Իրանի իշխանությունների կողմից Ատոմային էներգիայի միջազգային գործակալության (ԱԷՄԳ) հետ համագործակցությունը դադարեցնելու որոշումը մտահոգության տեղիք է տալիս: Այս մասին ճեպազրույցի ժամանակ հայտարարել է համաշխարհային կազմակերպության ղեկավարի պաշտոնական ներկայացուցիչ Ստեֆան Դյուժարիկը:
«Մենք տեսել ենք պաշտոնական որոշումը, և դա ակնհայտորեն մտահոգության առարկա է։ Կարծում եմ՝ ՄԱԿ գլխավոր քարտուղար Անտոնիո Գուտերեշը շատ հետևողական է եղել Իրանին ուղղված՝ ԱԷՄԳ-ի հետ համագործակցելու կոչերում», – ասել է նա։
Դյուժարիկը հավելել է, որ դեռևս տեղեկություններ չունի այն մասին, թե արդյոք Իրանը պաշտոնական ծանուցում է ուղարկել ՄԱԿ-ին իր որոշման մասին։
Չորեքշաբթի օրը Իրանի նախագահ Մասուդ Փեզեշքիանը ստորագրեց օրենք, որը դադարեցնում է Թեհրանի և ԱԷՄԳ-ի միջև համագործակցությունը: Նախագահի կողմից փաստաթուղթը ստորագրելու պահից օրենքը համարվում է ուժի մեջ մտած և պարտադիր է կատարման համար:
