SHANTNEWS-ի թղթակիցը ադրբեջանական սադրանքների, հայ ռազմագերիներին ազատ չարձակելու մասին հարց է ուղղել Նիդեռլանդների վարչապետին՝ որպես ԵՄ հիմնադիր անդամի

Երեկ Նիդեռլանդներում Հայաստանի և այդ երկրի վարչապետների հանդիպումից ու հայտարարություններից հետո լրատվամիջոցների ներկայացուցիչները հնարավորություն են ունեցել հարցեր ուղղելու նրանց:

SHANTNEWS.am-ի թղթակիցը Նիդեռլանդների վարչապետին հարցրել է.

«Պարոն վարչապետ, Նիդեռլանդները՝ որպես Եվրոպական միության հիմնադիր անդամ, որպես Եվրամիության արժեքներն առաջ մղող, ինչպե՞ս է վերաբերվում այն փաստին, որ Ադրբեջանը շարունակում է պահել հայ ռազմագերիներին, նրանց ազատ չի արձակում: Ավելին՝ չնայած այն բազմաթիվ հայտարարություններին, որ Հայաստանն անում է, որ պատրաստ է խաղաղության, խաղաղության ջատագովներից է, Ադրբեջանը շարունակում է խախտել հրադադարի ռեժիմը և ավելին՝ մինչ օրս շարունակում է գտնվել Հայաստանի սուվերեն տարածքում: Վերջում Դուք նաև խոսեցիք մշակութային արժեքներից, ինչպե՞ս եք վերաբերում այն փաստին, որ Արցախի՝ Ադրբեջանի վերահսկողության տակ անցած տարածքներում Ադրբեջանը՝ այդ երկրի իշխանությունների կողմից ամենաբարձր հովանավորությամբ, ձևախեղում և ոչնչացնում է Արցախի հայկական պատմամշակութային արժեքները: Շնորհակալություն»:

Մարկ Ռուտեի խոսքերով՝ 2020 թվականի պատերազմը բոլորին ցույց տվեց, որ վերջնական խաղաղությունը մեծ կարևորություն ունի։

«Դրա համար էլ այդքան ուրախ ենք, որ ինտենսիվ երկխոսություն է տեղի ունենում: Դրանք, իհարկե, վերին աստիճանի դժվար և հուզմունքային զրույցներ են՝ այսպիսի պատմությունով: Միևնույն ժամանակ ասեմ, որ հետևողական խաղաղությունն իրագործելի է, և միայն այդ խաղաղությամբ կարող են երկու երկրներն այդ տարածաշրջանում ապրել: Պետք է շատ իրատես լինենք այդ առումով: Ուկրաինայում տեղի ունեցող պատերազմը նույնպես ազդեցություն ունի երեք նախագահների վրա Մինսկի խմբի առումով, նկատի ունեմ Ֆրանսիան, Միացյալ Նահանգները և Ռուսաստանը: Դրականն այն է, որ այդ նախագահներն ակտիվ են, ակտիվ գործունեություն են ցուցաբերում, իրենց դրական աշխատանքը շարունակում են, և ինչպես ասաց այդ մասին իմ գործընկերը, Եվրոպական միությունը շատ ակտիվ է այդ առումով: Եվրախորհրդի նախագահ Շառլ Միշելը շատ դյուրացնող դեր է կատարում Հայաստանի և Ադրբեջանի բանակցությունների միջև: Մենք կոչ ենք անում բոլոր կողմերին, որ բռնություններին վերջ դրվի, լարվածությունը նվազի, և կոնֆլիկտը խաղաղության սեղանի շուրջ լուծվի: Իհարկե, այդ մասին շատ երկար չեմ կարող խոսել, բայց մենք երկուսով մեր զրույցների և հեռախոսազրույցների ժամանակ այդ նույնը հաստատել ենք, որ դա շատ կարևոր է իրականացնել»,- պատասխանել է Նիդեռլանդների վարչապետը:

Հարցին նաև ՀՀ վարչապետն է անդրադարձել: Նիկոլ Փաշինյանը ընդգծել է, որ երկկողմ հանդիպման ժամանակ նաև Ադրբեջանում պահվող հայ գերիների հետ կապված հարցն են քննարկել:

«Եվ պիտի արձանագրեմ, որ Նիդեռլանդների Ներկայացուցիչների պալատը շատ հստակ բանաձև է ընդունել այդ առիթով: Նաև պիտի արձանագրեմ, որ այդ հարցում վարչապետ Ռուտեի հետ մեր դիրքորոշումները համընկնում են: Իհարկե, հասկանալի է, որ այդ իրավիճակը միջազգային հանրության համար ավելի ու ավելի անընդունելի է դառնում, երբ մարդկանց կյանքերը կարող են օգտագործվել քաղաքական նպատակներով: Մեր դիրքորոշումը հստակ է՝ ռազմագերիները պետք է վերադառնան տուն»,- ասել է Նիկոլ Փաշինյանը:

Այնուհետև հավելում է արել Նիդեռլանդների վարչապետը։

«Նիդեռլանդները կշարունակի պայքարել այդ ուղղությամբ, որպեսզի գերիները կարողանան ապահով կերպով վերադառնալ իրենց հայրենիք»,- ասել է նա: