«Մենք ունեցել ենք շանս ավելին ստանալու, մենք այդ շանսից զրկվել ենք». Մարուքյան

ԱԺ «Ելք» խմբակցության պատգամավոր Էդմոն Մարուքյանի խոսքերով՝ Հայաստանը չի տանում երկու ինտեգրացիոն գործընթաց: Ըստ պատգամավորի՝ ինտեգրացիոն գործընթաց տարվել է միայն ԵԱՏՄ-ի հետ: Նա այս մասին նշել է ԱԺ-ում քննարկվող ՀՀ-ԵՄ համաձայնագրի վավերացման նախագծի քննարկման ժամանակ:

«Հայաստանը պետք է թարմացներ ԵՄ-ի հետ իր հնացած պայմանագիրը, որը թարմացվել է և մենք ողջունել են: Աջակցել ենք, որ այս պայմանագիրը ստորագրվի: Այո, մենք ունեցել ենք շանս ավելին ստանալու, մենք այդ շանսից զրկվել ենք»,- ասաց Մարուքյանը:

Նա նշեց, որ ՀՀ իշխանությունները երկու բան ունեն, որ ամբողջ աշխարհի երեսին ասում են. առաջինը, որ երկիրն անցել է խորհրդարանական կառավարման, ինչը, ըստ Մարուքյանի, պարզվեց՝ սուտ է:

«Երկրորդը՝ որ մենք ԵՄ-ի հետ ստորագրել ենք համաձայնագիրը, վաղն էլ վավերացնելու ենք: Մենք պահանջելու ենք, որ Հայաստանը անցնի ոչ իմիտացիոն, իրական խորհրդարանական կառավարման: Մենք ամեն բան անելու ենք, որ այս համաձայնագիրը կյանքի կոչվի: Այս ամբիոնից հնչում է, տեսաք՝ մենք ինչ արինք, ի՞նչ եք արել: Արձանագրվեց էս փաստը, էս ոլորտում էն փաստը, ոչ մի փաստ էլ չի արձանագրվել: Արձանագրվել է, որ Հայաստանը ստորագրել է այս համաձայնագիրը: Այո, վաղն էլ կվավերացնի համաձայնագիրը, բայց խաղը սկսվելու է դրանից հետո»,- ասաց Մարուքյանը:

Պատգամավորը նաև հռետորական հարց հնչեցրեց՝ Հայաստանը կստեղծի՞ հակակոռուպցիոն մի մարմին, այնպիսի վստահելի մարդկանցով, որոնք կպայքարեն կոռուպցիայի դեմ, Հայաստանն այնպես կանի՞, որ ունենանք անկախ դատական համակարգ, Հայաստանն այնպես կանի՞, որ ՏՄՊՊՀ-ն չլինի այնպիսին, ինչպիսին այսօր է, այնպես կանի՞, որ հաշվեքննիչ պալատն այնպիսին լինի, որ իր առաքելությունն իսկապես կատարի:

«Մենք, բնականաբար, կասկածներ ունենք և լինելու ենք դրա պահանջատերը: Որ հարթակում էլ ասեք, որ Հայաստանը խորհրդարանական երկիր է դարձել, մենք պետք է ասենք, որ սուտ եք ասում: Ես ձեզ տեղեկացնում եմ՝ բոլոր հարթակներում, եթե ասեք, որ ԵՄ-ի համաձայնագրով եսիմ ինչեր ենք արել, ու արած չեղաք, էլի ասելու ենք՝ սուտ եք ասում»,- նշեց Էդմոն Մարուքյանը: 

Նա նաև շեշտեց, որ իրենք պայքարելու են, որ լինեն Սահմանադրությամբ հակակշռող մեխանիզմները և փոխզսպող ինստիտուտները:

Ինչ վերաբերում է Հայաստանի անվտանգության խնդրին, Մարուքյանի խոսքերով՝ Հայաստանն իր անվտանգությունը կարող է ապահովել տնային աշխատանքով: Ըստ նրա՝ պետք է ունենալ հզոր տնտեսություն, որի վրա կարող է հենվել հզոր բանակը:

«Մինչև այդ տնային աշխատանքը չանենք, չենք կարող ունենալ անվտանգություն: Ոչ մի Ռուսաստան, ոչ մի Եվրամիություն, ոչ մի Ամերիկա մեր անվտանգության երաշխավորը չեն»:

Էդմոն Մարուքյանը նշեց նաև, որ իրենց վրա են վերցրել ՀՀ-ԵՄ համաձայնագիրը մոնիթորինգի ենթարկելու ծանր բեռը: