Գարնանային բարձր տրամադրության կարևորագույն նախադրյալները

Այսօրվանից արդեն գարուն է, որը շատերի սիրելի եղանակն է: Գարնան մասին բազում բանաստեղծություններ և հետաքրքիր պատմություններ են գրել հայտնի ստեղծագործողները:

Տարվա այս եղանակը, գաղտնիք չէ, ասոցացվում է նորությունների, վառ և գունավոր կյանքի ու առօրյայի, սիրո և այլ դրական երևույթների հետ: Հոգեբանները նշում են, որ ձմեռվանից գարուն տեղափոխվելիս մարդիկ իրենց կյանքում պետք է որոշ թեթև փոփոխություններ անեն, որպեսզի իրենց ամբողջ հոգով և մարմնով զգան գարնանային թարմությունը և կարողանան կլանել  եղանակի մատուցած դրական տրամադրությունը:

SHANTNEWS-ը հոգեբանների բազմազան խորհուրդներից առանձնացրել է մի քանիսը:

Սկսեք զբաղվել սպորտով

Ձմռան համեմատաբար պասիվ կյանքից հետո, գարնանը հարկավոր է անցնել ակտիվ կյանքի: Իսկական ժամանակն է վազել մարզասրահ և ձմեռային քնից արթնացնել մկանները: Իսկ եթե վստահ եք ձեր կամքի ուժի վրա, ապա օրական 10-15 րոպե մարզվեք հենց ձեր տանը: Հոգեբանները այս թեմայով սիրում են կատակել և նշում են, որ գարունը իսկական ժամանակն է ամռանը պատրաստվելու համար:

Միանգամից մի ծանրաբեռնեք ձեր մարմինը՝ սկսեք ամենահասարակ և թեթև վարժություններից, այնուհետև օր օրի կատարելագործեք ձեր մարմինը: Հատկանշական է, որ սպորտով զբաղվելը դրական ազդեցություն է ունենում ոչ միայն կազմվածքի, այլև դեմքի մաշկի վրա:

Մշակեք նոր սննդակարգ

Ձմռան վերջում մենք հոգնածության զգացում ենք ունենում: Սա պայմանավորված է վիտամինների և արևի ջերմության պակասից: Վիտամինային սովը ազդում է մեր իմունիտետի, մտքերի և էմոցիաների վրա:

Օրգանիզմը կարգավորելու համար սկսեք ձեր սննդակարգում մեծ տեղ հատկացնել բանջարեղենին, մրգերին, ծովամթերքին, ինչպես նաև D վիտամին պարունակող սննդին: Օրվա ընթացքում նվազագույնը 3 անգամ սնվեք, դա կօգնի վերականգնել ուժերը:

Թարմացրեք ձեր զգեստապահարանը

Դասավորեք զգեստապահարանը և տեղափոխեք այնտեղից ձմեռային բլուզները: Տեղափոխություններից հետո մտածեք, թե գարնանը ինչ է պակասում ձեր զգեստապահարանում և գնացեք շոփինգի: Ամենահարմար եղանակն է ոճային փոփոխությունների: Բրենդային խանութների գարուն-ամառ նոր հավաքածուները ձեզ միանգամից կկողմնորոշեն նոր, թրենդային զգեստների, վերնաշապիկների կամ տաբատների գնման հարցում:

Ազատվեք ավելորդ իրերից

Զգեստապահարանի թարմացումից հետո մյուս տրամաբանական քայլը կլինի ձեր առօրյայում անհարմարություն առաջացնող ավելորդ և անպիտան իրերից ազատվելը: Դասավորեք ձեր պայուսակները, աշխատանքային սեղանը՝ բոլոր ավելորդ թղթերը նետեք աղբարկղը: Աղբարկղը նետեք նաև վատ հիշողությունները և վատ էմոցիաներ հաղորդող իրադարձությունների մասին հիշողությունները:

Փոփոխեք տան ինտերիերը

Մեր սիրելի տունը ամենամեծ ազդեցությունն է թողնում մեր հոգեկան աշխարհի վրա: Կարգի բերեք ձեր բնակարանը և տեղափոխություններ արեք՝ տեղափոխեք բազմոցն ու բազկաթոռները և մարզեք ձեր ռեֆլեքսները: Բնակարանին ավելացրեք նոր ու գեղեցիկ աքսեսուարներ, իսկ աշխատանքից վերադառնալիս գնեք ձեր սիրելի ծաղկեփունջը և դրեք այն հյուրասենյակի սեղանին:

Այցելեք բժշկի և կոսմետոլոգի մոտ

Հիվանդություններից պաշտպանվելու և սեփական ապահովության համար այցելեք բժշկի և ընդհանուր զննություն անցեք: Հավատացեք, առողջ լինելու զգացումը ձեր տրամադրությունը ավելի շատ կբարձրացնի և կվերականգնի ձեր ուժերը: Եղանակային փոփոխությունները կարող են ձեր մաշկի համար խնդիրներ առաջացնել: Այդ իսկ պատճառով այցելեք նաև կոսմետոլոգի և ստացեք ձեր մաշկը խնամելու և թարմություն հաղորդելու խորհուրդները: Մի քանի հանգստացնող դիմակները և մերսումները կկարգավորեն մաշկի բնականոն գործառույթները:

Չմոռանաք գեղեցկության սրահ գնալու մասին

Կոկո Շանելն ասել է. «Եթե կինը փոխում է սանրվածքը, ապա նա ուզում է փոխել իր կյանքը»:

Իսկական ժամանակն է սանրվածքի փոփոխությունների կամ մազերի գունափոխությունների համար: Ձեր նոր կերպարը կոգեշնչի և դուք ավելի էնտուզիազմով կնվիրվեք ձեր աշխատանքին:

Կարգավորեք առաջնահերթությունների ցուցակը

Գնեք նոր նոթատետր և թարմացրեք ձեր առաջանահերթությունների, նպատակների և երազանքների աղյուսակը: Մշակեք նոր գաղափարների իրականացման և ամառային հանգստի փառահեղ ծրագրերը: