Արմեն Աշոտյանը վարչապետին խնդրեց օպերատիվ կապի միջոցով ճշտել մեր երկու գերիների ճակատագիրը

ՀՀԿ խմբակցության անդամ Արմեն Աշոտյանն ԱԺ հայտարարությունների ժամին իր ելույթը սկսեց` հայտնելով, որ իր հայտարարության թեման ներքին քաղաքականությանը չի վերաբերում:

«Այսօր ներքաղաքական հարցերի մասին չեմ խոսելու, ուստի, կխնդրեմ այն հայրենակիցներին, ովքեր գուցե չեն հավանում իմ քաղաքական տեսակետները կամ ինձ չեն սիրում և հիմա նայում են ուղիղ եթերը, գրեն իրենց մշտական քոմենթները՝ «Սերժի ստրուկ», «քաչալ»: Գրեք, որ խոսենք ղարաբաղյան խնդրի մասին»,- ասաց նա:

Աշոտյանը նշեց, որ ցանկանում է խոսել մի թեմայի մասին, որտեղ իշխանություն-ընդդիմություն տարանջատումը երբեք պետք է ճակատագրական չդառնա: Նա ասաց, որ բոլորը հետաքրքրությամբ հետևեցին ՀՀ վարչապետ Նիկոլ Փաշինյանի հաղորդագրությանն առ այն, որ Ալիևի հետ ձեռք են բերվել որոշակի պայմանավորվածություններ:

«Սրտանց ուզում եմ հավատալ, որ այդ պայմանավորվածությունները կյանքի կկոչվեն, որովհետև եթե անգամ մի զինվորի կյանք է փրկվելու դրանց շնորհիվ, դրանց արժե գնալ, այնուհանդերձ ունեմ որոշակի մտահոգություններ: Ես պարոն վարչապետին կխնդրեմ այնուհանդերձ չկորցնել զգոնությունը: Ուզում եմ վերահաստատել, որ Ադրբեջանին ՀԱՊԿ թողնել չի կարելի: Երկրորդը` Վիեննայի, Սանկտ Պետերբուրգի, Ժնևի պայմանավորվածություններն ուժի մեջ են և պետք է կյանքի կոչվեն: Երրորդը` Ադրբեջանի նախագահի մամուլի խոսնակն այդ պայմանավորվածությունները մեկնաբանեց «տեսա՞ք, բա որ ասում էի` Ադրբեջան-Հայաստան բանակցային բանաձևն է, Ղարաբաղ չի լինելու» ոճի մեջ»,- նշեց պատգամավորը:

ՀՀԿ-ական պատգամավորն ընդգծեց նաև վարչապետ Նիկոլ Փաշինյանի և իրենց ընդհանուր տեսակետը, այն է` առանց Արցախի ժողովրդի որոշման, այդ հակամարտությունը չի կարգավորվելու: Աշոտյանն ընդգծեց, որ պետք է շատ չտարվել այն հանգամանքով, որ Ադրբեջանի նախագահը բարեկիրթ է, կիրթ է, գուցե նաև շնորհքով է, թե չէ «օրենքի տառը չի պահպանի և շնորհքով կներխուժի Արցախ», այդ պարագայում, ըստ Աշոտյանի, ոչ թե Նիկոլ Փաշինյանի ուղիղ եթերները կդիտենք, այլ բոլորովին այլ կադրեր տեսնելու հնարավորություն կունենանք:

Նա խնդրանքով դիմեց վարչապետին:

«Հայաստանում իշխանությունը վերարտադրելու, իշխանության մնալու ցանկությունը հետաքրքիր է, կարևոր է, քաղաքական գործչի համար բնական է, բայց հանկարծ դրա խաթր երկիրը չներքաշեք մեզ չվերաբերող աշխարհաքաղաքական խաղերի մեջ: Եթե այդ օպերատիվ կապը ճշտվել է, խնդրում եմ` ճշտեք մեր երկու գերիների` Կարեն Ղազարյանի և Զավեն Կարապետյանի ճակատագրերը. մենք կարծես մոռացել ենք, որ ունենք սահմանը հատած, ադրբեջանական գերության մեջ ընկած ՀՀ երկու քաղաքացի, որոնց վերագրվում են ռազմական որոշակի հանցագործություններ: Կարծում եմ` Փաշինյան – Ալիև այս փոխըմբռնման կարևոր պտուղներից մեկը` գոնե կարճաժամկետ, կարող է լինել այն բարի կամքը, որ մեր գերիներն անհապաղ արձակվեն, վաղն այս ամբիոնից վարչապետի կողմից կսպասեմ նրանց մասին հավելյալ տեղեկությունների»,- ասաց Աշոտյանը:

ԱԺ փոխխոսնակ, ՀՀԿ անդամ Էդուարդ Շարմազանովն արձագանքեց.

«Ցավոք, այստեղ չեմ լինի, չեմ կարող հետևել ձեր հարցուպատասխանին»: