Հետընտրական Վրաստան. երդմնակալության նախապատրաստություն և ձերբակալություններ

Վրաստանում առաջին անգամ պաշտոնապես հանդիպել են դեռևս գործող և նորընտիր նախագահները՝ քննարկելու դեկտեմբերի 16-ին կայանալիք նորընտիր նախագահի երդմնակալությանն առնչվող հարցեր:Վրաստանում աննախադեպ պատմական պահ են համարել Վրաստանի դեռևս գործող նախագահ Գեորգի Մարգվելաշվիլիի և նորընտիր 5-րդ նախագահ Սալոմե Զուրաբիշվիլիի հանդիպումը: Վրաստանում նախագահական ինստիտուտի գոյության ընթացքում դա առաջին նման հանդիպումն էր:

Նորընտիր նախագահի երդմնակալությունը տեղի կունենա դեկտեմբերի 16-ին, սակայն տեղը դեռ չի հրապարակվում: Հայտնի է միայն, որ այն կկայանա մայրաքաղաքից դուրս: Մինչ իշխանությունները պատրաստվում են երդմնակալության արարողությանը, Միավորված ընդդիմությունը դատական հայց է պատրաստում ընտրությունների արդյունքներն անվավեր ճանաչելու և նոր ընտրություններ անցկացնելու պահանջով:

«Օրենսդրական տեսանկյունից պահանջում ենք լիակատար փոփոխություն խորհրդարանական ընտրական համակարգում: Ընտրական միջավայրի փոփոխություն: Օրենքը պետք է սահմանի հատուկ զսպիչ կանոններ, որ քաղծառայողները չկարողանան մասնակցել բռնություններին»,- հայտարարել է Միացյալ ընդդիմության շտաբի պետ  Գեորգի Վաշաձեն:

Իշխանությունը հայտարարությունը լուրջ չի ընդունել և պատրաստվում է նոր նախագահի երդմնակալությանը: Շանթ ՀԸ-ին տված հարցազրույցում վրացի քաղաքագետ Գելա Վասաձեն մեկնաբանել է Վրաստանի ներկայիս քաղաքական վիճակը:

«Ընտրություններն ավարտված են: Հայտնի է հաղթողի անունը: Դեկտեմբերի 16-ին նշանակվել է երդմնակալությունը: Ընդդիմությունն, իհարկե, չի ընդունում արդյունքները և, անկեղծ ասած, տարօրինակ կլիներ, եթե ընդուներ, որովհետև տեղի են ունեցել մի շարք խախտումներ: Երեկ բողոքի ակցիա էին անցկացրել Թբիլիսիում: Մասնակցությունը սակավաթիվ էր: Իսկ լայնամասշտաբ միջոցառումներ կազմակերպելու համար ընդդիմությունը միջոցներ չունի: Անկեղծ ասած՝ այս պահին հեղափոխական սցենար չեմ տեսնում »,- ասել է քաղաքագետ Գելա Վասաձեն:

Երեկ ընդդիմության բողոքի ակցիային զուգահեռ իշխանությունները հայտարարեցին Թբիլիսիի 2 հյուրանոցներում ուկրաինացի 6 և մեկ վրացի նախկին զինծառայողի ձերբակալության, նրանց մոտ հայտնաբերված զենքի և Վրաստանում նախապատրաստվող հեղաշրջման նախապատրաստման մասին: Նրանք  ուկրաինական «Դոնբաս» գումարտակի մարտիկներ են։ Վրաստանում ընտրություններին դիտորդի կարգավիճակով մասնակցող հիշյալ գումարտակի հրամանատար Սեմյոն Սինչենկոյի հայտարարությամբ՝ տղաներն Ուկրաինայում իրավապահների հետ խնդիրներ են ունեցել, կարգավորելուց հետո վրացի ընկերոջ հետ ժամանել են լիցքաթափվելու և որևէ առնչություն չունեն վրաստանյան իրադարձությունների հետ:

«Ուկրաինացիների ձերբակալությունը մութ պատմություն է: Ակնհայտ է , որ նրանք Վրաստան չեն ժամանել հեղաշրջում անելու համար: Կասկածելի են նաև նրանց մոտ զենք գտնելու մասին խոսակցությունները: Ակնհայտ է, որ զենքն իրենց չի պատկանել, պարզապես՝ դրել էին գտնելու համար: Նրանց գործով տարբեր վարկածներ են առաջադրվում, սակայն բոլորն էլ հերքվում են»,- «Շանթ» ՀԸ-ին տված հարցազրույցում կարծիք է հայտնել վրացի քաղաքագետ Գելա Վասաձեն:

Այնուամենայնիվ, ձերբակալվածներից երկուսի նկատմամբ Վրաստանի դատարանն այսօր մեղադրական վճիռ է կայացրել: