ԴԱՀԿ-ն կալանք չի դնի և՛ «Ես եմ»-ի շահառուների, և՛ մյուս ժամկետայինների գումարների վրա. պարզաբանում

Պաշտպանության նախարարության նախագծով առաջարկվում է ԴԱՀԿ բռնագանձումների ենթակա միջոցների ցանկից հանել ոչ միայն «Ես եմ» ծրագրով զորակոչվածների, այլև մյուս բոլոր ժամկետայինների դրամական բավարարումները (գումարները, որոնք ամեն ամիս ստանում են զինծառայողները)։ Այս մասին ՀՀ ՊՆ մամուլի խոսնակը նշեց SHANTNEWS-ի հետ զրույցում՝ պարզաբանելով իր գրառումը։

««Հայկական ժամանակ» օրաթերթի մարտի 2-ի հրապարակված տեղեկատվությունն այն մասին, որ «Ես եմ» ծրագրով զինվորական ծառայության մեկնած որոշ զինծառայողների մասով առկա են դատական ակտերի հարկադիր կատարման կատարողական թերթեր, որի հիման վրա իրականացվում են դրամական գումարների բռնագանձումներ, չի համապատասխանում իրականությանը և ՀՀ պաշտպանության նախարարության կողմից գնահատվում է որպես ապատեղեկատվություն և փաստերի խեղաթյուրում»,– նշված էր Արծրուն Հովհաննիսյանի գրառման մեջ։

SHANTNEWS-ի հետ զրույցում Հովհաննիսյանը պարզաբանեց, որ կարգավորումը վերաբերում է բոլոր ժամկետային զինծառայողներին, և հիշատակված կալանքները վերաբերում էին ոչ թե «Ես եմ» ծրագրով զորակոչվածներին, այլ մինչ այդ զորակոչված և սովորական ժամկետային ծառայություն իրականացնողներին։

Հովհաննիսյանի գրառման համաձայն՝ 2017 թվականի դեկտեմբերից զինված ուժերում ժամկետային զինծառայողների գումարները փոխանցվել են բանկային քարտերի միջոցով՝ չարաշահումներից խուսափելու համար։ Այն, որ որոշ զինծառայողների դեպքում առկա են գումարների վրա բռնագանձում տարածելու վերաբերյալ կատարողական թերթեր, հայտնի է դարձել հենց դեկտեմբերին, երբ «Ես եմ» ծրագրով զորակոչ դեռ չէր եղել։

««Ես եմ» ծրագրով զորակոչիկները ՀՀ զինված ուժեր են զորակոչվել 2018թ. հունվարի 28-ին, իսկ նրանց դրամական ապահովության հաշվարկը առաջին անգամ իրականացվել է սահմանված կարգով՝ փետրվարի 20-ից հետո, որի պարագայում ՀՀ պաշտպանության նախարարության օրենսդրական նախաձեռնությունը չէր կարող կապված լինել «Ես եմ» ծրագրով զորակոչված զինծառայողների դրամական ապահովության հաշվարկման հետ», – նշվում է Արծրուն Հովհաննիսյանի գրառման մեջ։

Ապա նաև պարզաբանվում է, որ «Ես եմ» ծրագրով զորակոչված զինծառայողներից որևէ մեկի պարագայում ԴԱՀԿ-ի կողմից հարկային կատարման գործընթացի առկայություն չի արձանագրվել։

Ավելի վաղ տեղեկացրել էինք, որ ՀՀ ՊՆ նոր նախաձեռնությամբ առաջարկվում է ԴԱՀԿ մասին օրենքում կատարել փոփոխություններ ու բռնագանձման ենթակա միջոցների ցանկից բացառել հետևյալ զինծառայողների ու կուրսանտների հետևյալ խմբերի դրամական ապահովության ու պատվովճարի գումարները.

1. Պարտադիր զինվորական ծառայություն անցնող շարքային կազմի զինծառայողների դրամական ապահովություն,
2. Պարտադիր զինվորական ծառայություն անցնող կրտսեր ենթասպայական կազմի զինծառայողների դրամական ապահովություն,
3. Ռազմաուսումնական կամ ոստիկանական ուսումնական հաստատություններում սովորող կուրսանտների և սովորողների դրամական ապահովություն,
4. ՀՀ ՊՆ կողմից նշված վայրում և պայմաններում պարտադիր զինվորական ծառայություն անցած զինծառայողներին տրվող պատվովճար։

Վերջին կետում այլ բառերով նշված են ՀՀ ՊՆ «Ես եմ» ծրագիրն ընտրած զինծառայողները, որոնց ամսական տրվելու է 35 հազար դրամ և ավելի գումար։ Առաջարկվում է ոչ միայն նրանց 35 հազար դրամները, այլ նաև մյուս ժամկետայիններին ու կուրսանտներին տրվող ավելի փոքր գումարները հանել ԴԱՀԿ բռնագանձումների համակարգից։

Նախագծի, ինչպես նաև «Ես եմ» ծրագրով ու սովորական ժամկետային ծառայություն իրականացնողների վրա դրա ազդեցության վերաբերյալ ավելի մանրամասն կարող եք կարդալ այստեղ։