Հայազգի էլեգանտ կիսապաշտպանի՝ «Չելսի» տեղափոխվելը հնարավոր է իրականություն դառնա

«Չելսին» դեռևս չի քննարկել անձնական պայմանագրի պայմանները Մոսկվայի «Դինամոյի» կիսապաշտպան Արսեն Զախարյանի հետ։ Այս մասին իր աղբյուրներին հղում կատարելով՝ հայտնում է «Чемпионат.com»-ը։

«Ֆուտբոլիստի անձնական պայմանագիրը դեռևս չի քննարկվել, բայց կողմերը մտածում են, որ դա խնդիր չի լինի։ Հիմա ակումբներն աշխատում են գումարի փոխանցումը հնարավոր դարձնելու և գործարքը պաշտոնապես հաստատելու ուղղությամբ։ Բանակցային գործընթացը շարունակվում է»,- գրում է «Чемпионат.com»-ը։

Ավելի վաղ լրագրող Ֆաբրիցիո Ռոմանոն հայտնել էր,որ «Չելսին» շարունակում է հետաքրքրվել Զախարյանի ծառայություններով։

Հիշեցնենք՝ «Չելսին» ամռանը 15 մլն եվրո էր առաջարկել 19-ամյա ֆուտբոլիստի համար, սակայն պատժամիջոցների պատճառով գումարը հնարավոր չէր եղել փոխանցել և «Չելսին» չէր հասցրել գործարքն ավարտին հասցնել մինչև տրանսֆերային պատուհանի փակվելը։

Արսենը ծնվել է 2003 թվականի մայիսի 26-ին Սամարայում, որտեղ նրա ընտանիքը տեղափոխվել է Մարտակերտից՝ ղարաբաղյան պատերազմի պատճառով։ Նրա հայրը՝ Նորայրը, աշխատել է շինարարության ոլորտում։ Ավագ եղբայրը՝ Դավիթը՝ (ծն. 1997 թ.) նախկին պրոֆեսիոնալ ֆուտբոլիստ, ավարտել է կարիերան վնասվածքի պատճառով։ Արսենը վեց տարեկանից սովորել է «Կրիլյա սովետով» ակումբի ակադեմիայում։ Առաջին մարզիչը Վլադիմիր Կորոլյովն է։ Մասնագետը նշել է, որ դեռ փոքր տարիքում Արսենը լավ վարում էր գնդակը և ուներ ֆուտբոլային բարձր մակարդակ։ 2017 թվականի ապրիլին Արսենը ակադեմիայի կազմում մասնակցել է Ռուսաստանի երիտասարդական առաջնությանը։ Խաղացողը հաջողությամբ է անցկացրել մրցաշարը և գրավել է մոսկովյան բոլոր ուժեղագույն ակումբների ուշադրությունը: Արդյունքում Զախարյանը համալրել է Մոսկվայի «Դինամոյի» շարքերը։

2020 թվականի փետրվարին, 16 տարեկան հասակում, Զախարյանն իր նորամուտը նշեց «Դինամոյի» երիտասարդական թիմում։ Անցած հոկտեմբերին նա ընդգրկվեց աշխարհի 60 լավագույն երիտասարդ խաղացողների ցանկում՝ ըստ The Guardian-ի՝ ստանալով հետևյալ բնութագրերը.

«Զախարյանը էլեգանտ, բազմակողմանի կենտրոնական կիսապաշտպան է, ով հարվածում է, վերականգնում է գնդակները անդրադարձից հետո, ստեղծում է վտանգավոր պահեր և գոլեր խփում: Խաղը կարդալու նրա կարողությունն օգնել է նրան աչքի ընկնել երիտասարդ տարիքում»[6][7]

2020 թվականի նոյեմբերի 1-ին նա իր դեբյուտը նշեց Պրեմիեր լիգայում Տամբովի դեմ խաղում (2:1)։ 2022 թվականի մարտին նա մտել է աշխարհի մինչև 18 տարեկան ամենաթանկ 10 ֆուտբոլիստների ցանկ։

Ռուսաստանի հավաքականի կազմում 2021 թվականի Եվրոպայի առաջնության երիտասարդական հավաքականի կազմում հանդես է եկել Իսլանդիայի ընտրանու դեմ և դարձել գոլի հեղինակ, այնուհետ դարձել երիտասարդական Եվրոյի եզրափակիչ մրցաշարերի ամենաերիտասարդ ռմբարկուն։

Նա ընդգրկված էր Ռուսաստանի հավաքականի ընդլայնված կազմում ֆուտբոլի Եվրոպայի 2020 թվականի առաջնության համար, սակայն կոկորդի բակտերիալ վարակի պատճառով չի ընդգրկվել վերջնական հայտացուցակում։

Նա իր նորամուտը նշել է Ռուսաստանի առաջին ազգային հավաքականի կազմում 2022 թվականի սեպտեմբերի 1-ին Խորվաթիայի դեմ աշխարհի առաջնության ընտրական խաղում։