Բաքուն փորձում է խանգարել Երևանում Կլիմայի համաշխարհային գագաթնաժողովի անցկացմանը

Ադրբեջանը փորձում է տապալել Երանում՝ կլիմայի խնդիրներին նվիրված համաշխարային գագաթնաժողովն անցկացնելու Հայաստանի հայտը: Այդ նպատակով Ալիևի վարչակազմը Բաքվի թեկնածությունն է առաջարկել:

Երևանի՞, թե՞ Բաքվի շանսերն են ավելի բարձր. ինչո՞վ է պայմանավորված Կլիմայի գլոբար գագաթնաժողովի անցկացման վայրի հարցը: Թեմային «Հորիզոնի» տաղավարում անդրադարձել է Արտյոմ Երկանյանը:

«Այդ գագաթնաժողվն ամեն տարի անցկացվում է աշխարհի ինչ-որ մի հատվածում, աշխարհի բոլոր երկրները բաժանված են 5 խմբերի և 2024 թ.-ին գագաթնաժողովը պետք է կայանա Արևելյան Եվրոպայի երկրների խմբում, և Արևելյան Եվրոպայի 23 պետությունները մինչ այդ պետք է կոնսենսուսի եղանակով կողմնորոշվեն, թե որ երկրի մայրաքաղաքը պետք է ընդունի այդ հեղինակավոր և կարևոր միջոցառումը:

Հաշվի առնելով Ռուսաստանի և Արևմուտքի միջև առճակատումը՝ Մոսկվան դեռևս ամիսներ առաջ տեղեկացրել էր, որ կօգտվի վետոյի իր իրավունքից, եթե այդ գագաթնաժողովն անցկացնելու հայտ ներկայացնի  Եվրամիության անդամ մի պետություն: «Ռոյթերս» բրիտանական գործակալության տեղեկությունների համաձայն՝ ապրիլին Ռուսաստանը ՄԱԿ-ում Արևելյան Եվրոպայի պետությունների ներկայացուցիչներին է ուղարկել մի նամակ, որում տեղեկացնում է իր այս պլանների մասին:

Դեռ մինչ այդ Հայաստանն էր հայտ ներկայացրել, որպես Արևելյան Եվրոպայի պետություն, Երևանում այդ գագաթնաժողովն անցկացնելու վերաբերյալ: Իսկ երբ Ադրբեջանում իմացան, որ Ռուսաստանի այդ  դեմարշից, այդ քայլից հետո Երևանի  հայտը զգալիորեն ծանրանում է և իրատեսական է դառնում, շտապեցին իրենք էլ հայտ ներկայացնել՝ հավանաբար նպատակ չհետապնելով հենց Բաքվում միջոցառումն անցկացնելու, այլ պարզապես ցանկանալով տապալել Երևանի հայտը:

Իհարկե Բաքուն կարող էր պարզապես վետո կիրառել Երևանում միջոցառումն անցկացնելու հարցում՝ քվեարկելով դեմ, իսկ հարցն ինչպես ասացի, կոնսենսուսով է լուծվում, բայց այդ դեպքում այդ պահվածքն անընդունելի կլիներ անդամ մյուս պետությունների համար և Ադրբեջանի նկատմամբ հավանաբար ճնշում կգործադրվեր, ուստի Բաքվում ահա այսպիսի խորամանկ տարբերակ գտան՝ հավանաբար միտք ունենալով, որ արդյունքում կորոշեն ո՛չ Երևան, ո՛չ Բաքու, այլ ինչ-որ 3-րդ երկիր, միայն թե խուսափեն այդ բախումներից: Ինչևէ, կարծում եմ՝ Հայաստանի հայտը լուրջ քննարկվող հայտերից մեկն է և մենք դեռ հեռանկար ունենք»,-ասել է Արտյոմ Երկանյանը:

Երևանից ու Բաքվից բացի ուրիշ հավակնորդ քաղաքներ կա՞ն: Մանրամասները՝ ամբողջական հարցազրույցում: