Սբ. Գևորգ եկեղեցում ադրբեջանցու նկարահանած տեսանյութը նոր չէ. Վիրահայոց թեմը պարզաբանում է

Համացանցում տեսանյութ է տարածվել, որտեղ Ադրբեջանի մի քաղաքացի Թբիլիսիի Սուրբ Գևորգ եկեղեցում պատարագի ընթացքում նախ՝ ադրբեջաներենով վիրավորական արտահայտություններ է հնչեցնում հայերի ու Հայաստանի հասցեին, հակահայկական կոչեր անում, դիմում համաքաղաքացիներին` հորդորելով  «հայկական բոլոր դեսպանատների և եկեղեցիների մոտ ակցիաներ անել՝ Ղարաբաղի ազատագրման համար»:

Տեսանյութի երկրորդ մասում տղամարդը տրորում է հայկական դրոշը (իրականում՝ Կոլումբիայի), թքում վրան, հետո այրում:

Վիրահայոց թեմի առաջնորդ Տեր Վազգեն եպիսկոպոս Միրզախանյանից տեղեկացանք, որ դեպքը տեղի է ունեցել 2018 թվականի դեկտեմբերի 2-ին: Տղամարդը եղել է Վրաստանի քաղաքացի հանդիսացող ևս երկու ադրբեջանցու հետ, նրանք ներկայացել են որպես օտարերկրա զբոսաշրջիկներ ու նկարահանումներ են արել եկեղեցու բակում ու ներսում՝ չնայած եկեղեցու սարկավագն արգելել է նկարահանել:

Սրբազանն ասում է՝ տեսանյութի շարունակությունը, որ իբր թե եկեղեցու բակում տղամարդը հայկական դրոշ  է վառում, մոնտաժված է, դա  չի կատարվել ո՛չ բակում, ո՛չ էլ դրսի կողմից: Այդպիսի տարածք Սուրբ Գևորգի հարևանությամբ պարզապես չկա:

Վիրահայոց թեմը դեպքից օրեր անց նշված տեսանյութն ու նաև եկեղեցու անվտանգության տեսախցիկների նկարահանած նյութերն ուղարկել է Վրաստանի ներքին գործերի նախարարություն: ՆԳՆ-ն դեպքի կապակցությամբ գործ է հարուցել, եկեղեցու սարկավագը ներգրավվել է որպես գործով վկա: Քննությունը պարզել է, որ  տեսանյութի հեղինակն Ադրբեջանի քաղաքացի է, արդեն պարզվել է նաև՝ երբ է եկել Թբիլիսի և երբ մեկնել, իսկ նրան ուղեկցող ևս երկուսը (այս տեսանյութում չեն երևում, նրանց ֆիքսել են Սբ.Գևորգ եկեղեցու անվտանգության տեսախցիկները) Վրաստանի քաղաքացիներ են:

Թեմը նամակով դիմել է նաև Արտաքին գործերի նախարարություն, Վրաստանում Հայաստանի դեսպանատունը ևս տեղեկացվել է:

«Այս մարդու արարքը  դատապարտելի է ոչ միայն հայերի, այլև ադրբեջանցիների համար: Ես զրուցել եմ նաև Վրաստանում գործող ադրբեջանական հոգևոր առաջնորդների հետ, ովքեր նույնպես դատապարտել են նման պահվածքը, ինչը կարող է ժողովուրդների միջև տարաձայնություններ ու լարվածություն բերել: Դա, հավանաբար, արվում է  Ադրբեջանի որոշ գործիչների կողմից, որպեսզի Վրաստանին  ներգրավի ղարաբաղա-ադրբեջանական  հակամարտության մեջ: Դրա վառ ապացույցն է Թբիլիսիում վերջերս տեղի ունեցած ցույցը, որն օդից ստեղծված ուղղակի արհեստածին շարժում էր՝ նպատակ ունենալով բորբոքել կրքերը, և Վրաստանին արհեստականորեն ներգրավել այս ամբողջի մեջ»,- ասել է Վիրահայոց թեմի առաջնորդը:

Սրբազանը վստահ է, որ հայ համայնքից բացի՝ Վրաստանի իշխանություններն ու Վրաստանի ադրբեջանաբնակ համայքների  զգալի մեծամասնությունը ևս չեն կիսում նման մոտեցումները: Ասում է՝ հակառակն էլ է լինում: Ադրբեջանաբնակները շատ հաճախ մեր եկեղեցիներ են գալիս, քահանայի օրհնություն ստանում:

«Քանի որ հարյուրավոր զբոսաշրջիկներ են ելումուտ անում եկեղեցի, դժվար է վերահսկել ու տարբերակել՝ ով ով է: Այժմ արգելվել են Թբիլիսիի հայկական եկեղեցիների տարածքում լուսա և տեսանկարահանումները՝ առանց տեղի հոգևորականի թույլտվության»,- հավելել է նա:

Սրբազանը դժվարանում է պատասխանել՝ ինչու է հենց հիմա՝ ամիսներ անց,  տեսանյութն ակտիվորեն տարածվում: Ենթադրելով, թե միգուցե, հայկական լրատվամիջոցնների ուշադրությունը նոր է կենտրոնացել դրա վրա: