Մեծ տարբերություն չեմ նկատել` ՀԱՊԿ-ում Յուրի Խաչատուրո՞վն է, թե՞ Ղազախստանի կամ ՌԴ-ի ներկայացուցիչը. Իգիթյան

Միջազգային փորձագետ Հովհաննես Իգիթյանի կարծիքով` Հայաստանի` ՀԱՊԿ գլխավոր քարտուղարի պաշտոնը պահպանել-չպահպանելու հարցին չափից մեծ նշանակություն է տրվում: SHANTNEWS.am-ի հետ զրույցում, անդրադառնալով ՀԱՊԿ գլխավոր քարտուղարի պաշտոնից Յուրի Խաչատուրովին հետ կանչելուց հետո այդ պաշտոնը պահպանել-չպահպանելու հարցին, Իգիթյանը նշեց.

«Եթե նայենք այն ազդեցությունը, որն ունեցել է այս դեպքում, օրինակ՝ Յուրի Խաչատուրովի ներկայությունը ՀԱՊԿ-ում` այն իրավիճակների վրա, որ մենք ունեցել ենք Ադրբեջանի կողմից հենց Հայաստանի հանդեպ, ես այստեղ մեծ տարբերություն չեմ նկատել` այնտեղ Յուրի Խաչատուրո՞վն է, թե՞ Ղազախստանի ներկայացուցիչը կամ Ռուսաստանի, այսինքն՝ ես չգիտեմ` դա կապված է հենց Յուրի Խաչատուրովի անձի՞, թե՞ ընդհանրապես Գլխավոր քարտուղարի լիազորությունների հետ:

Նկատի ունեմ, որ ՀԱՊԿ-ի կողմից Հայաստանին որևէ աջակցություն այդ լարվածության իջեցման հարցում չեմ նկատել այս ընթացքում` ՀԱՊԿ-ի գոյության ընթացքում և հատկապես Յուրի Խաչատուրովի օրոք: Մենք չենք զգացել Յուրի Խաչատուրովի` ՀԱՊԿ-ում Հայաստանի ներկայացուցիչ լինելու որևէ պոզիտիվ ազդեցություն»:

Իգիթյանի խոսքով` այն, թե ՀԱՊԿ-ը որպես ինստիտուտ ինչով կարող էր օգնել Հայաստանին անվտանգության հարցերով և Ադրբեջանի ագրեսիան իջեցնելու տեսակետից, ինչպես նաև զուտ Հայաստանի ներկայացուցիչ Յուրի Խաչատուրովի դերը այդտեղ առանձին քննարկելի հարցեր են: Նա նշեց` պարզվեց, որ հետկանչի մեխանիզմ ընդհանրապես գոյություն չունի: Փորձագետը կարծում է` սա այն դեպքն է, երբ անձը, տեսնելով, որ իր ներկայությունը` քրեական պատասխանատվության ներքո, վարկաբեկում է կազմակերպությունը, ինքը պետք է հրաժարական տար, բայց, փաստորեն, մենք ունեցել ենք այս իրավիճակը:

Հիմա Հայաստանը կպահպանի՞ իր քվոտայով նախատեսված ՀԱՊԿ գլխավոր քարտուղարի պաշտոնը, թե՞ ոչ, սա ևս, ըստ Իգիթյանի, առանձին քննարկելու հարց է, որովհետև որևէ ձևով կանոնակարգը այս հարցը չի նախատեսել: Փորձագետն ընդգծեց` ինքը մեծ նշանակություն չէր տա դրան կոնկրետ Յուրի Խաչատուրովի դեպքում, քանի որ չի կարծում, թե վերջինիս` այդտեղ ներկայությունը որևէ ձևով օգնում էր Հայաստանին:

Հարցին` անձի գործոնը, ամեն դեպքում, կարո՞ղ է նշանակություն ունենալ, Իգիթյանը դրական պատասխանեց.

«Անձի գործոնը, իհարկե, նշանակություն կարող է ունենալ, բայց Յուրի Խաչատուրովն այդ անձը չէր, որ Հայաստանի շահերը պատշաճ ձևով ներկայացներ այդտեղ»:

ՀԱՊԿ գլխավոր քարտուղարի պաշտոնում այլ երկրի կողմից ոչ հայամետ դիրքորոշում ունեցող թեկնածուի առաջադրման հավանականությանը փորձագետն արձագանքեց կոչով` բոլոր հնարավոր իրավիճակները նախապես չփորձել հասկանալ: Նա ասաց.

«Եթե կներկայացվի մի անձ, որը հայտնի է իր հակահայկական հայտարարություններով կամ ՀԱՊԿ-ի դերը չհասկացող կամ մեր պատկերացումների հակառակ հասկացող անձ, ինձ թվում է` Հայաստանն իր վերաբերմունքը ցույց կտա: Ես չգիտեմ` լուծվե՞ց արդյոք այդ հարցը` Հայաստա՞նը պետք է շարունակի ունենալ իր քվոտան, թե՞ մեկ այլ երկիր: Ի վերջո, կգար մի պահ, երբ այլ երկրի քվոտայով որևէ մեկը պետք է առաջադրվեր, այսինքն` նշանակություն չուներ` դա այսօ՞ր կլիներ, թե՞ հետագայում:

Իմ կարծիքով` մենք այդ ամենին ավելի ինստիտուցիոնալ պետք է նայենք, այն է` ՀԱՊԿ-ը որպես ինստիտուտ արդարացնո՞ւմ է Հայաստանի պատկերացումները հավաքական անվտանգության, կոնկրետ մեր անվտանգության հարցում: Եթե ոչ` ապա մենք կանոնակարգում պետք է մտցնենք համապատասխան փոփոխություններ, այնպիսի փոփոխություններ, որ անձից կախված չլինի, այսինքն` այնպես չլինի, որ երբ պրոհայկական ներկայացուցիչ լինի, Հայաստանը շահի, հակահայկականի դեպքում Հայաստանը տուժի: Հարցը ավելի գլոբալ է, քան այնտեղ Յուրի Խաչատուրովի կամ այլ թեկնածուի ներկայությունը»: