Ամեն տարի ուսումնասիրում ենք 1500-1600 կմ ճանապարհներ, որ վերջնարդյունքում մոտ 500 կմ ասֆալտապատենք. Սանոսյան

Ազգային ժողովն ապրիլի 20-ին շարունակել է արտահերթ նիստում քննարկել «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի եւ արդյունքների մասին» զեկույցը:

ՀՀ տարածքային կառավարման եւ ենթակառուցվածքների նախարար Գնել Սանոսյանը պատասխանել է պատգամավորների հարցերին, որոնք վերաբերել են ոռոգման ցանցի բարեփոխմանն ու նոր ջրամբարների կառուցմանը, համայնքային անբարեկարգ ճանապարհների վերանորոգմանն ու ճանապարհաշինական ծրագրերին, ընդերքօգտագործման հարցերին, մասնավորապես, ավազի ապօրինի արդյունահանմանը, սուբվենցիոն ծրագրերին, մանկապարտեզների կառուցմանը, Հայաստանից էլեկտրաէներգիայի արտահանմանն ու ՀՀ բնակչության համար էլեկտրաէներգիայի սակագնի նվազեցման հնարավորությանը, համայնքներում մարզադահլիճների եւ լողավազանների կառուցման հնարավորությանը եւ այլն: Այս մասին հայտնում են ՀՀ ԱԺ-ից:

Անդրադառնալով ճանապարհաշինության եւ դրանց վերանորոգման հարցերին` նախարարը նշել է, որ ճանապարհները, որոնց մասին բարձրաձայնվում է, իրոք, վատթար վիճակում են.

«Ամեն տարի ուսումնասիրում ենք 1500-1600 կմ ճանապարհներ, 1000-ի նախագիծն ենք կազմում, որպեսզի 800 կմ ճանապարհի շինարարություն սկսենք, որ վերջնարդյունքում մոտ 500 կմ ասֆալտապատենք: Առաջնահերթ վերանորոգվում են միջպետական, ապա հանրապետական ու տեղական նշանակության ճանապարհները»:

ԱԺ «Քաղաքացիական պայմանագիր» խմբակցության պատգամավոր Հայկ Ցիրունյանը նախարարից հետաքրքրվել է Արաքս գետի ափամերձ եւ սահմանամերձ հատվածներից ավազի արդյունահանմամբ` նշելով, որ անօրինական արդյունահանումն ավելացել է: Պատգամավորի տեղեկացմամբ ԱԺ տնտեսական հարցերի մշտական հանձնաժողովի անդամներն այցելել են Արաքս գետի ափամերձ շրջաններ եւ ամեն ինչ տեսել սեփական աչքերով: Հայկ Ցիրունյանի խոսքով տնտեսվարողները խնդրում են արդիականացնել նոր հանքերի կամ եղածի ծավալների ավելացման լիցենզավորման կարգը:

«Անհրաժեշտ է նաեւ ավելացնել տեսչական մարմինների վերահսկողական գործառույթներն ու լիազորությունները»,- ասել է պատգամավորը` պարզաբանելով, որ առաջարկների նպատակը գետի ավազի ճիշտ լվացումն ու հետեւաբար գետի պահպանությունն է:

«Կարեւոր, ցավոտ եւ լուրջ խնդիրներ ունեցող ոլորտ ու հարց է: Այս խնդրի լրջությունը գիտակցելով` վարչապետի հանձնարարությամբ եւ որոշմամբ ստեղծվել է աշխատանքային խումբ, որն արդեն երկու նիստ իրականացրել է: Խմբում ընդգրկված են մի շարք մարմինների ներկայացուցիչներ: Հարցը բավական նուրբ է: Ամեն ինչ փակել, դադարեցնելն առաջին հայացքից կթվա հեշտ, բայց մյուս կողմից դա կբերի նրան, որ որոշ հատվածներում ստիպված կլինենք ամեն օր հսկել, որ նոր ապօրինի հանքեր չբացվեն մեկ գիշերում, երբ ինչ-որ տարածք սկսում են փորել, չորս մեքենա ավազ տանել, եւ հետո այդ տարածքը դառնա կիսաճահիճ մի վայր:

Երկրորդ խնդիրը երկրում ընթացող մեծածավալ շինարարությունն է, որին չպետք է վնասել»,- ի պատասխան ասել է նախարարը:

Ըստ նրա` առաջին հերթին պետք է ֆիքսել այն տնտեսվարողներին, որոնց գործունեության հետեւանքով Արաքսի հունի փոփոխություն է եղել, ինչն անթույլատրելի է: «Այդ ընկերություններին պետք է պարտադրել վերականգնել գետի հունն իրենց միջոցներով»,- ընդգծել է Գնել Սանոսյանը: Նա հույս է հայտնել, որ աշխատանքային խումբը խնդրի ճիշտ լուծումները կգտնի: