ԱԺ պատգամավորները այցելել են Շիրակի մարզի տնակային թաղամասեր և վթարային շենքեր

ԱԺ «Քաղաքացիական պայմանագիր» խմբակցության պատգամավորներն  ու մշտական հանձնաժողովների նախագահներն աշխատանքային այցով այսօր Շիրակի մարզում էին։ Պատգամավորները նախ մարզպետարանում փակ հանդիպում են ունեցել Շիրակի մարզի գերեվարված տղաների հարազատների հետ, նրանց են փոխանցել կարևոր տեղեկություններ։ Պատգմավորների աշխատանքային այցի հիմնական օրակարգում շրջայցն էր Գյումրիի տնակային թաղամասեր և վթարային շենքեր։

Քաղաքի ամենամեծ տնակային թաղամասը գտնվում է ավտոկայանի հարակից տարածքում։ Ըստ նախկին ու ներկա գլխավոր հատակագծի՝ այն  համարվում էր կանաչ գոտի, բայց երկրաշարժից հետո վերածվեց ամենամեծ տնակային թաղամասի, որտեղ մինչ օրս ապրում են հարյուրավոր ընտանիքներ։ Համարակալումով այն 104 տնակային ավանն է, վերջին տվյալներով՝  հաշվառված  են 153 ոչ հիմնական շինություններ, որոնցից 134-ը բնակեցված են, 19-ը համարվում են փակ դռներ։ Պատգամավորների ծանոթացումը թաղամասի խնդիրներին սկսվեց հենց տնակային թաղամասից։

Տնակային ավանի 153 ընտանիքներից 66-ը բնակարանային փոխհատուցում է ստացել, բայց շարունակում են տարբեր պատճառներով ապրել ժամանակավոր կացարաններում։ Տնակային ավանում ապրող ընդամենը 16 ընտանիք ունի անօթևանի կարգավիճակ, 71-ն առանց կարգավիճակի է։

«Էս պահի դրությամբ ունենք 2765 տնակային տնտեսություն, կարգավիճակի ճշտման գործընթաց է տարվում, թե որքանն են անօթևան, որքանն են դրսից եկել, ովքեր են տուն ստացել և դուրս չեն եկել։ Հանձնաժողով է ստեղծված՝ պարոն Ղուլարյանի գլխավորությամբ, աշխատանքներ են տարվում՝ 2023-25 թվականներին ՀՀ վարչապետի հանձնարարականով էս տնակային տնտեսությունների հարցը պետք է լուծվի»,- նշում է Շիրակի մարզպետարանի քաղաքաշինության վարչության  պետ Խաչատուր Խնձրցյանը։

Տնակներում ապրող ընտանիքների կարգավիճակի ճանաչման հարցն, ըստ օրենսդիրների, կարևոր խնդիրներից մեկն է։ Տնակային ընտանիքների պատմությունները տարբեր են, բայց հարցի լուծման սպասումները նույնն են՝ երեք տասնամյակ անց դեռ բնակարանի են սպասում։ ԱԺ պատգամավորները  նախատեսում են կառավարություն ներկայացնել անօթևանության խնդրի լուծման նոր նախագծեր։

«Մենք տարբեր իրավիճակներ ունենք, տարբեր խնդիրներ ունենք։ Մարդիկ կան, որ ուզում են հենց բնակարանի  տրամադրում, մարդիկ կան, որ ուզում են տնակները սեփականաշնորհել և էդ հիմքերի վրա  սեփական ուժերով տուն կառուցեն։ Այս բոլոր առաջարկներն ու դիտարկումները  մենք հետո  արդեն  մեր կառավարության գործընկերների հետ  համապատասխան հանձնաժողովներում  աշխատանքային խմբերում  կքննարկենք և փորձելու ենք պետական ռեսուրսներին համապատասխան, պետության հնարավորություններին  համապատասխան  լուծումներ առաջարկել»,- ասել է ԱԺ ՔՊ խմբակցության քարտուղար Արթուր Հովհաննիսյանը։

Տնակներում չեն ապրում, բայց բնակարանային ապահովման պահանջներ ունեն նաև վթարային շենքերի բնակիչները։ 4-րդ աստիճանի վթարայնության Տիգրան Մեծի 5  բազմաբնակարան շենքի երկրորդ մուտքը հիմա գրեթե բնակեցված չէ։ 16 ընտանիք լքել է իրենց քանդված բնակարանները, ապրում են այլ հասցեներում։

Ճարտարապետական նշանակության կառույցում  հաշվառված ընտանիքները պատրաստ են վերադառնալ իրենց բնակարաններ շենքի ամրացումից հետո, որն այժմ քաղաքաշինական ծրագրերում է, և արդեն նախագիծ է կազմվում։ Մարզի վթարային շենքերից մի քանիսը  հրատապ լուծման անհրաժեշտություն ունեն։

Արթիկում, Ամասիայում և Աշոցքում գտնվող վթարային շենքերը, ըստ վթարայնության աստիճանի, ևս կներառվեն կառավարության ծրագրերում։ Հրատապ լուծում պահանջող է նաև Աշոցքի Կոճոռ թաղամասի խնդիրը։

2020 թվականին ստեղծված աշխատանքային խումբը քննարկում էր 164 ընտանիքներին նոր բնակարաններով ապահովելու հարցը, որի լուծման տարբերակներից մեկն էր տեղում նոր շենքերի կառուցումը։ Ծրագիրը տարբեր պատճառներով հետաձգվեց։ Այժմ Կոճոռ տնակային թաղամասի  ընտանիքների բնակապահովման հարցը նախատեսվում է վերանայել։