Վրաստանի նոր Սահմանադրությունն օրինականացրել է վիրահայերի երկքաղաքացիության իրավունքը

Դեկտեմբերի 16-ին Վրաստանի նախագահի երդմնակալությանը զուգահեռ ուժի մեջ մտավ Վրաստանի նոր Սահմանադրությունը: Այն  Վրաստանի քաղաքացիներին թույլատրում է ունենալ այլ պետության քաղաքացիություն՝ երկքաղաքացիություն: Սահմանադրական նորմը ողջունելի է վրաստանաբնակ էթնիկ  հայերի համար, որոնք նոր նորմով հնարավորություն կստանան՝  ՀՀ քաղաքացիություն ստանալով արտագնա աշխատանքի մեկնել Ռուսաստան:

Ըստ վիճակագրության՝ վերջին 7 տարիների ընթացքում օտարերկրյա քաղաքացիություն ստանալու հետևանքով Վրաստանի 30 հազար քաղաքացիներ զրկվել էին այդ երկրի քաղաքացիությունից: Նրանց 80 տոկոսը հայեր էին:

Նոր սահմանադրությամբ՝ անկախ էթնիկ ծագման, Վրաստանի քաղաքացիները երկրորդ քաղաքացիություն ստանալիս չեն զրկվի Վրաստանի քաղաքացիությունից, ինչպես դա ընդունված էր մինչև նոր Սահմանադրության ուժի մեջ մտնելը:

Վրաստանի Արդարադատության նախարարությունը ներկայացրել է Վրաստանի քաղաքացիությունը վերականգնելու կարգը: Նշենք, որ «Քաղաքացիության մասին» օրենքում փոփոխությունները ուժի մեջ են մտել 2018 թվականի օգոստոսի 15-ին և կգործեն մինչև 2020 թվականի դեկտեմբերի 31-ը: Այդ ժամանակահատվածում Վրաստանի նախկին քաղաքացիները կարող են դիմել քաղծառայության Պետական սերվիսների զարգացման կենտրոն՝ քաղաքացիությունը վերականգնելու համար:

«Վրաստանի քաղաքացիության վերականգնման գլխավոր պահանջը՝ Վրաստանի պետական լեզվի իմացությունն է: Այդ հարցով դիմորդները համապատասխան փաստաթղթեր ներկայացնելուց բացի՝ պետք է քննություն-թեստ անցնեն վրաց լեզվից ու պատմությունից»,- մեկնաբանել է Վրաստանի Արդարադատության նախարարության ներկայացուցիչը:

Միաժամանակ, դիմորդը չպետք է լինի հետախուզման մեջ և չպետք է լինի արտաքսված:

Խորհրդային տարիներին Վրաստանից հեռացած նախկին քաղաքացիներն իրենց քաղաքացիությունը վերականգնելու համար նախ՝ պետք է ներկայացնեն ծննդյան վկայական , ապա՝ պարտադիր կարգով վրացերենի իմացության թեստ հանձնեն, այլապես նրանց քաղաքացիություն չի տրամադրվի:

Հեշտությամբ կվերականգնվի Վրաստանի այն անձանց քաղաքացիությունը , որոնք ունեն օտարերկրյա անձնագիր, բայց նախարարությունից տեղեկություն չեն ստացել քաղաքացիությունից զրկվելու մասին: Քննություն չեն հանձնի, մեխանիկորեն կստանան այդ երկրի քաղաքացիություն:

Ոչ պաշտոնական տվյալներով՝ վերջին տասնամյակում Վրաստանի մեկ միլիոն քաղաքացիներ ստացել են այլ երկրների քաղաքացիություն՝ գերազանցապես Հայաստանի ու Ռուսաստանի:

Վրաստանի քաղաքացիները, ովքեր այժմ ցանկանում են ստանալ այլ երկրի քաղաքացիություն, պետք է դիմեն նաև պետական ​​ծառայության զարգացման գործակալությանը և տեղեկացնեն իրենց մտադրության մասին: Նրանք պետք է գրեն Վրաստանի քաղաքացիության պահպանման դիմում: Վրաստանի իշխանություններից համապատասխան թույլտվություն ստանալուց հետո կարող են ներկայացնել  երկրորդ քաղաքացիություն ստանալու դիմում: