Գյումրիում հասանելի է առաջին վիրտուալ ցուցահանդեսը

Տեղեկատվական տեխնոլոգիաների կիրառությունն արվեստում հնարավոր է դարձնում թանգարաններ այցելել նաև ցուցադրությունների մասնակցել աշխարհի տարբեր ծայրերում՝ գտնվելով տանը։ Սա իրականություն է դարձել VR տեխնոլոգիաների կիրառությամբ։

Վիրտուալ աշխարհում՝ ինչպես իրականությունում․ արվեսատագետ Արտակ Թադևոսյանի արվեստանոցն ու ցուցադրությունը վերարտադրել են տեղեկատվական տեխնոլոգիաների ոլորտի գյումրեցի մասնագետները։ Ցուցադրությունը Գյումրիում է, բայց VR ակնոցների օգնությամբ հասանելի է ամբողջ աշխարհին։

Գյումրեցի Արտակ Թադևոսյանի մասին Հայաստանում ու դրա սահմաններից դուրս հայտնի դարձավ մի քանի տարի առաջ, երբ բացահայտվեց նրա անսովոր խորհուրդ ունեցող արվեստը՝ փամփուշտներից ու պարկուճներից զարդերի պատրաստումը։ Պարկուճները, որոնք ընդամենը մետաղի ջարդոն են, զարդեր է պատրաստում, դրանք վերածվում են գեղեցիկ կախազարդերի, ապարանջանների, մատանիների։

Ստեղծագործական մի քանի տարիների ընթացքում դրանք էսթետիկ զարգացում են ունեցել։ Հիմա վարպետն ավելի հմտորեն ու ավելի հղկված զարդեր է ստանում։ Նրա արվեստը շատերին է հետաքրքրում, իսկ արվեստանոցը զբոսաշրջային ուղղություններից մեկն է դարձել։

«Տարվա ընթացքում իմ արվեստանոց է այցելում 4-5 հազար զբոսաշրջիկ արտերկրից։ Ես տեսնում եմ նրանց զարմանքը, հիացմունքը և հասկանում եմ, որ նրանից, ինչը մահ է բերում և վտանգում է մարդու կյանքը, ես էսթետիկ իր եմ ստանում։ Երբ համաշխարհային պատմությունն ես ուսումնասիրում, տեսնում ես, որ սերը, արվեստը փրկում են աշխարհը։Հավատացեք՝ կգա մի օր, որ ագրեսիա ծնողներն էլ կգիտակցեն, որ արվեստով ապրելն ավելի խաղաղ է, ավելի հանգիստ է»,- SHANTNEWS-ին  ասել է արվեստագետ Արտակ Թադևոսյանը։

Ասլամազյան քույրերի պատկերասրահի մի անկյունում Արտակ Թադևոսյանի զարդերի կողքին նաև քանդակներն ու աբստրակտ՝ ժամանակակից արվեստի գործերն են ցուցադրվում։ Նկարչական աշխատանքներում ու քանդակներում ասելիքը նույնն է՝ ինչ զարդերի դեպքում է․ խաղաղության կոչ, պայքար պատերազմների ու բռնությունների դեմ։

Արտակ Թադևոսյանի աշխատանքները մարտ ամսին ցուցադրվելու են Ամերիկայի Միացյալ Նահանգներում։ Միացյալ նահանգներում անհատական առաջին ցուցահանդեսը նաև առաջինն է լինելու, որը հասանելի կդառնա վիրտուալ միջավայրում։ Բավական է հագնել VR ակնոցները և աշխարհի ցանկացած ծայրից կարող ես հայտնվել Արտակի արվեստանոցում կամ անհատական ցուցահանդեսին։

«2 րոպե հետո հայտնվում ես ցուցահանդեսում։ Բացարձակ տարբերություն չկա՝ դու իրական ցուցահանդեսում ես, թե մասնակցում ես ցուցահանդեսին քո տնից։ Սրան գումարած, որ այս հարթակը հնարավորություն է տալիս վարպետի աշխատանքները վերցնել, ուսումնասիրել։ Սա աշխարհում առաջին պրոյեկտներից է, որը հնարավորություն է տալիս վարպետի հետ ծանոթանալ, հաղորդակից լինել նրա ապրումներին, ստեղծագործական պրոցեսին»,-SHANTNEWS-ին ասել է «GO UP» ընկերության հիմնադիր Էդգար Ամիրյանը։

Մասնագետն է նշում՝ վիրտուալ ցուցահանդեսը 99 տոկոսով մոտեցված է իրականությանը, անգամ առավելություններ ունի։ Աշխարհի շատ թանգարաններ կարելի էր վիրտուալ հարթակում այցելել, բայց գյումրեցի մասնագետներն առաջինն են, որ ցուցահանդեսն են վիրտուալ տիրույթում հասանելի դարձնում։

Մասնագետները նպատակ ունեն Գյումրիի շատ այլ վարպետների աշխատանքների և պատմական կառույցների վիրտուալ  հասանելիությունն ապահովել։ Սա համարում են ներդրում զբոսաշրջության զարգացման գործում։ Այլևս Գյումրի այցելելու համար պարտադիր չի լինի երկար ճանապարհ անցնել։ Գյումրին կայցելի բոլոր ցանկացողներին։