Հայդելբերգի համալսարանում նախագահը ներկայացրել է «Մատենադարան»-ի աշխատանքը. հաղորդում է SHANTNEWS.am-ի թղթակիցը

ՀՀ նախագահ Արմեն Սարգսյանի՝ Գերմանիա կատարած աշխատանքային այցը սկսվել է Հայդելբերգ այցով, որտեղ նա հանդիպել է քաղաքապետին, եղել է ամենահին գրադարաններից մեկում ու Գերմանիայում ամենահինը համարվող համալսարանում, հայտնում է SHANTNEWS.am-ի թղթակիցը:

Նեկար գետի ափին բացվող պատմական այս քաղաքի մասին առաջին գրավոր վկայությունը վերաբերում է 1196 թվականին, ապա՝ ավելի ուշ, հիշատակվում է քաղաքի գլխավոր պատմական խորհրդանիշներից մեկը համարվող ամրոցը: Բայց պարզվում է՝ 20-րդ դարի սկզբին Հայդելբերգի մերձակա շրջաններում անցկացված պեղումները զարմանալի արդյունքներ գրանցեցին: Այստեղ հայտնաբերվեցին մարդկային մնացորդներ, որոնք մոտ 600 000 տարեկան էին: Այդ գտածոն հենց այդպես էլ կոչվեց՝ հայդելբերգյան մարդ:

Մարդու գոյության ամենահին այս բնակավայրերից մեկն էլ հետագայում դարձավ Գերմանիայի և ընդհանրապես Եվրոպայի՝ զարգացման, գիտական ու կրթական առաջընթացի կարևոր կենտրոններից մեկը՝ միավորելով պատմական արժեքներն ու գիտական նոր առաջընթացը՝ զարգացման ամենաարագ տեմպերն ունենալով: Եվ այնպես է ստացվել, որ այդ յուրահատկությունն ունեցող քաղաքը հիմա ղեկավարում է գիտնական քաղաքապետը: Հայաստանի նախագահ Արմեն Սարգսյանի՝ այս քաղաք այցն ու առաջին հանդիպումը խորհրդանշական է ստացվում՝ երկու ֆիզիկոսների հանդիպում:

Երկու գիտնականների զրույցը հենց գիտության բնագավառում համագործակցության շուրջ է ծավալվում: Գիտական խոշորագույն կենտրոններից մեկը զարգացած է հատկապես կենսաբանության ուղղությամբ, այստեղ է գտնվում քաղցկեղի հետազոտության հեղինակավոր կենտրոններից ու մոլեկուլյար կենսաբազմազանության լաբորատորիաներից մեկը: Բայց գիտության բնագավառում համագործակցության ասպարեզը լայն է:

«Հայդելբերգն ամենաարագ զարգացող քաղաքն է, մեծ ներուժ ունի գիտության, մասնավորապես բժշկության բնագավառում։ Մենք ստեղծում ենք: Հուսով ենք, որ ապագայում կարող ենք գործակցել այս և այլ ոլորտներում»,- ասում է Հայդելբերգի քաղաքապետ Էքարտ Վյուրցերը:

Հայդելբերգի հետ համագործակցության համար նախագահ Սարգսյանը իր առաջարկն ունի:

«Ես մտածում եմ նույնիսկ՝ Ձեզ առաջարկեմ մեր ամենագեղեցիկ քաղաքներից մեկը, որտեղ մտածում եմ, որ մենք կզարգացնենք տեղեկատվական տեխնոլոգիաների ոլորտը և կիրականացնենք արհեստական ինտելեկտի մշակումը: Ես հավատում եմ, որ այդ քաղաքում, որը կոչվում է Դիլիջան, հետագա զարգացումները կընթանան»,- նշում է նախագահ Սարգսյանը:

Ստացած տպավորությունները նախագահը թողնում է տպավորությունների ոսկե գրքում, քաղաքապետ Վյուրցներին Հայաստան հրավիրում և խոսքը եզրափակում լավատեսությամբ, որ Հայաստանում ևս կունենանք այնպիսի համալսարան, որը գոյություն կունենա այնքան երկար, որքան Հայդելբերգինը:

Հայդելբերգ ասելիս շատերն առաջինը հենց Հայդելբերգի համալսարանն են հիշում՝ ամենահինը Գերմանիայում ու ամենահեղինակավոր համալսարաններից մեկը Եվրոպայում: Այն ստեղծվել է 1386թ.: Հեղինակավոր այս համալսարանում են սովորում ուսանողներ տարբեր երկրներից, այդ թվում՝ Հայաստանից: Այս համալսարանում ուսանելու, գործունեություն ծավալելու հետ են կապված աշխարհի երկու տասնյակից ավելի նոբելյան մրցանակակիրների անունները: Հենց այս համալսարանում էլ նախագահն անցկացնում է օրվա վերջին, բայց ծավալուն հանդիպումը՝ ելույթ ունենալով ուսանողների և դասախոսների առջև:

Հայդելբերգի համալսարանում գիտական կրթական ծրագրերում համագործակցության հնարավորություններին ծանոթանալուց զատ, Արմեն Սարգսյանն այցելել է Հայդելբերգի համալսարանի գրադարան և ծանոթացել այնտեղ պահվող միջնադարյան գրքերի, դրանց պահպանման աշխատանքների հետ։ Այս համատեքստում նախագահը ներկայացրել է հնագույն ձեռագրերի «Մատենադարան» գիտահետազոտական ինստիտուտի աշխատանքն ու ընդգծել, որ երկու կառույցները համատեղ կարևոր աշխատանքներ կարող են իրականացնել։