Օրենսդրորեն կկարգավորվեն Հայաստանի և մի շարք երկրների միջև առևտրատնտեսական, միգրացիոն ոլորտները

2019թ. հոկտեմբերի 1-ին Երևանում Հայաստանի, Բելառուսի, Ղազախստանի, Ղրղզստանի, Ռուսաստանի, Եվրասիական տնտեսական միության, Սինգապուրի միջև ստորագրվել է համաձայնագիր:

Փաստաթղթի նպատակն է ստեղծել բարենպաստ միջավայր և պայմաններ փոխադարձ հետաքրքրություն ներկայացնող բնագավառներում կողմերի միջև փոխադարձ առևտրային կապերի զարգացման և տնտեսական համագործակցության խրախուսման համար, ինչպես նաև վերացնել կողմերի միջև արգելքներն առևտրում և ներդրումների ոլորտում, նվազեցնել բիզնեսի ծախսերը և բարձրացնել տնտեսական արդյունավետությունը:

Համաձայնագրում ամրագրվում է ապրանքների ազատ առեւտրի, ներդրումների ու ծառայությունների մասով համաձայնագրերի կնքման կողմերի մտադրությունը՝ համաձայն վերջիններիս կողմից սահմանված կանոնների ու իրավասությունների:

«Եվրասիական տնտեսական միության և նրա անդամ պետությունների, մի կողմից, և Սինգապուրի Հանրապետության, մյուս կողմից, միջև համապարփակ տնտեսական համագործակցության մասին» շրջանակային համաձայնագիրը վավերացնելու մասին» օրենքի նախագիծը քննարկվել է մայիսի 3-ին գումարված ԱԺ հերթական նիստում: Այն խորհրդարանականներին ներկայացրել է էկոնոմիկայի նախարար Վահան Քերոբյանը:

ԱԺ պատգամավոր Բաբկեն Թունյանը նախարարից հետաքրքրվել է, թե կոնկրետ ո՞ր ուղղություններն են համաձայնագրով նախատեսվում զարգացնել, և ի՞նչ ակնկալիքներ ունի Հայաստանը դրանից:

Վահան Քերոբյանն ընդգծել է, որ Հայաստանն առավել հետաքրքրված է ներդրումներով: «Սինգապուրը խոշոր ֆինանսական կենտրոն է, և քննարկվում է սինգապուրյան ներդրումային ֆոնդերի և Հայաստանի կառավարության միջև համագործակցությունը»,- նշել է նախարարը:

ԱԺ նիստում քննարկվել է նաև Հայաստանի կառավարության և Բելառուսի կառավարության միջև հետընդունման համաձայնագիրը վավերացնող օրինագիծը:

Փաստաթուղթը երկու երկրների տարածքներում անօրինական կարգավիճակում գտնվող ինչպես սեփական քաղաքացիների, այնպես էլ երրորդ երկրների քաղաքացիների և քաղաքացիություն չունեցող անձանց հայտնաբերման և վերադարձի կազմակերպման հարցերում համակարգված քայլեր իրականացնելու հնարավորություն կտա:

Համաձայնագրով սահմանվում են կողմերի իրավասու մարմինները, սահմանի հատման կետերը, փաստաթղթերի ցանկը, հետընդունման դիմումի ներկայացման կարգը, ձևը, ժամկետները և այլն:

«Հայաստանի Հանրապետության և Լիտվայի Հանրապետության միջև «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման (ռեադմիսիայի) մասին» համաձայնագրի կիրարկման մասին արձանագրությունը վավերացնելու մասին» օրենքի նախագիծը ևս քննարկվել է ԱԺ հերթական նիստում: