Մեդիագրագիտության պակասից տուժում են բոլորը. Սամվել Մարտիրոսյան

«Մեդիագրագիտություն» առարկան դպրոցում ներառելն անհրաժեշտ քայլ է: SHANTNEWS.am-ի հետ զրույցում նման տեսակետ հայտնեց մեդիափորձագետ Սամվել Մարտիրոսյանը: Խոսելով այն մասին, որ մեդիագրագիտության հիմունքներին՝ առանձին խմբակների միջոցով, մտադիր են ծանոթացնել՝ սկսած երկրորդ դասարանից, Մարտիրոսյանը նշեց.

«Ինձ թվում է՝ երկրորդ դասարանի երեխաների համար այն անիմաստ է, որովհետև երկրորդ դասարանի երեխաներին պետք է ընդհանրապես հեռու պահել մեր լրատվամիջոցներից. դա ամենալավ մեդիագրագիտությունը կլինի իրենց համար, իսկ արդեն միջին դպրոցում, իհարկե, դա կարևոր է, որովհետև այսօր երեխաները միանգամից դառնում են տեղեկատվության սպառող, ու հաշվի առնելով, որ անընդհատ կեղծիքը և այլն ահավոր շատանում է, նշանակում է՝ ոչ թե լավ կլինի, որ լինի այդ առարկան, այլ երևի թե պարտավոր ենք ունենալ: Մեր հանրության կողմից ապատեղեկատվության սպառման մասշտաբները վկայում են այն մասին, որ աղետալի վիճակ է, ու մեր երեխաներին պետք է, իհարկե, կրթել այդ հարցում: Ուրիշ տարբերակ չկա, այլ հարց է, որ այն կարող է հասարակագիտության մի մաս լինել կամ առանձին առարկա, դա քննարկելու հարց է, բայց երևի թե պարտավոր ենք ունենալ»,- ասաց նա:

Հետաքրքրվեցինք՝ արդյո՞ք մեդիագրագիտությամբ կարող է լուծվել նաև համացանցային խաղերից ճիշտ օգտվելու հարցը, հիշեցրեցինք, որ տարածվել էին խաղեր, որոնք երեխաներին կախվածության մեջ էին գցում, գործողություններ թելադրում, որոնց երեխաները ենթարկվում էին: Մարտիրոսյանն ասաց, որ դա ավելի շուտ համացանցից ապահով օգտվելու խնդիր է: Նրա խոսքով՝ սրանք նաև հարցեր են, որ միայն կրթական ծրագրերի մեջ ներառելով չեն լուծվի: Նա ասաց, որ պետք է ուսուցիչներ լինեն, նույնիսկ հասկանալը, որ կա խնդիր, արդեն խնդիր է, քանի որ շատ դեպքերում, երբ արդեն մեծ խնդիր է լինում երեխաների շրջանում, մեծահասակները դրանից տեղյակ չեն լինում:

Մեդիագրագիտության պակասից, ըստ մեդիափորձագետի, տուժում են բոլորը:

«Տեսեք, եթե վերցնենք միայն ու միայն ապատեղեկատվության քանակը, աշխարհում այն արդեն այնպիսի մասշտաբների է հասել, որ ամենադեմոկրատական երկրները հիմա մտածում են կարգավորումներ մտցնել և կեղծիքներ տարածելու համար պատժամիջոցներ մտցնել: Դժվար է կոնկրետ տարիքային շեմ առանձնացնել, կարող են խնդիրները տարբերվել, բայց փաստ է, որ այդ խնդիրները գնալով աճում են: Հայաստանում այսօր ամենամեծ խնդիրն ապատեղեկատվությունն է, շատ մեծ ռեսուրսներ են ներդրվում այդ ապատեղեկատվությունը տարածելու մեջ, մանիպուլյատիվ-քարոզչական բնույթի տեղեկատվություն, այդ ամենը լուրջ սպառնալիք է, սա արդեն երեխաներին չի վերաբերում, ընդհանուր հասարակության խնդիր է»,- ասաց նա:

Մարտիրոսյանի գնահատմամբ՝ մեդիագրագետ լինելը մարդուն պաշտպանված է դարձնում. մարդ դառնում է տեղեկատվության ավելի գիտակից սպառող, ինչը նաև ազդում է աղբյուրների վրա: Նա նշեց՝ այսօր հասարակությունը հեշտ ու հանգիստ ինչ-որ կայքեր է տարածում, այդպիսով փաստացի խրախուսում է դրանց գոյությունը, այնպես որ տեղեկատվության գիտակից սպառումը նաև դրական է ազդում դաշտի վրա` մոլախոտը քչանում է, իսկ այդտեղ, իհարկե, մարդու պաշտպանվածությունն է, ավելի քիչ մանիպուլյացիաների ազդեցության տակ է գտնվում: