Հանցագործները ԱՄՆ-ում հայկական դպրոցների վրա թուրքական դրոշներ են կախել․ «Նույնն է, թե հրեական կառույցի վրա կախեին նացիզմի սիմվոլներ»

Անցած գիշեր ԱՄՆ-ում գործող հայկական երկու կրթօջախների՝ Սուրբ Նահատակաց Ֆերահյան երկրորդական և ՀԲԸՄ Մանուկյան-Դեմիրճյան վարժարանների վրա փակցվել են թուրքական 10-ից ավելի դրոշներ: Ոստիկանությունը սա բնութագրել է որպես «Ատելության հիմքով հանցագործություն»: Եղածը դատապարտել են նաև ԱՄՆ-ի Հայ դատի հանձնախումբը և ԱՄՆ կոնգրեսական Ադամ Շիֆը:

Առավոտյան` ժամը 4։00-ի սահմաններում, դիմակավորված կասկածյալը բարձրացել է հայկական դպրոցի աստիճաններով, հետո դարպասի, բազրիքների վրա կախել թուրքական դրոշներ: Գործողությունները տեսանկարահանվել են տարածքը հսկող տեսախցիկներով:

«Սա շատ լուրջ հանցագործություն է, որին պետք է իսկապես լուրջ մոտեցում ցուցաբերենք: Վստահեցնում ենք, որ հայկական համայնքը ապահով և խաղաղ պայմաններ կունենա: Կանենք ամեն բան, որ մեղավորն արդարադատության առջև կանգնի»,- խոստացել է քաղաքի ոստիկանապետը։

Իրավիճակից խիստ վրդովվել է տեղի հայ համայնքը: Լռել չեն պատրաստվում, կարծում են՝ սադրիչ գործողություններին արժանի պատասխան պիտի տրվի: ԱՄՆ-ի Հայ դատի հանձնախումբը հայտարարություն է տարածել՝ խստորեն դատապարտում է ատելության հողի վրա կատարված հանցագործությունները և անհանդուրժողականություն խթանող ցանկացած գործողություն:

«Նման վարքագիծը պայմանավորված է Հայոց ցեղասպանության համար պատասխանատվության բացակայությամբ և Թուրքիայի կողմից դրա շարունակական մերժմամբ: Սա նաև ծառայում է որպես հիշեցում, թե ինչու է Ցեղասպանության ճանաչմանն ուղղված արդարության համար պայքարը մնում մեր առաջնահերթությունների առաջնագծում»,- նշվում է կառույցի հայտարարության մեջ։

Մտահոգություն կա նաև ծնողների շրջանում։ Նրանց մի մասն այսօր հրաժարվել է երեխաներին ուղարկել դպրոց։ Նրանցից մեկն այս արարքը բնորոշել է այսպես․

«Նույնն է, թե հրեական կառույցի վրա կախեին նացիզմի սիմվոլներ»։

ՀՀ Սփյուռքի նախարարի պարտականությունները կատարող Բաբկեն Տեր-Գրիգորյանը հույս է հայտնել, որ միջադեպն ամբողջությամբ կբացահայտվի, իսկ նման դեպքերի կրկնությունը կբացառվի: Լոս Անջելեսում Հայաստանի Հանրապետության գլխավոր հյուպատոս Արմեն Բայբուրդյանն էլ հայտարարության մեջ կարևորել է այս ու նման այլ հարցերում հայերի համախմբվածությունը:

Հայկական վարժարանների վրա թուրքական դրոշներով հարձակումը կոշտ քննադատության են ենթարկել ԱՄՆ կոնգրեսականներ Ադամ Շիֆն ու Բրեդ Շերմանը։ Նրանք ընդգծել են պատմական իրողությունների փաստը:

«Հարավային Կալիֆոռնիայի մասնավոր հայկական դպրոցները վանդալիզմի են ենթարկվել թուրքական դրոշներով: Այս դպրոցներում սովորում են Օսմանյան կայսրության կողմից իրականացված Հայոց ցեղասպանությունից փրկվածերի սերունդները: Ես աջակցում եմ հայ համայնքին՝ դատապարտելով ատելության հողի վրա կատարված այս գործողությունը»,- նշվում է նրանց հայտարարության մեջ։

Թեման ակտիվորեն լուսաբանում են ամերիկյան առաջատար լրատվամիջոցները: Լոս Անջելեսի ոստիկանությունը հետաքննություն է սկսել և ուժեղացրել հսկողությունն այս դպրոցների նկատմամբ: