել են 6-րդ գումարման 1-ին և 2-րդ նստաշրջանների դիտարկան արդյունքներն ու ըստ այդ արդյունքների՝  ԱԺ-ում պահպանվել է «լուռ» պատգամավորների թիվը։ 105 պատգամավորներից 40-ը 2 նստաշրջանում քննարկմանը չի մասնակցել և միայն քվեարկել է։

«31 հոգանոց «Ծառուկյան» խմբակցության 14 պատգամավոր ԱԺ լիագումար նիստերին հարց չի տվել, ելույթ չի ունեցել, իսկ 58 հոգանոց ՀՀԿ խմբակցությունում ամբիոնին և խոսափողին չի մոտեցել 26 պատգամավոր»,- ասել է ԱԺ մոնիթորինգ ծրագրի ղեկավար Լուսինե Վասիլյանը 

Քննարկմանը ներկա ՀՀԿ-ական պատգամավոր Ռուստամ Մախմուդյանին լրագրողները հարց են ուղղել՝ արդյո՞ք մեծ թիվ չէ 26-ը և այդ 26-ի դեպքում արդյո՞ք խոսքն այն պատգամավորների մասին չէ, որոնք օրենսդիր են եկել ուղղակի «կոճակ սեղմելու»՝ ձայն ապահովելու համար. Մի՞թե նրանք հասկանում են, թե ինչ է ասված, օրինակ ակցիզային հարկի մասին օրենքի 7-րդ կետում։

«Անկեղծ ասած էդպիսի քաստինգ, ներողություն՝ ընդունելություն կամ ինչ-որ հարցախույզ չենք անցկացրել հասկանալու համար ինքը 7-րդ հոդվածի բովանդակությունը գիտի, թե՝ ոչ: Բայց վստահ կարող եմ մի բան ասել՝ պատգամավորների բոլորի առաքելությունը բացառապես միայն օրենքներ գրելու կամ օրենքների վերաբերյալ ամբողջական պատկերացում ունենալուն է ուղղղված: Վստահ եմ, որ ձեր կողմից նշված թվաքանակով պատգամավորների մեծ մասն ամենօրյա աշխատանքներ են տանում իրենց ընտրողների  հետ և եթե մի փոքրիկ վիճակագրական տվյալներ վերլուծենք, կտեսնենք, որ հենց տարածքային պատգամավորներից շատերը բնակիչներին հուզող հարցերին ուղղված միջոցներ ու քայլեր են ձեռնարկում», – պատասխանել է Մախմուդյանը:

ՀՀԿ-ական պատգամավորը համաձայն չէ այն տեսակետի հետ, որ եթե իրենք լուռ են, ուրեմն ոչինչ չեն անում:

«Առհասարակ շատի ու քիչ խնդիր չկա: Փիլիսոփաներից մեկն ասել է՝ մի բան է շատ խոսել, մի բան է շատ ասել: Շատ խոսելն էդպես չպիտի խրախուսվի, թե մեր որևէ պատգամավոր կարողանում է մակապարտեզների շինարարությանն ուղղված, դպրոցների, կամ այլ բնույթի աշխատանքներ իրականացնել, սա էլ է գովելի, քանի որ դա համարվում է տվյալ քաղաքական ուժի ծրագրի բաղկացուցիչ մասերից մեկը: Հիմա եթե կառավարությանը դիմում են ներկայացրել ԿԳ նախարարից ակնկալում են որոշակի աջակցություն սա անպայման օրենք գրելու հետ կապ ունի, ինքը հուզող խնդիրը բարձարցնում ա կառավարությունում, կառավարությունը լուծում ա տալիս»,- հավելել է ՀՀԿ-ական պատգամավորը:

Ասվածին արձագանքելով՝ 6-րդ գումարման 1-ին և 2-րդ նստաշրջանների ամենաակտիվ պատգամավոր ճանաչված Արտակ Զեյնալյանն ասել է, որ ԱԺ պատգամավորը պետք է բերի ժողովրդի կամքը, որպեսզի ժողովրդի կամքով իրականացվի իշխանությունը, եթե այդ մարդիկ որևէ տեսակետ չեն հայտնում, մենք չգիտենք իրենց քվեարկողները, ընտրողներն ինչպիսի տեսակետ ունեն:

«Մտքերի բախման ժամանակ պետք է ձևավորվի քվեարկության կամքը: Հիշենք, որ պատգամավորը հրամայական մանդատով օժտված չի, պատգամավորի մոտ քվեարկության կամք ձևավորվում է  էդ ամեն ինչը լսելու արդյունքում:  Եթե պատգամավորը պետք է ընդամենը իրեն գրված դիմումը հասցեագրի ԿԳՆ-ին, ապա դա կարող է անել նաև քաղաքացիական հասարակության ինստիտուտի ներկայացուցիչները, դրա համար պետք չէ պատգամավոր լինել: Ուրիշ բան է, որ պատգամավորի մանդատը կշիռ է հաղորդում, բայց դրա համար պիտի վաստակես էդ հեղինակությունը», -ասել է Զեյնալյանը:

Բայց Զեյնալյանը նաև հավելել է, որ ամենևին կասկածի տակ չի դնում պատգամավորների լավ մարդ ու լավ գործարար լինելը:

«Իրենց գործառույթն ուրիշ տեղ է, հասկանում եք, նրանք մեր ժողովրդին պիտանի մարդիկ են, ուրիշ տեղ պիտի աշխատեն: Իսկ պատգամավորը լրիվ ուրիշ բան է», – հավելել է ՀՀ ԱԺ «Ելք» խմբակցության պատգամավորը