«Չումբո» նախաձեռնող խմբի նախագահի հարցազրույցը SHANTNEWS-ին ամբողջությամբ

Հայտնի է, որ տարատեսակ միջոցառումներ կազմակերպող «Չումբո» նախաձեռնող խմբի և ԿԳՆ-ի միջև վերջերս որոշակի խնդիրներ են առաջացել: Երևանի մամուլի ակումնբներից մեկում այսօր այդ հարցն է քննարկվել պետական կառույցների պատասխանատուների մասնակցությամբ: Խնդրի վերաբերյալ SHANTNEWS-ը պարզաբանումներ է տվել «Չումբո» նախաձեռնող խմբի նախագահ Սմբատ Հակոբյանը:

«Մենք սկսեցինք ԿԳՆ-ի հետ համագործակցությունից, որից հետո քաղաքապետարանի հետ բանակցություններ վարեցինք: Քննարկեցինք ընդհանուր ծրագրերը և որոշեցինք, որ պիլոտային ծրագիր իրականացնենք, քանի որ նպատակներն ավելի հեռանակարային էին՝ դպրոցների ընդհանուր մշակութային կյանքի զարգացման հետ էին կապված: Պիլոտային ծրագրով պետք է հասկանայինք բացթղումները, թերությունները, առավելությունները», –SHANTNEWS-ին ասել է նախաձեռնող խմբի նախագահը:

Հիշեցնենք, որ այսօր հրավիրված մամուլի ասուլիսի ժամանակ ԿԳՆ հանրակրթության վարչության պետ Աշոտ Արշակյանը ևԵրևանի քաղաքապետարանի աշխատակազﬕ հանրակրթության վարչության պետ Աննա Ստեփանյանն ասել են, որ ո՛չ նախարարությունը, և ո՛չ էլ քաղաքապետարանը  «Չումբո»-ի հետ համագործակցության ծրագիր չեն ունեցել: Ըստ նախարարության՝ իրենց ծրագիր չի էլ ներկայացվել, իսկ Երևանի քաղաքապետարանի ներկայացուցչի խոսքերով ներկայացվել է, բայց իրենք հավանության չեն արժանացրել, քանի որ դպրոցական կյանքի կազմակերպման չափանիշներին չի համապատասխանել: Թույլտվություն չի եղել:

«Թույտվություն ստացել ենք, եթե չէ՝ բա ո՞նց ենք աշխատել 100 դպրոցների հետ: Գրավոր էլ ենք ունեցել, բանավոր էլ ենք ունեցել: Բա 100 դպրոցների հետ մենք ո՞նց ենք 2 տարի համագործակցում, ո՞նց ենք 40 հազար աշակերտների սովորացրել հայ ազգային «Քոչարի» պարը դասաժամերի հաշվին, ո՞նց են 40 հազար երեխաների համար կազմակերպվել տոնախմբություններ, ո՞նց են տնօրենները, ծնողկոմիտեները, ծնողները համաձայնել: Այսինքն՝ բնականաբար պետք է թույլտվություն եղած լինի, որ էդ ամեն ինչը կազմակերպված լինի: Հակառակ դեպքում չէր լինի: Մենք ԿԳՆ-ի հետ մի քանի հանդիպում ենք ունեցել, անձամբ նախարարի հետ՝ երկու հանդիպում է եղել», – հավելել է Հակոբյանը:

«Չումբո» նախաձեռնող խմբի կարծիքով խնդիրն առաջացել է, երբ 2017 թվականի ուսումնական տարվա ավարտին՝ 40 հազար աշակերտների համար միջոցառում են կազմակերպել: Դրանից հետո նրանք սկսել են ոմանց խանգարել։

«Երբ տեսան, թե մեր կողքին շատ մեծ ուժեր կան կանգնած, թե՛ Հայաստանից, թե՛ դրսից, շատ մեծ գումարներ են ներդրվում ծրագրերի շրջանակներում, մեր թիմը կարողանում է շատ հստակ կազմակերպել այդ ծրարգերը, սկսվեցին թե՛ լրատվամիջոցների կողմից, թե՛ կայքերի, հասարակության ու ղեկավարության կողմից խնդիրներ դրվել: Շատ հստակ երևում է, որ ինչ-որ մարդ կամ կառույց կա, որին պետք է լարվածություն ձևավորել: Բարձրացան ինչ-որ հարցադրումներ, որ սա խանգարում է, սա քաղաքական աշխատանք ա: Նշեմ, որ քաղաքականության հետ մենք բացարձակ կապ չունենք: Ոչ մի պաշտոնյայի հետ մենք խնդիր չունենք», –ասել է Սմբատ Հակոբյանը՝ չհերքելով, որ իրենք, այնուամենայնիվ, դպրոցներում միջոցառումներ կազմակերպել են նաև 2017 թվականի մայիսից հետո:

Ըստ Հակոբյանի՝ հաջորդ պատճառը կարող է լինել իրենց հայտարարությունը, որտեղ նշել էին, որ հանդիպել են ՀՀ ԿԳ նախարար Լեւոն Մկրտչյանին և փոխնախարար Մանուկ Մկրտչյանի հետ ու երկու ժամ տևած ջերմ զրույցի ավարտից հետո որոշվել է ՀՀ բոլոր հիմնական և ավագ դպրոցների, բուհերի և այլ կրթական հաստատություների միջոցառումները վստահել «Չումբո» նախաձեռնող խմբին:

Նախաձեռնող խմբի խոսքերով՝ ժողովուրդն այս հայտարարությունը սխալ է հասկացել. խոսքն ամենևին էլ դպրոցները «Չումբո»-ին տալու մասին չէ:

Հիշեցնենք, որ այս հայտարարությունից հետո հաղորդագրություն տարածեց նաև ԿԳՆ-ը՝  այս պնդումն ապատեղակատվություն որակելով և պահանջելով «Չումբո»-ից հեռացնել իրականությունն աղավաղող տեսանյութը և հաղորդագրությունը համացանցից, ինչը նախաձեռնող խումբը դեռ չի արել:

Հարցին՝ իսկ ի՞նչ ուժեր են ձեզ աջակցում, նախաձեռնող խմբի նախագահը SHANTNEWS-ին  այսպիսի պատասխան է տվել.

«Այդպիսի հարցադրումներ, որ մեր կողքին կանգնած է ԱՄՆ, մեր կողքին կանգնած է ՌԴ-ն, ինչ-որ ուժեր են կանգնած կամ աղանդավորները, ոչ մի նմանատիպ բան չկա: Այո, մեր կողքին, բնականաբար կանգնած են ուժեր, թե ԱՄՆ-ից, թե ՌԴ-ից, շատ ազդեցիկ մարդիկ, ովքեր մեր ընկերներն ու գործընկերներն են, ովքեր մեզ աջակցում են հայանպաստ ծրագրեր իրականացնելու»:

Ինչ վերաբերում է «Չումբո»-ի ֆեյբուքյան էջում տեղ գտած դատարկ շշերի, մերկապարուհիների նկարներին, ապա Հակոբյանի խոսքով, դա իրենց անցյալն է, երբ միջոցառումներ կազմակերպելով բիզնես էին անում, հիմա անցել են բարեգործությանը:  Հիմա էլ նոր ծրագիր են մշակում, որպեսզի դարձյալ ԿԳՆ-ներկայացնեն և հաստատվելու դեպքում շարունակեն դպրոցներում միջոցառումներ կազմակերպել: