Զինվորական ավտոբուսի վրա հարձակվածներից առայժմ ոչ ոք ձերբակալվածի կարգավիճակ չունի․ դատախազություն

Երեկ նորակոչիկներին Երևան տեղափոխող զինվորական ավտոբուսի վրա հարձակվածներից առայժմ ոչ ոք ձերբակալվածի կամ այլ կարգավիճակ չունի։ Այս մասին SHANTNEWS.am-ի հետ զրույցում հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը:

ՀՀ ՊՆ ռազմական ոստիկանության հաղորդագրության համաձայն՝ հարձակման բոլոր ակտիվ մասնակիցների ինքնությունը արդեն պարզվել է։ Նրանք են 1996 թվականին ծնված, նախկինում դատապարտված Մերուժան Վարուժանի Ոսկանյանը և 1979 թվականին ծնված Գոռ Նորիկի Հակոբյանը։

Նշված երկուսից մեկը՝ Հակոբյանը, որ ծառայության մեկնողներից մեկի քեռին է, երեկ ուշ գիշերը ինքնակամ ներկայացել է իրավապահներին։ Իսկ Մերուժան Ոսկանյանը ներկայումս գտնվում է փախուստի մեջ:

Ռազմական ոստիկանությունը անհրաժեշտ օպերատիվ հետախուզական միջոցառումներ է իրականացվում՝ վերջինիս և ինքնությունը պարզված, միջադեպի մյուս մասնակիցներին հայտնաբերելու ուղղությամբ։ Միաժամանակ փաստի կապակցությամբ 08.01.2019թ. ՀՀ ՊՆ ռազմական ոստիկանությունում ՀՀ Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով հարուցվել է քրեական գործ:

Այս հոդվածի համաձայն հանցագործության նկարագրությունն այսպիսին է․ «Խուլիգանություն՝ դիտավորությամբ հասարակական կարգը կոպիտ կերպով խախտելը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով և որը կատարվել է մի խումբ անձանց կամ կազմակերպված խմբի կողմից»։

Քրեական օրենսգրքի այս կետի հատկանիշներով հարձակման մասնակիցները կարող են պատժվել տուգանքով՝ նվազագույն աշխատավարձի երկուհարյուրապատիկից հինգհարյուրապատիկի չափով (համապատասխանում է 200 հազարից 500 հազար դրամին), կամ ազատազրկմամբ` առավելագույնը հինգ տարի ժամկետով:

Ռազմական ոստիկանության հաղորդագրության համաձայն՝ հայտնի տեսանյութի մեջ երևացող հարձակումից բացի՝ նույն երիտասարդները զինվորական ավտոբուսի վարորդին ևս մեկ անգամ ստիպել են կանգնեցնել ավտոբուսը մինչև՛ հայտնի միջադեպը։ Հաղորդագրության մեջ նշվում է․

«2019թ. հունվարի 8-ին՝ ժամը 10։30-ից մինչև 11։30-ը, ինքնությունը չպարզված մի խումբ անձինք տարբեր ավտոմեքենաներով  հետապնդել են ՀՀ ՊՆ Կոտայքի զինկոմիսարիատի Նաիրիի բաժանմունքից ՀՀ ՊՆ կենտրոնական հավաքակայան նորակոչիկներին տեղափոխող  «ՊԱԶ-32053» մակնիշի ՊՆ 3299 Տ զինհամարանիշի ավտոբուսը, որի ընթացքում ճանապարհի տարբեր վայրերում կտրելով ավտոբուսի ճանապարհը, ստեղծելով վթարային իրադրություն, հարկադրել են կանգ առնել, այդ ընթացքում դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության նկատմամբ, ոտքերով հարվածներ են հասցրել ավտոբուսի տարբեր հատվածներին և վնասել այն:

Շարունակելով իրենց իրավախախտ գործողությունները՝ նշված անձինք Երևան քաղաքի Շարուրի փողոցում հերթական անգամ նույն եղանակով կանգնեցրել են ավտոբուսը, նրանցից երկուսը ոտքերով հարվածելով բացել են ավտոբուսի սրահի դռները և ներս մտնելով, բռնություն են գործադրել նորակոչիկներին ուղեկցող՝ այդ պահին ավտոբուսի սրահում գտնվող ՀՀ ՊՆ Կոտայքի զինկոմիսարիատի Նաիրիի բաժանմունքի տեսուչ Հ. Թ.-ի նկատմամբ, հարվածել վերջինիս դեմքին՝ պատճառելով մարմնական վնասվածք, ինչպես նաև հայհոյանքներ հնչեցրել նրա հասցեին, իսկ այլ անձինք, քաշելով վարորդ Վ. Մ.-ի հագուստից, դուրս են բերել նրան ավտոբուսի վարորդի խցիկից»: