Ինչո՞ւ են Մայիսյան գյուղում բոյկոտել դպրոցի տնօրենի ընտրությունը

Արմավիրի մարզի Մայիսյան գյուղում դպրոցի տնօրենի ընտրություններն անցել են ոչ հարթ պայմաններում: Խնդիրն այն է, որ դպրոցի կառավարման խորհրդի նախկին անդամները մարզպետի որոշմամբ զրկվել են խորհրդի կազմում ընդգրկված լինելու, հետևաբար` տնօրենի պաշտոնում իրենց թեկնածությունն առաջադրելու հնարավորությունից, ինչի պատճառով նրանք որոշել էին բոյկոտել ընտրությունը: Դպրոցի փոխտնօրեն Ամատունի Կիրակոսյանի գլխավորությամբ նրանք փակել են դպրոցի մուտքը՝ արգելելով թեկնածուներին մտնել շենք:

Իսկ տնօրենի պաշտոնում առաջադրված 7 թեկնածուներից որևէ մեկը Մայիսյան գյուղից չի եղել: Անկախ ստեղծված իրավիճակից`ընտրությունը կայացել է, և տնօրեն է ընտրվել Արա Սարուխանյանը: Բայց ուսուցիչները պատրաստվում են շարունակել իրենց բոյկոտը: Ինչպես տեղեկացրել է Ամատունի Կիրակոսյանը, նրանք  հայց են պատրաստել, և տնօրենի ընտրության ընթացքն ու արդյունքը վիճարկելու են դատարանում:

Իրադարձություններին ներկա է գտնվել Մայիսյանի գյուղապետ Եսայի Մովսիսյանը, որը SHANTNEWS.am-ի հետ զրույցում հայտնեց.

«Ներկա եմ եղել, սկզբում մեր գյուղացին ինքն էր ուզում առաջադրվել, բայց լիցենզիա չուներ, ուզում էր հետաձգեր, բոյկոտում էին, ոստիկանությունից եկան, բանակցեցին, դռները բացվեցին, և ընտրությունը կայացավ: Նրան հնարավորություն տրվել է, բայց ինքը պետք է լիցենզիա ունենար, ինչը չի ունեցել, ուզում էր հետաձգվեր, լիցենզիա հաներ, նոր ընտրություն կայանար, իր բողոքը դրանում էր»,- նշեց համայնքի ղեկավարը::

Իսկ դպրոցի նախկին տնօրեն, տնօրենի պաշտոնակատար Իշխան Պետրոսյանը նշեց.

«Կայացել է ընտրությունը, մանկավարժական կոլեկտիվը լիազորություններ չունի, կառավարման խորհուրդն է անցկացնում մրցույթը, դպրոցում կա կառավարման խորհուրդ, որի վրա դրված են լիազորությունները, ով է ասել, որ դեմ են եղել, մրցույթը կայացել է, քվորում եղել է, ընտրվել է տնօրեն»:

Նա կարծում է, որ տեղի ունեցածը փոքր միջադեպ էր, իսկ ընտրությունը կայացել է օրենքի սահմաններում, նրա վստահեցմամբ` որևէ խախտում տեղի չի ունեցել: Իսկ թե ինչն է եղել Ամատունի Կիրակոսյանին և մյուս խորհրդի անդամին լիազորություններից զրկելու պատճառը, տնօրենն ասաց.

«Խորհուրդը կազմված է 8 հոգուց, բողոքարկվել է, որ մանկավարժները 3 տարի առաջ՝ 2016թ-ին թեկնածություն են առաջադրել կառավարման խորհրդում բաց քվեարկությամբ, բայց օրենքը պահանջում է փակ քվեարկություն, խորհրդի 2 անդամները 3 տարի մասնակցել են նիստերին օրինական ձևով, նամակ են գրել մարզպետին, մարզպետն էլ, ելնելով օրենքից, 2 մանկավարժների մասնակցությունը համարել է անօրինական և թույլ չի տվել մասնակցել: Մասնակցել է 6 հոգի` սահմանված կարգով, խորհուրդն էլ իր նիստն արել է, թեկնածուներից ամենաբարձր միավորը հավաքել է Արա Սարուխանյանը»:

Նա վստահեցրեց, որ դպրոցում իրավիճակը հանգիստ է, նորմալ դասապրոցես է ընթանում: