Պայքար հակամանրէային միջոցների կայունության դեմ

2015-ից ամբողջ աշխարհում անցկացվում է հակամանրէային միջոցների նկատմամբ կայունության՝ հակամանրէային ռեզիստենտականության, դեմ պայքարին նվիրված իրազեկման միջոցառումների շաբաթ: Այս նախաձեռնությունը հիմնված է «Մեկ Առողջության» սկզբունքի վրա՝ կարևորելով նախ և առաջ հանրային առողջության պահպանումը, ինչը թիրախում ունենալով էլ 2015 թվականին ՀՀ կառավարությունը հաստատել է հակամանրէային միջոցների նկատմամբ կայունության հսկողության և կանխարգելման ռազմավարությունը:

Հակամանրէային միջոցների նկատմամբ մանրէների կայունությունը արդի և գլոբալ խնդիր է ոչ միայն բժշկության, այլև անասնաբուժության և սննդամթերքի անվտանգության ոլորտներում:

Խնդրի կարևորությունը յուրաքանչյուրին և ամենուրեք հասցնելու ակնկալիքով էլ՝Սննդամթերքի անվտանգության տեսչական մարմինը նոյեմբերի 12-16-ը հանրապետության ողջ տարածքում, ՄԱԿ-ի Պարենի և գյուղատնտեսության կազմակերպության աջակցությամբ, անցկացրել է սեմինարների ու հանդիպումների շարք անասնաբույժների, ֆերմերների, գյուղացիների, անասնաբուժական դեղատների ներկայացուցիչների հետ: Մինչ այդ՝ շաբաթը մեկնարկել է ՀՀ առողջապահության նախարարի տեղակալի և Սննդամթերքի անվտանգության տեսչական մարմնի ղեկավարի համատեղ ասուլիսով:

Քարոզարշավի նպատակն էր բացատրել, որ ամենապարզ գործողությունները կարող են հանգեցնել ցանկալի արդյունքների՝ բացառելով կամ նվազագույնի հասցնելով հակամանրէային միջոցների օգտագործումը:

Վարակի հսկողությունը և կանխարգելումն արդյունավետ միջոցներ են հակամանրէային միջոցների նկատմամբ կայունության դեմ պայքարում, քանի որ նվազեցնում են վարակի տարածումը, կանխում միկրոօրգանիզմների փոխանցումը և կրճատում հակամանրէների նշանակման պահանջը՝ կանխելով հակամանրէային միջոցների նկատմամբ կայունության առաջացումը:

Իրավամբ է ասված՝ դու այն ես, ինչ ուտում ես: Հակամանրէային դեղերի նկատմամբ կայունությունը գյուղատնտեսության, սննդի անվտանգության խնդիր է,  քանի որ անասնաբուծության, անասնաբուժության, թռչնաբուծության, ձկնաբուծության ոլորտներում հակամանրէային դեղերը կիրառվում են ոչ միայն բուժման, այլև կենդանու աճը խթանելու նպատակներով: Արդյունքում  դեղակայուն մանրէները, սննդային շղթայի միջոցով, կարող են կենդանիներից անցնել մարդուն:

2018թ. հոկտեմբերին Եվրախորհրդարանն ընդունել է նոր օրենք, որն արգելում է կենդանիների աճը խթանելու համար հակամանրէների օգտագործումը: Ավելին, մարդկանց համար կենսական նշանակություն ունեցող մի շարք հակամանրէներ արգելվում է օգտագործել անասնաբուծությունում:

Համաձայն Առողջապահության համաշխարհային կազմակերպության հաշվարկների, եթե չիրականացվեն համապատասխան միջոցառումներ,  մինչև 2050 թվական աշխարհում կգրանցվի մոտ 10 մլն մահվան դեպք` պայմանավորված դեղակայուն վարակներով, իսկ դրանց տնտեսական վնասը կկազմի մոտ 100 տրլն դոլար:

Սննդամթերքի անվտանգության տեսչական մարմինը, բնականաբար, չի սահմանափակվի իրազեկման այս շաբաթով: Անասնաբուժների, ֆերմերների ու հակամանրէային միջոցներ վաճառողների գիտելիքները նախ կհստակեցվեն հարցաշարերի միջոցով, ապա կկազմակերպվեն պարբերական հանդիպումներ, սեմինարներ, անհրաժեշտության դեպքում նաև անհատական աշխատանք կտարվի հակամանրէային միջոցների նկատմամբ կայունության դեմ պայքարի միջոցների մասին հնարավոր ամենալայն տեղեկատվություն փոխանցելու համար: