ԱԺ մարդու իրավունքների պաշտպանության և հանրային հարցերի մշտական հանձնաժողովը ՄԻՊ-ի պաշտոնում Ազգային ժողովին առաջարկել է Անահիտ Մանասյանի թեկնածությունը

ԱԺ մարդու իրավունքների պաշտպանության եւ հանրային հարցերի մշտական հանձնաժողովն ապրիլի 4-ի արտահերթ նիստում քննարկել է ՀՀ մարդու իրավուքների պաշտպանի պաշտոնում ընտրելու համար Ազգային ժողովին թեկնածու առաջարկելու մասին հարցը: Այամ ասին հայտնում են ՀՀ ԱԺ-ից:

Հանձնաժողովականները նախ հաստատել են քննարկման հատուկ ընթացակարգը:

ԱԺ «Պատիվ ունեմ» եւ «Հայաստան» խմբակցություններն այդ պաշտոնում առաջադրել են Էդգար Ղազարյանի թեկնածությունը:

ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանը, ներկայացնելով թեկնածուի կենսագրական տվյալները, շեշտադրել է նրա հասարակական եւ մասնագիտական կարողությունները:

Էդգար Ղազարյանը տնտեսագիտության թեկնածու է, դոցենտ: Զբաղեցրել է մի շարք բարձր պաշտոններ, աշխատանքային գործունեության ընթացքում դասավանդել է ՀՊՏՀ-ում:

Թեկնածուն 2019-2021 թթ. եղել է Սահմանադրական դատարանի աշխատակազմի ղեկավար: Հեղինակ է երեք տասնյակից ավելի գիտական հոդվածների:

Էդգար Ղազարյանը շնորհակալություն է հայտնել ընդդիմադիր խմբակցություններին իրեն առաջադրելու համար:

Նրա ելույթը Մարդու իրավունքների պաշտպանի տեսլականի մասին չի եղել:

Ըստ Էդգար Ղազարյանի` «Քաղաքացիական պայմանագիր» խմբակցության թեկնածուն առաջադրվել է Սահմանադրության խախտումներով:

ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը պարզաբանել է, որ Սահմանադրության խախտմանը կարող է գնահատական տալ միայն Սահմանադրական դատարանը: Նա գործընկերներին հորդորել է առաջնորդվել Հերոստրատի սկզբունքով` մոռանալ նրան:

«Քաղաքացիական պայմանագիր» խմբակցության քարտուղար Արթուր Հովհաննիսյանը ներկայացրել է խմբակցության առաջադրած թեկնածու Անահիտ Մանասյանի կենսագրական տվյալները: Նա ծնվել է Երեւանում, ավարտել է ԵՊՀ իրավագիտության ֆակուլտետը, իրավագիտության թեկանածու է, դոցենտ: Տասից ավելի մենագրության հեղինակ եւ համահեղինակ է: Փորձագիտական աշխատանքներ է իրականացրել եվրոպական երկրների մարդու իրավունքների պաշտպանի հաստատություններում:

Արթուր Հովհաննիսյանը վստահություն է հայտնել, որ Անահիտ Մանասյանն իր հարուստ փորձն ու գիտելիքները կներդնի ժողովրդի եւ երկրի շահերի պաշտպանությանը:

Անահիտ Մանասյանը մարդու իրավունքների պաշտպանության գործում կարեւորել է հանրային հանդուրժողականության կատարելագործումը հասարակության շրջանում: «Մեր բոլորի խնդիրն այն պետք է լինի, որ արձանագրելով խնդիրները` միասնական ջանքերով գտնենք համատեղ լուծումներ»,- ասել է Անահիտ Մանասյանը:

Թեկնածուն շեշտադրել է համագործակցության մթնոլորտում հարցերի լուծման անհրաժեշտությունը: Ըստ նրա` մարդու իրավունքների պաշտպանության ոլորտները զարգացման կարիք ունեն:

Անահիտ Մանասյանն իր ամբողջ ջանքերը, կապերն ու փորձը կներդնի Արցախի մեր հայրենակիցների իրավունքների պաշտպանության գործում:

«ՄԻՊ-ի պաշտոնը ենթադրում է բարձր պատասխանատվություն եւ բարեվարքություն»,- նշել է Անահիտ Մանասյանը:

Պատասխանելով հանձնաժողովի նախագահի տեղակալ Ռուստամ Բաքոյանի` ազգային փոքրամասնությունների վերաբերյալ հարցին` Անահիտ Մանասյանը փաստել է, որ ՄԻՊ-ի ամբողջ գործիքակազմը կներդնի ազգային փոքրամասնությունների հարցերի լուծմանը:

«Քաղաքացիական պայմանագիր» խմբակցության պատգամավորները պատրաստակամություն են հայտնել բոլոր հարցերում աջակցել նրան: Մարդու իրավունքների պաշտպանի գործառույթներն իրականացնելու համար կարեւորվել է հանդուրժողականության մթնոլորտի ապահովումը:

«Ես պատրաստ եմ աշխատել բոլորի հետ»,- ասել է Անահիտ Մանասյանը

Հանձնաժողովականները 4 կողմ ձայնով ՀՀ մարդու իրավունքների պաշտպանի պաշտոնում ընտրելու համար Ազգային ժողովին առաջարկել են Անահիտ Մանասյանի թեկնածությունը:

Էդգար Ղազարյանը ստացել է 1 կողմ ձայն: