Գյումրեցի դպրոցականները հաղթել են  շախմատի և առարկայական միջազգային օլիմպիադաներում

Ղազախստանի Ալմաթի քաղաքում անցկացված Ժաուտիկովյան միջազգային 18-րդ դպրոցական օլիմպիադային Հայաստանը ներկայացել է 37 մասնակիցներով, նրանցից 12-ն արժանացել են մեդալների՝ 1 ոսկե, 1 արծաթե և 10 բրոնզե: «Մաթեմատիկա», «Ֆիզիկա» և «Ինֆորմատիկա» առարկաներից առցանց ձևաչափով օլիմպիադային Գյումրիի «ֆոտոն» վարժարանից 5 աշակերտ է մասնակցել՝ 2-ը՝ մաթեմատիկա, ևս 2-ը՝ ինֆորմատիկա և 1-ը՝ ֆիզիկա առարկաներից: Նրանցից 2-ը ինֆորմատիկայից բրոնզե մեդալ են նվաճել։

Գյումրեցի դպրոցականները նվաճումներ ունեն նաև շախմատի միջազգային մրցաշարում։ Նորվեգիայի Կրագերո քաղաքում կայացած  միջազգային մրցաշարում 2 աշակերտ արժանացել է հատուկ մրցանակի։

Ժորա Ունուպօղլյանը Ժաուտիկովյան միջազգային 18-րդ օլիմպիադայի բրոնզե մեդալակիրներից է։ 12-րդ դասարանցի Ժորան և իր համադասարանցի Գևորգ Բոյաղչյանը բրոնզե մեդալի են արժանացել ինֆորմատիկայի սպորտային ծրագրավորում բաժնից։ Գևորգն այժմ էլ Երևանում է միջազգային օլիմպիադայի մասնակցում։ IT ոլորտի սպորտային ծրագրավորում այս բաժինը դեռևս շատ ուսումնասիրված չէ, գյումրեցի  դպրոցականները նշում են, որ այն ևս անհրաժեշտություն է դառնում ուսումնասիրել։

«Ծրագրավորումը շատ մեծ պահանջարկ ունի, կուզենայի, որ սպորտային ծրագրավորումը ևս մարզերում զարգանար, եթե նայենք հանրապետական ցուցանիշները մասնակցության, կտեսնենք, որ մարզերից շատ քիչ է մասնակցությունը։ Հուսամ՝ իմ այս մեդալը կլինի քայլ դեպի մարզերի զարգացում»,- նշել է բրոնզե մեդալակիր Ժորա Ունուպօղլյանը։

Ժաուտիկովյան միջազգային 18-րդ օլիմպիադան առցանց ձևաչափով է անցկացվել։ Ժամանակակից տեխնիկական միջոցների ձեռքբերման և տեղադրման արդյունքում հնարավոր է եղել վարժարանում ապահովել առցանց մասնակցության տեխնիկական և վերահսկման պայմանները։

Արդեն առկա ձևաչափով Նորվեգիայում անցկացված շախմատի միջազգային մրցաշարում են ունեցել մասնակից աշակերտ։ 8-րդ դասարանցի Աիդա Ալվանջյանը այն 5 պատվիրակներից մեկն է եղել, ով մասնակցել է շախմատային մրցաշարին։ Ի դեպ, Հայաստանը ներկայացրած 5 պատվիրակներն էլ եղել են գյումրեցի աշակերտները։ Աիդան իր վարկանիշային խմբում զբաղեցրել է առաջին հորիզոնականը և արժանացել հատուկ մրցանակի։

«Մրցակցությունը թեժ էր, սակայն համառ պայքարի արդյունքում ինձ հաջողվեց վարկանիշային խմբում գրավել առաջին տեղը, ինչպես նաև մրցույթը հնարավորություն տվեց զգալիորեն բավարարել միջազգային վարկանիշը, ինչը խոշոր մրցաշարերի մասնակցության կարևոր նախապայման է»,- նշում է «Kragero Resort Chess-2022» շախմատի  միջազգային  մրցույթի հաղթող Աիդա Ալվանջյանը։

Հատուկ մրցանակակիր գյումրեցի մյուս աշակերտը թիվ 20 հիմնական դպրոցից է։ Նորվեգական Կրագերո քաղաքում անցկացված միջազգային մրցաշարում 8-րդ դասարանցի Սամվել Զաքարյանը  77 մասնակիցների շարքում գրավել է առաջին հորիզոնականն ու արժանացել հատուկ մրցանակի։

«Կարողացա մասնակիցների դեմ լավ դիմակայել ու հաղթել ինձնից ավելի ուժեղ մասնակիցներին։ Մասնակցելով այս օլիմպիադային, ունեցա նոր ընկերներ՝ տարբեր երկրներից։ Շախմատում  հարկավոր է ունենալ կամքի ուժ, նպատակասլացություն, որ կարողանանք բոլոր խոչընդոտները հեռացնել»,- ասում է  «Kragero Resort Chess-2022» շախմատի  միջազգային  մրցույթի հաղթող Սամվել Զաքարյանը։

Սամվելը շախմատ է խաղում 4 տարեկանից, մտադիր է դպրոցն ավարտելուց հետո մտքի խաղի իր գիտելիքներն ավելի խորացնել ու շարունակել ուսումը հենց այդ ուղղությամբ։ ShantNews.am-ի հետ զրույցի ընթացքում ևս Սամվելը շախմատ էր խաղում։ Դասընկերոջ հետ խաղալով շախմատի 1 պարտիա, իր օգտին կրկին հաղթանակ գրանցեց։