Օրենսդրական նախաձեռնությամբ առաջարկվել է ստեղծել Վերաքննիչ հակակոռուպցիոն դատարան

2021 թ. ապրիլի 14-ին ընդունված ««ՀՀ դատական օրենսգիրք» սահմանադրական օրենքում լրացումներ եւ փոփոխություններ կատարելու մասին» օրենքով, որպես նոր մասնագիտացված դատարան, ձեւավորվել է Հակակոռուպցիոն դատարանը: Հակակոռուպցիոն գործերով արդյունավետ քննությունն ապահովելու նպատակով 2022 թ. փետրվարի 9-ին ընդունվել է ««ՀՀ դատական օրենսգիրք» սահմանադրական օրենքում լրացումներ եւ փոփոխություններ կատարելու մասին» օրենքը, որով ստեղծվել է Վճռաբեկ դատարանի հակակոռուպցիոն պալատը: Ներկայացված իրավակարգավորումների համատեքստում ստեղծվել է իրավիճակ, երբ գործում են հակակոռուպցիոն գործեր քննող մասնագիտացված դատարաններ Առաջին ատյանում եւ Վճռաբեկ դատարանում: Սակայն Վերաքննիչ քրեական դատարանում չկա առանձին դատարան, որը կքննի այդ հարցերը: Այս մասին Պետական-իրավական հարցերի մշտական հանձնաժողովի դեկտեմբերի 16-ի արտահերթ նիստում ասել է ՀՀ արդարադատության նախարարի տեղակալ Արմենուհի Հարությունյանը` ներկայացնելով ««ՀՀ դատական օրենսգիրք» սահմանադրական օրենքում փոփոխություն կատարելու մասին» եւ կից ներկայացված օրենքների նախագծերի փաթեթը: Այս մասին հայտնում է ՀՀ ԱԺ մամուլի ծառայությունը:

Կառավարության հեղինակած նախագծի նպատակն է ապահովել հակակոռուպցիոն քաղաքացիական եւ կոռուպցիոն հանցագործությունների վերաբերյալ գործերով կայացված դատական ակտերի վերաքննության կազմակերպումը մասնագիտացված` Վերաքննիչ հակակոռուպցիոն դատարանի կողմից:

Նախագծի ընդունման արդյունքում ստեղծվելու է Վերաքննիչ հակակոռուպցիոն դատարանը: Դատարանը կազմված է լինելու 12 դատավորներից, որոնցից 6-ը զբաղվելու են կոռուպցիոն հանցագործությունների վերաբերյալ գործերով, 6-ը` հակակոռուպցիոն քաղաքացիական գործերով կայացված դատական ակտերի դեմ բողոքների քննությամբ:

Ըստ Արմենուհի Հարությունյանի` փոփոխություններով նոր դատավորների թիվ ավելացնելու անհրաժեշտություն չի առաջանալու:

Նախագծով կկարգավորվեն նաեւ Վերաքննիչ դատարանում առաջխաղացման ենթակա դատավորների թեկնածուների ցուցակի վերաբերյալ կարգավորումները:

Հիմնական զեկուցողը տեղեկացրել է, որ ստացել են բազմաթիվ առաջարկներ պատգամավոր Արփինե Դավոյանից, որոնք համատեղ կարգով քննարկվել եւ ընդունվել են:

Ծավալուն աշխատանքի արդյունքում նախատեսվել են փոփոխություններ, որոնք ուղղված են դատավորների` ողջամիտ ժամկետների դատական վարույթների պահպանմանն ուղղված հարցերին:

Հանձնաժողովի նախագահ Վլադիմիր Վարդանյանը տեղեկացրել է, որ ԲԴԽ-ն նախաձեռնել է մի շարք քննարկումներ` դատաիրավական բարեփոխումների իրականացման հարցերի վերաբերյալ: Օրենսդրական նախաձեռնությունը մանրամասն քննարկվել է դատական իշխանության ներկայացուցիչների հետ: Նա կարեւորել է առաջարկների ընդունումը` դատական իշխանության բեռնաթափման եւ առավել արդյունավետ արդարադատություն իրականացնելու համար:

Հարակից զեկուցող Արփինե Դավոյանը, հակիրճ ներկայացնելով առաջարկվող փոփոխությունները, մասնավորապես, կարեւորել է դատարանների նախագահներին վերապահված նոր լիազորությունները, ըստ որոնց` հնարավորություն կստեղծվի ԲԴԽ սահմանված կարգով մշտադիտարկում իրականացնել դատարաններում գործերի քննության ողջամիտ ժամկետների պահպանման նկատմամբ:

Եզրափակիչ ելույթում Արմենուհի Հարությունյանը շնորհակալություն է հայտնել ծավալուն աշխատանքի համար` դատական համակարգի ծանրաբեռնվածությունն էականորեն թեթեւացնելու ուղղությամբ ներկայացված առաջարկությունների համար:

Լրամշակված նախագիծը ստացել է դրական եզրակացություն: