Գյումրիի դրամատիկական թատրոնից Հակոբ Հակոբյանի «Սարերում» որմնանկարը տեղափոխելու հարմար տարածք դեռ գտնված չէ

Հակոբ Հակոբյանի «Սարերում» որմնանկարը Գյումրիի  թատրոնի երկրորդ հարկի ճեմասրահում է  արդեն 7 տարի: Այն նախկին  «Քարհատ մեքենա» գործարանի ճաշարանային մասնաշենքում մի քանի տարի լքված մնալուց հետո վերականգնում են  Իտալիայի Ֆլորենցիա քաղաքի Ռեստավրացիայի ինստիտուտի  մասնագետները։

Հետո տեղափոխում են թատրոնի շենք այն ժամանակ, երբ ստեղծագործական խումբը հյուրախաղերում է եղել։ «Սարերում» որմնանկարը  տեղադրվում է  երկրորդ հարկի ճեմասրահում և հանձնվում է թատրոնի պահպանությանը։

«Շատ վայրենի ձևով են տեղափոխել՝ ամբողջ պատուհանները վնասելով։ Նկարը բաժանել են 6 մասի և պատուհաններից են ներս մտցրել, հետո պատուհաններն այդպես էլ թողել են, և քայքայումը պատուհանների սկսվեց հենց այդտեղից, որովհետև ինքը մեկ մարմին է և վնասել էին վերջին երկու մասերը։ Նաև վնասել են պղնձյա սյուները, տեսնում եք, որ պղինձները այրել են ու քցել հատակին, որ կարողանան  որմնանկարը ամրացնեն։ Հետո, երբ պատուհանները փոխվեն ու որմնանկարը տեղափոխվի, մենք արդեն մտածելու ենք, թե ինչպես ենք վերականգնելու արդեն թատրոնի ներսի ազգային արժեքը»,- նշում է Գյումրիի դրամատիկական թատրոնի տնօրեն Լյուդվիգ Հարությունյանը։

Տեղափոխությունից հետո թատրոնի պատուհանները չեն վերանորոգվել, պատուհաններից բացի վնասվել են նաև թատրոնի պղնձյա սյուները, որոնց էլ զոդման միջոցով ամրացրել են որմնանկարի երկաթե կառուցատարրը:

Որմնանկարի դիրքի ու տեղի ընտրությունը ճիշտ չի արվել, այն փակել է թատրոնի ճեմասրահի լուսավորությունը, գտնվում է միջանցիկ քամիների տակ։ Որմնանկարի  պահպանության համար անհրաժեշտ ջերմաստիճանային պայմաններն ապահովված չեն, ինչի պատճառով արդեն ճաքեր են տվել ։

Որմնանկարի տեղափոխության հարցը հիմա նորից օրակարգային է։  Թատրոնի վթարային պատուհաններն են փոխվելու։  Շինարարները երկաթե կոնստրուկցիաները տեղադրել են, բայց աշխատանքներում հիմա ժամանակավոր դադար է։ Չի լուծվել որմնանկարի տեղափոխության հարցը, որը  պարտադիր է։ Բայց որտե՞ղ ու ե՞րբ է լինելու տեղափոխությունը։ Որոշում կայացնող կողմը ԿԳՄՍ նախարարությունն է, իսկ քննարկումները դեռ ավարտված չեն։

«Մի քանի տարբերակներ նաև մենք ենք մտածել, բայց բացառության սկզբունքով անընդհատ փոփոխվում են, դրա համար էլ չեմ կարող նշել կոնկրետ որ տարածքներն է, քանի դեռ վերջնական որոշված չէ։ Կան տարածքներ, որոնք հիմա վերականգնվում կամ վերանորոգվում են։ Դրանից  հետո պարզ կդառնա՝ արդյո՞ք այդտեղ հնարավոր է տեղափոխել թե չէ, ի՞նչ պայմաններ են իրենք ապահովելու։ Ամեն ինչ կախված է դրանից»,-ShantNews. am-ի հետ զրույցում պարզաբանումներ է տվել  ԿԳՄՍ նախարարության պատմության և մշակույթի  հուշարձանների պահպանության վարչության պետի տեղակալ Լուսինե Իգիթյանը։

Նախարարության հուշարձանների պահպանության վարչության պետի տեղակալը հավաստիացնում է, որ տարածքի ընտրության հարցում առաջնորդվում են մեկ  կարևոր սկզբունքով՝ որմնանկարը պետք է մնա Գյումրիում։ Իր չափսերով  համապատասխան շատ տարածքներ քաղաքում չկան, բացի դրանից որմնանկարը  պետք է հանրության համար հասանելի լինի:

Տեղափոխությունից հետո մասնակի և որոշ հատվածներում վերականգնման անհրաժեշտություն կա։ Բայց նախարարության պատասխանատուն նաև հավելեց, որ մասնագիտական ուսումնասիրությամբ՝ «Սարերում» որմնանկարը այնքան էլ վատ վիճակում չի գտնում:

Տեղափոխության համար հանրային կամ  մասնավոր կառույցների որ տարածքներն են հարմար կամ նախընտրելի, հուշարձանների պահպանության բաժնի պատասխանատուն հստակեցումներ չուներ, միայն նշեց, որ տարբերակներից մեկն էլ Շիրակ օդանավակայանն է: