Նախարարությունների նոր գործառույթներն ու անվանումները. հնի ու նորի խրոնիկա

Կառավարության կառուցվածքի փոփոխության նախագծի շուրջ աղմուկը կանխատեսելով՝ ՀՀ կրթության և գիտության նախարարի պաշտոնակատար Արայիկ Հարությունյանը ֆեյսբուքյան իր էջում լուսանկար տեղադրեց՝ կից գրառմամբ.

«Ուշադրություն դարձրեք նախարարների անվան տակ գրված նախարարության անվանմանը։ Առաջին հանրապետությունում դրանք միասին էին»:

Ըստ ներկայացված նախագծի՝ նոր կառավարությունը կազմված կլինի վարչապետից, երկու փոխվարչապետից և նախարարներից: Կկրճատվի առաջին փոխվարչապետի պաշտոնը:

Ինչ վերաբերում է նախարարություններին՝

նոր նախագիծը նախատեսում է 17-ի փոխարեն ունենալ 12 նախարարություն: Դրանցից մի քանիսը միացվել են, մյուսները՝ անվանափոխվել՝ ստանալով այլ գործառույթներ:

Այսպես, մշակույթի, կրթության և գիտության, սպորտի և երիտասարդության հարցերի նախարարությունները կմիավորվեն. արդյունքում կունենանք մեկ՝ կրթության, գիտության, մշակույթի և սպորտի նախարարություն: Տարածքային կառավարման և զարգացման նախարարությունը, պետական գույքի կառավարման կոմիտեն, ջրային կոմիտեն կմիավորվեն էներգետիկ ենթակառուցվածքների և բնական պաշարների նախարարությանը:

Ուստի Էներգետիկ ենթակառուցվածքների և բնական պաշարների նախարարությունը կդառնա տարածքային կառավարման և ենթակառուցվածքների նախարարություն:

Գյուղատնտեսության նախարարությունը կմիավորվի տնտեսական զարգացման և ներդրումների նախարարությանը: Ու կկոչվի տնտեսական զարգացման և գյուղատնտեսության նախարարություն: Ռազմարդյունաբերական կոմիտեն կմիանա տրանսպորտի, կապի և ՏՏ նախարարությանը: Եվ կունենանք նոր՝ բարձր տեխնոլոգիաների և ռազմարդյունաբերական նախարարություն: Ըստ նախագծի՝ Սփյուռքի նախարարության գործունեությունը կդադարեցվի:

Մնացած 8 նախարարությունները ո՛չ անվանման, ո՛չ էլ գործառույթների փոփոխություն կունենան:

Տարբեր կառավարությունների օրոք նախարարությունների անվանումները շարունակ փոխվել են: Օրինակ՝ 1995-2006 թվականին գործել է մշակույթի, երիտասարդության և սպորտի նախարարություն: 2006-ից հետո երկու նախարարությունները ստացել են առանձին գործառույթներ ու նշանակություն: Նոր նախագծով՝ հին ձևակերպումը մասամբ վերականգնվում է:

Տրանսպորտի և կապի նախարարությունը ևս տարբեր ժամանակներում տարբեր անուններով է գործել, այդ թվում՝ կապի, փոստի և հեռահաղորդակցության, տրանսպորտի և հաղորդակցության, տրանսպորտի և կապի նախարարություն: 2016 թվականին՝ Կարեն Կարապետյանի վարչապետության օրոք նախարարությունը կոչվեց տրանսպորտի, կապի և տեղեկատվական տեխնոլոգիաների նախարարություն:

Արտակարգ իրավիճակների նախարարությունը ստեղծվել է 2008 թվականին: 2014 թվականին այն միացվել է տարածքային կառավարման նախարարությանը: Կարճ ժամանակ անց՝ 2016 թվականին, վերակազմակերպվել է ու կրկին գործել որպես առանձին նախարարություն: Ավելի ուշ տարածքային կառավարման նախարարությանն ավելացել է զարգացման բաղադրիչը:

Նույնը Ֆինանսների նախարարության դեպքում է: 1997 թվականին այն վերակազմավորվել է ՀՀ ֆինանսների և էկոնոմիկայի նախարարության: 1997 թվականին նախարարությունները բաժանվել են՝ առանձին գործելով, տարիներ հետո կրկին միավորվել: 2014 թվականին ՀՀ կառավարությանն առընթեր պետական եկամուտների կոմիտեն վերակազմակերպվել է և միացել ՀՀ ֆինանսների նախարարությանը: 2016 թվականին բաժանվել են: Ենթադրվում էր, որ նոր նախագծով ՊԵԿ-ն ու ֆինանսների նախարարությունը կրկին կմիավորվեին:

1992 թվականին էներգետիկ ճգնաժամի հաղթահարման, ինչպես նաև ոլորտի բարեփոխման գործընթացն արդյունավետ կազմակերպելու նպատակով ստեղծվեց ՀՀ էներգետիկայի և վառելիքի նախարարությունը: 1995 թվականի օգոստոսի 4-ին, ՀՀ կառավարության որոշմամբ, նախարարությունը վերանվանվեց ՀՀ էներգետիկայի նախարարություն, որն ավելի ուշ՝ 2008 թվականին վերանվանվեց ՀՀ էներգետիկայի և բնական պաշարների նախարարություն: Վերջինս էլ՝ 2016 թ. սեպտեմբերի 30-ին վերանվանվեց ՀՀ էներգետիկ ենթակառուցվածքների և բնական պաշարների նախարարություն:

2008 թվականին նախկին՝ ՀՀ առևտրի և տնտեսական զարգացման նախարարությունը կոչվեց ՀՀ Էկոնոմիկայի նախարարություն: Իսկ 2016 թվականին, այն պատճառաբանությամբ, որ տնտեսության ոլորտում կարևոր է ներդրումների բաղադրիչը, այն կոչվեց տնտեսական զարգացման և ներդրումների նախարարություն:

Օպտիմալացման ճանապարհին գտնվող Սփյուռքի նախարարությունը սկսել է գործել 2008 թվականից:

Ի դեպ, այս կառավարությունում մի փոփոխություն էլ կա. բացառվել է աշխատակազմի ղեկավար-նախարարի հաստիքը: